阿媽成日屈我冇溫過書

小妹今年考dse,本身同男朋友一齊左五個月,感情好好,幾乎每日都見,自問讀書唔算好好,不過如果全神貫注溫書會考到唔錯成績,而自己知道就黎考dse,同男朋友拍拖之餘都會抽時間溫書,例如最差嘅數學同埋重要嘅中文
不過問題係阿媽平時對我都有要求,會成日chur我溫書,佢叫我溫書都冇咩問題,但係試過坐喺佢隔離做數,佢都可以話見唔到我溫書,或者朝早唔使返學,佢返左工,我都會用朝早時間溫中文同埋數學,然後下晝先同男朋友出街,不過有時比佢遲左少少返屋企,佢就會話我冇溫過書,淨係掛住出街拍拖,幾乎每日都係咁,但係我又唔想話佢,因為佢平時返工都辛苦,同埋知道佢係關心我,唔通要一日24小時坐係到證明俾佢睇我有溫書…
另一方面,雖然知道考完dse有四個月長假,不過自己見中六呢一年冇好似人地咁樣用咁多個月溫書,自己淨係用左幾個禮拜至一個月溫書,雖然溫清concept,不過頂多得6-7成熟,好似虧欠左阿媽咁,又覺得冇人地咁勤力,同時覺得嗰四個月長假自己唔值得同埋冇資格享受咁
唉 心很累

1個讚

Hello,我都經歷過考公開試,亦都俾父母哦過,所以都好明白你既感受。不過宜家都就快開考,或者你可以分配多啲時間係溫習上,亦可以定出一個時間表分配溫書時間,拍拖時間,休息時間等,將時間表貼係自己書桌當眼處,等媽咪都睇到,咁佢就會知道你識得安排時間,有好好既時間管理,佢就會放心哂!
另外,都知道你係孝順,知道媽咪返工辛苦,唔想駁佢咀,其實你都可以同媽咪溝通多啲,例好係食飯時可以同媽咪傾一下,講下自己既溫習進度,或溫左咩野科目,等佢知道你已係溫習上花左功夫,佢就唔會哦你咁多,亦會對你有更大信心。
至於你話考試後四個月長假覺得自己唔值得冇資格享受,其實呢個假期正好俾你思考一下自己既前路同發展,你亦可以好好利用呢個長假去學習一啲新知識,如:外語、音樂等,利用這些學習好發掘一下自己的興趣,亦有幫你日後既發展,和確立發展方向。
DSE加油哦!