男朋友細路仔性格

我20 男朋友22 一齊十個月
我哋嘅關係都好好
雖然有時會有小脾氣同埋鬧交
不過好快好翻 呢個唔係問題
問題係男朋友而家呢個年紀好鍾意公仔
佢鍾意公仔亦都唔係問題
但係佢好似細路仔咁
成日扮細路仔把聲同埋卡通角色把聲
對住公仔同埋我講野 好似心智未成熟咁…
開頭幾個月我都覺得冇問題
但久而久之都覺得有啲煩
我又唔想佢唔開心 加上佢對住外人
都唔會有呢一面 佢係因為信得過我
同埋又係佢女朋友
所以先喺我面前表露細路仔呢一面
所以我冇同佢講 唔想hurt到佢
但係佢日日都係咁 真係開始聽到厭
可以點算…

你好~ 多謝你嘅提問同分享~

明白你唔鍾意男友bb 聲咁同你同公仔講嘢,但又唔想傷害到佢或者好似否定/嫌棄佢咁,喺呢個兩難嘅情況下,有以下嘅處理方向可以考慮:

1)實話實說、攤開嚟傾,不過盡量以陳述客觀、唔judgemental 嘅狀態去講,並且提出你嘅需求~ 例如:「我明白你喺同我嘅關係入面感覺安心同自在,所以會表露呢個好有童真嘅狀態比我睇,對此我係好開心同埋覺得我哋之間係好親密的,感覺到互相嘅信任好大,但係我並唔習慣呢個語調,而一齊咗一段時間之後我發現我都係唔係好適應到,如果可以嘅話,我希望你可以同我講嘢嘅時候,試吓用另一個語調,睇吓會唔會可以大家都感覺舒適、安全、自在:)」

理論上,如果能夠唔去批評對方或否定對方嘅感受同個人喜好,係可以坦誠地溝通返大家嘅感受,繼而嘗試去達成一啲共識,例如尋求新嘅方式,去令大家嘅需求都能夠滿足,咁試試吓試到一個大家都滿意嘅方法,問題就得以解決喇:)

2)嘗試用自己嘅方法去連結、同理,例如想像下自己有冇一啲時候都會用bb 聲講嘢?(例如對住bb 同小動物)如果有,又可以諗下點解喺一啲特定情況下會咁做,係咪因為覺得對方可愛?定係因為想handle with care 或者表達愛護、愛惜所以會講bb 話?或者係想向對方撒嬌?如果能夠想像到自己基於咩原因會講bb 話,咁又會唔會能夠接受男友基於同樣或類似嘅intention 所以對你講bb 話,甚至能夠欣賞到對方呢一面呢?

3)嘗試感受對呢個細路仔嘅面向感到厭煩會唔會有更加深層嘅原因:會唔會係因為覺得隨住年紀增長就應該變得成熟,而成熟嘅人就唔應該有呢一面?會唔會係因為自己會希望伴侶可以成熟穩重啲,令關係感覺好似安穩啲?定係會唔會喺段關係入面,都有一啲隱憂,令你擔心你哋未來嘅發展?

以上三個方向嘅路線分別係一齊解決、自行消化並改變,同埋抽絲剝繭地去釐清問題核心,如果你唔介意花啲時間同心力,可以先試吓3,如果冇深層嘅原因,只係個人實在客觀地唔喜歡咁樣,就可以睇吓希望自行解決,定係覺得都可以一齊尋求解決方法~ 三個方向都未必容易,但係親密關係就好似一面鏡,可以睇到對方同時亦都可以觀照自己,而透過溝通、相處同磨合,又可以一齊成長更多~ 希望你哋可以搵到令大家都舒適自在嘅相處方式啦:)

(發覺匿名like唔到comment​:joy_cat:
btw多謝你嘅意見~ ~(≧▽≦)/~

1個讚