事前避孕藥漏食

事前食緊第一個月,食緊yaz,漏食咗一日,第二日記得嘅時候都有補返,嗰日食咗兩粒。見上面話漏食一日之後要食番夠7日先有效。之後就係食藥第七日,食藥之後同男朋友有性行為,有體內射精。之後而家再過多幾日就應該m到,唔知自己太過擔心定係點,開始有啲想嘔,驚有左。

Hello 知道你可能擔心自己會有懷孕風險,但係都可以放心,根據你嘅情況,你懷孕嘅機會率都比較低。

你提到你已經食咗一個月,當中有漏食咗一日,但都有按指示咁食返兩粒。而的確,事前避孕藥係需要連續服食七日先至可以建立到足夠避孕藥效。如果你都有喺漏食之後,連續按時食返七日先進行有關性行為,相信個時已經建立咗足夠藥效,唔洗擔心會有懷孕風險。

而喺服食事前避孕藥初期,或者途中試過漏食嘅話,都有機會會有部分副作用,包括不規則出血、作嘔作悶、胸部漲痛等等。而呢啲都可能同懷孕徵兆有啲相似,所以擔心都係好正常嘅。如果真係好擔心嘅話,都可以喺有關性行為之後嘅7至11日之後自行驗孕。你可以去連鎖個人護理商店,或者信譽良好嘅藥房,購買牌子可靠嘅驗孕棒,再按指示自行驗孕。一般來講,7日之後驗就已經會有初步結果, 11日之後驗就會有準確嘅結果。

一般來講,其實只要身體習慣咗藥物(大概三個月左右),副作用就會慢慢消失。不過如果呢段時間副作用真係非常嚴重,或者過咗三個月之後副作用都持續存在,並無減退,都會建議去睇醫生,諮詢返醫護人員嘅意見,因為有機會可能身體未必適合食呢隻事前避孕藥。