女朋友冇嚟m

3月11同女朋友做咗(內射)到依家佢都未嚟m,佢正常月中至月尾嚟,依家好驚

Hello​:ok_woman:t2:單憑你描述嘅情況,我哋好難判斷意外懷孕嘅機會呢~介唔介意話俾我哋聽性行為過程有冇使用安全套?性器官有冇直接接觸?或者手指有冇曾經接觸過分泌物再接觸性器官?

如果係冇使用安全套,性器官有直接接觸,或者手指曾經接觸過分泌物之後再接觸性器官,就有機會有意外懷孕嘅風險。但因為已經過咗食事後丸嘅期限,所以如果擔心嘅話,可以同伴侶商量之後進行驗孕。因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

另外,月經本身就係可以被不同外在同內在因素影響嘅事,例如病過、食過藥、情緒有起伏、有壓力、生活作息有明顯改變等等,都係可以導致荷爾蒙水平有變動,從而影響到月經周期。有時即使冇發生過一啲明顯嘅變化,月經周期都係可以有變動嘅!亦好少人係每個月都同一日嚟月經,所以建議你哋可以先進行驗孕,確定女朋友有冇懷孕再決定下一步點做。