同女朋友一齊就來一年，呢一年同佢都發生左好多事，而一齊嘅第三個月，佢因內分泌問題而入左醫院，而家需要定時食內分泌藥，到而家狀態良好，不過可能因為個病，令佢比之前更加容易焦慮同埋情緒化。
唔知佢係咪因為受到病情影響，同佢一齊期間，佢比較容易發脾氣同埋無理取鬧，會為少少嘢而嬲同埋焦慮，會亂諗野，而且時間觀念好重，佢從來唔容許自己遲到，就算係一分鐘都唔得，唔知係咪有少少強迫症，不過我知道佢本身性格唔係咁，但係日子耐左，間唔中都會俾佢嘅脾氣同埋無理取鬧而有少少心累，我自己有時忍唔住嘅時候會鬧佢幾句，佢自己都喊住話控制唔到，佢好想改，改左佢自己嘅壞脾氣同埋無理取鬧，但係始終都係唔得，覺得自己有心無力好辛苦，我唔係要佢改變啲咩，只係想佢間唔中控制一下情緒，不過咁講好似前後矛盾，前一句話理解佢control唔到自己嘅emotions，但下一句就話想佢好好控制一下，係咪好怪？
不過日子耐左，自己又好似已經習慣佢呢種情緒，而去到呢刻我從來冇諗過任何要離開佢或者分手嘅念頭，反而同自己講，無論佢係點，我都會好好愛佢，保護佢，好好陪佢捱過病情。
直至最近同埋今日同佢食飯，佢好似變左另一個人咁…
本身好平常咁點餐，佢本身都冇異樣，不過食飯期間，我見佢好似唔係咁開心咁，佢自己一路食飯一路低頭睇電話，本身我唔知發生咩事，但係之後佢話「你係咪叫錯左餐」，嗰下我仲未知發生咩事，之後慢慢消化先發覺頭先我好似真係點錯餐，當佢本身想食a餐，我叫錯左b餐，呢個餐比佢原本想食嘅a餐貴少少，分量亦都少過a餐，我自己又口痕食左佢半碟飯，搞到佢冇乜點食嘢，如果係平時嘅佢，會開始指責我，話我點解無心裝載，仲要搞到佢冇乜點食嘢，但係反而佢係粒聲唔出，淨係靜靜地低頭睇電話、行路，我問佢做咩啊，佢目無表情咁話冇嘢，我反問佢係咪因為我叫錯餐，佢就扮冇嘢咁話唔關事，然後搭車返屋企途中，佢一粒聲都無出，而且如果佢平時嬲我，發脾氣，我攬佢嘅話佢會反抗，推開我，但係佢冇反抗冇推開我，反而係好順其自然俾我攬，點解佢好似變左另一個人咁？係咪因為平時我怪佢成日發脾氣？好擔心…同時有啲不安，我可以點做？
首先好多謝你嘅提問同埋分享，喺文字裏感受到你好關心女朋友，亦都為呢一段關係有好多嘅反思～