隱瞞左男朋友半年嘅謊言

[anonymous88]

我同男朋友一齊半年，佢係一個好好嘅男仔，好好嘅男朋友，會無條件支持我，好專一，總之好多好男朋友應有嘅條件，佢都有，同佢一齊我好放心咁將自己嘅心事同佢講，但係就有一樣嘢由識佢到而家都唔知點樣甚至唔敢坦白……就係我嘅學歷

我04女，喺我中三嗰年有抑鬱症，讀書壓力太大而無心向學，日日尋死，學校見我無心向學所以要我留級一年，直至幾年後先慢慢靠自己走出陰霾，而上年開學識到而家嘅男朋友，可能因為身邊好多人見我之前成績一直都係名列前茅，加上係名校，個個對我期望極大，男朋友都係，但係冇人知我曾經有抑鬱，連屋企人都唔知，除左學校嘅人同埋frd知我repeat一年，校外嘅frd同埋其他人冇人知，可能因為驚比人睇唔起同埋失望，所以唔敢講，嗰陣repeat打擊太大，所以上年謊稱考dse，但其實上年我仲係form5，今年先考dse，最大問題係唔知點面對男朋友我連對住佢都係謊稱今年讀大學，不過佢之後問點解今年仲要考dse，我就呃佢話我自願重考，但係呢一年疑似焦慮症發作，都係冇乜心機讀書，仲有得返幾個禮拜就開考，每次拎起本書，好容易分心，甚至記唔入腦，好辛苦，好想入到大學，但係得返咁少時間係咪已經冇可能………

呢半年一直好想同男朋友坦白，但係我驚如果同佢坦白，佢會同我分手，好似呃左佢對我嘅信任，每次佢話即使我重考dse考得差，都仲有大學學位，根本唔使驚，每次聽到呢句我個心都好內疚，好驚佢會對我改觀然後分手，或者唔再信我，我應該點做好？好大壓力…….

[anonymous91]

？

[Noel_StickyRiceLove]

Hello你好啊

明白你依加都好難受，唔想呃住男朋友，但又唔知點講好，唔知坦白後對方會有咩反應。

見到身邊嘅人對你學業成績都有期望，但係因為一啲身體狀況，所以留級，相信呢個對你嚟講都係一個好困難嘅決定，當時都好難受，亦都好擔心身邊人對你嘅睇法，所以先選擇隱瞞repeat過同埋今年考DSE呢件事，但係慢慢地呢個謊言好似越滾越大，要用一個大話冚住另一個大話。

相信你嘅另一半都好錫你對你好好，亦都會成日稱讚你，相信你哋兩個一齊經歷咗好多嘢，都有好深厚嘅感情。見到你最擔心嘅係對方知道後會對你改觀然後分手，但依個唔係一件必然會發生嘅事，可能佢會心痛你曾經嘅經歷，可能佢會理解到你嘅處境，選擇陪你一齊面對，我地往往都會將事情想像成最差嘅情況，但對方嘅反應可能比想像中好。

你可以揾一個感到舒服、安全嘅環境，坦承咁同對方講你嘅經歷同感受，令對方明白你唔係存心呃佢嘅。當然，啱啱知道真相時，對方有機會需要時間接受，可能當下會有負面嘅反應，依個過程中，都需要俾時間對方，等佢慢慢process成件事。

喺一段關係中，坦誠係好重要嘅，如果唔能夠做真正嘅自己，會好辛苦嘅最近都開始考試，明白會好大壓力，再加上依件事，我地都會一直陪住你嘅！

[anonymous100]

多謝你呀尋日我終於鼓起勇氣同佢坦白，結果真係如你所講，佢唔介意而且都話我讀嗰間名校一向好大壓力，明白我之前嘅處境，仲話呢d其實好少事，佢一啲都唔介意，多謝你令我解開左呢半年嘅心結好多謝你！