好驚會唔會有左

18/3(app 話係排卵日)同男友做,做完發現個避孕套係地下但男友射嘅時候話feel 到係套到射,所以唔知幾時甩左:smiling_face_with_tear::smiling_face_with_tear:
之後1小時內食左事後避孕藥但都好驚,呢幾日都keep住有頭痛同黎m前嘅痛,好擔心:exploding_head::sob::sob:

Hello~ 多謝你嘅提問:heart:呢度想同你講返事後丸嘅原理先:事後丸含有高劑量人造荷爾蒙,透過唔同嘅途徑去緊急避孕,包括:抑制排卵、增加子宮頸黏液分泌令精子難以通過、改變子宮腔環境令受精卵難以著床 。即係話就算你身體真係咁啱排卵,而精子又咁啱遇到卵子,結合成為受精卵,事後丸都可以通過阻止佢着床嚟避免懷孕。加上你喺24個小時內就已經食咗事後丸,避孕嘅機率係達到95%以上嘅,所以係唔需要太擔心懷孕嘅~

至於你話個套唔知幾時甩咗,可能係因為安全套個尺寸唔啱。你可以叫男朋友量度下自己陰莖嘅尺寸,再對比返安全套上面嘅尺寸係咪一樣,睇下有無需要轉一款安全套。 :thinking:

安全套嘅闊度一般都有分M size、L size、XL size等唔同尺寸,一般以mm為單位(例如52mm ± 2mm)。歐美同日本牌子嘅量度方法會有少少唔同,一般會以【 寬度 (Nominal Width)】或者【 直徑 (Diameter)】去顯示:

寬度 (Nominal Width) 【歐美/香港常用】

  • 安全套擠扁時橫向嘅長度
  • 數值上係圓周 (Circumference) 嘅一半
  • 量度陰莖充血時/物件根部嘅圓周,將圓周數值除二就會得到【寬度】嘅數字

直徑 (Diameter) 【日本牌子常用】

  • 安全套放平時圓形的直徑
  • 算術上 直徑 x 3.14 = 圓周
  • 量度陰莖充血時/物件根部嘅圓周,再除以3.14,就會得到【直徑】嘅數字

如果過往買安全套之前,都未試過度陰莖尺寸的話,建議可以先度度陰莖嘅圓周。量度嘅方法就係當陰莖勃起嘅時候,可以用一個卷尺(或類似嘅物件,如繩),圍陰莖一圈,去得出陰莖嘅圓周。然後將 圓周除2,就係安全套所指嘅闊度 。因為安全套係有彈性,所以就可以選擇比實際尺寸細少少嘅安全套款式,比較可以避免安全套滑落嘅情況。 :nerd_face:

另外,因為事後丸係醫生處方藥物,呢度都想問下你食嘅事後丸係邊度購買嘅?如果係喺私家診所/公立醫院/家計會攞到嘅話,咁藥效係有保證嘅,唔需要擔心。

如果真係好擔心,可以喺性行為之後嘅7-11日用驗孕棒進行驗孕。而喺性行為之後嘅14日,或者月經遲咗7日以上再驗孕嘅話,個結果就最準確啦!

希望以上嘅資訊幫到你:heart: