發覺女朋友呢幾個月好唔妥 佢好似強迫症定係潔癖上身 會好驚細菌病毒 見到關於病毒 例如愛滋 性病 hpv 子宮頸癌 交通意外新聞等等嘅電視或者電話廣告就會開始驚開始擔心 佢每次掂到任何室外嘅嘢都會立即消毒全身 特別係手同埋有傷口嘅位 仲有個人物品 消毒完又會消毒多次 尤其係去完醫院同埋診所 佢唔係驚covid 因為佢中過 而係驚其他細菌病毒
佢之前試過同ex無套性行為 過咗差唔多成一年 我就陪佢去性病快測機構做愛滋 梅毒(同埋丙型肝炎?)嘅快測 全部陰性 佢當時抖鬆一口氣 但係最近佢又擔心快測唔準確 聽到真係頭都大埋
又會亂諗嘢 會驚身邊嘅人同埋自己有意外 每次佢諗到呢d都會不停問我會唔會有事 危機感同埋警覺性極重 我就同佢講諗太多 反而咁樣佢越焦慮越不安 除非我轉移話題 佢先暫時忘記 冇幾耐又問多次 好擔心佢係咪有焦慮或者驚恐症 加上佢成日瞓唔著或者遲瞓 而且當佢發現佢身體有少少唔舒服 頭暈 腰痛 腹痛 就算好少事甚至冇事 佢都唔放心 一係問我佢會唔會有咩病 一係就search關於呢d症狀會有咩病 宜家網上面好多誤導性資料 連頭痛都可以話係絕症呢d荒謬資料佢都半信半疑 而佢可能自卑 之前向過我提出幾次分手 話唔想拖累我 麻煩到我 覺得自己變成我嘅負擔 我每次同佢講 我唔介意佢咁樣 反而會陪住佢 有咩事一齊面對 因為佢係一個好女仔 之前我發生左d事 佢衣不解帶喺我身邊陪住我 照顧我 愛錫我 如果係其他女仔 相信都會嫌棄我 離我而去 只有佢唔嫌棄我 冇因為我嘅過去而拋棄我 係一個無人取替嘅好女朋友
我一直諗緊會唔會帶佢去睇醫生 不過因為佢身體比較弱 如果食藥我驚會有副作用 影響到佢自身健康 除左多d陪佢 仲有咩建議?thx
Hello
首先好欣賞你關心女朋友嘅精神健康狀況，亦都見到你好細心，留意佢最近擔心嘅嘢，同時都比好多嘅鼓勵同埋陪伴佢。就咁睇你嘅文字描述，都可以話俾你聽女朋友好大機會患上焦慮症。一般情況來講，適當嘅擔憂焦慮可以協助個人避開危險嘅處境，亦都促使佢哋解決日常遇到嘅問題。但某啲人會比起其他人更容易產生焦慮反應，焦慮嘅程度同埋持續時間都會比較強烈同埋長，甚至影響個人日常生活。而強迫症屬於焦慮症其中一種，當事人會出現強迫性思想同埋行為，佢哋嘅腦海都會出現重複嘅思想，畫面，令佢哋產生緊張，或者係唔舒服嘅感覺，例如我見到你提及女朋友每次掂到任何室外嘅嘢都會立即消毒全身，重複消毒呢個動作。為咗減輕焦慮嘅感覺，當事人會不斷做出重複，甚至係冇意義嘅行為，就例如不停消毒洗手，檢查，重複說話等等。另外，一見到你提及女朋友見到有關病毒，性病，交通意外嘅新聞都會好擔心，對於自己嘅身體不適亦都好焦慮，就有機會屬於另一種焦慮症——廣泛性焦慮症，指經常被恐懼同埋擔憂困擾，而且當事人唔能夠控制自己擔憂嘅問題，亦都不能容忍難以預計嘅情況，並且症狀a持續出現超過六個月。
不過唔需要太擔心，相信你嘅陪伴同埋向佢表達你對佢嘅焦慮問題感到關心，已經係好好嘅第一步。接下來可以引導佢嘗試講佢自己嘅感受，聆聽佢嘅感受，唔好負面去批評佢嘅處境。好多焦慮症患者，並唔知道社會上有唔同嘅治療方法，除咗睇精神科醫生，使用醫藥治療之外，其實仲有心理治療，例如一啲輔導服務，可以讓專業人士一齊同患者處理焦慮問題，以循序漸進嘅方式面對佢所擔心嘅事，希望患者嘗試從另一個角度思考問題，透過放鬆同學習脫離焦慮嘅感覺，控制情緒。如果冇得到及時嘅專業介入或者治療，有機會令患者出現抑鬱症或者其他精神健康問題，所以建議當你了解女朋友嘅感受同埋佢擔心嘅嘢之後，可以鼓勵佢尋求合適嘅專業協助。
至於你擔心女朋友身體問題，有關醫藥治療方面，一般精神科醫生會開抗抑鬱藥，鎮靜劑等治療焦慮症。副作用包括：焦慮，情緒反彈，渾沌，損害記憶力等。不過相信醫生都會以評估返女朋友嘅身體狀況，開返合乎比例嘅藥物。
希望以上資訊幫到你
(本人擁有由香港心理衛生會舉辦嘅精神健康急救標準課程2023修業證書)
補充：啱啱女朋友屋企人幫佢手洗新買嘅牛仔裙 佢話見到條牛仔裙一路甩色 洗手盤啲水一路變做藍色 女朋友話見到之後心入面驚到痴線 佢第一時間驚嘅唔係佢著左之後會敏感 而係驚佢屋企人手洗之後會皮膚敏感 因為佢同我講佢屋企人洗完之後雖然用梘液洗手洗左好多次 不過都仲有dd藍色喺手上面 女朋友仲係好擔心 屋企人又硬頸 話瞓醒先洗 佢更加驚 不過因為佢唔想佢屋企人擔心或者知道佢可能有焦慮症 所以佢都收埋 唔想俾屋企人知道同埋擔心 佢仲話寧願自己有嘢 都唔俾佢屋企人有咩事
明白佢唔想俾屋企人知道呢樣野，因為可能社會上對於一啲輕性精神病都有偏見，或者唔好嘅睇法，所以當自己意識到自己可能有咁嘅病時都會唔想面對。當開始覺得自己有啲唔妥嘅時候，大部份人都會拒絕同身邊嘅人傾訴，尤其係最親嘅人，因為都唔知要點樣開口講呢樣野，好多時佢哋會出現自責嘅情緒，覺得係自己嘅錯，所以會更加收收埋埋。所以我相信女朋友唔係嬲你掛住出街同frd打波嘅，我諗係出現問題初期呢段時間，佢自己都要消化下
呢個時候就更加需要你嘅陪伴同鼓勵，明白請佢去睇醫生好難，所以可以嘗試喺日常生活慢慢入手，令佢知道自己其實而家呢個精神狀態同埋身體健康，都唔係太良好，就好似平時病都會去睇醫生咁。例如：「我聽你講最近都瞓得唔係好好，又頭痛頭暈，好似持續左一段時間喎，我好擔心啊，我驚你平時會唔夠精神。同埋我見你成日都好似好緊張咁，不如我陪你去睇醫生啦，佢會開啲藥俾你瞓得好啲，同埋個人都會冇咁焦慮架～」
另外有關公立醫院精神科輪候時間，專科門診診所係實施分流制度，確保病情緊急並需要及早診治嘅病人獲得優先跟進及同治療。新轉介個案通常先由護士甄別，再經有關專科醫生覆核，然後分為緊急、半緊急和穩定個案。有關以上三個個案嘅輪候時間可以睇返呢個網站：精神科
另外其實一般嘅抗抑鬱藥，同鎮靜劑，門診醫生都可以處方，咨詢完門診醫生意見之後，就可以請佢轉介去專科診所。或者我見你提及女朋友有喺私家醫院見開另一個醫生，都可以睇吓會唔會做到轉介。
因為我哋住大西北 但係屯門醫院好似淨係為十八歲以下青少年提供服務 女朋友過咗年齡限制 所以得返青山醫院嘅精神科健康中心 但係唔知佢哋服務質素如何
上網見到好多負評….
其實你地都可以考慮搵普通私家診所或者家庭醫生睇下先，對病情有更清楚了解先，而且其實普通家庭醫生都可以開一啲治療情緒病藥物。如果到時醫生覺得有需要，都會再作合適嘅轉介，而其實屯門醫院都有臨床心理治療部，如果有需要都可以轉介過去。不過都要有心理準備，預計都要等返一定時間。如果急嘅話，就可能搵私家醫生睇會好啲。
至於有關青山醫院評價方面，其實都好難講得埋。因為每個人都可能因為唔同原因而去，可能會有唔同嘅服務或者治療，都可能會有面對唔同嘅醫護人員，好難一概而論。如果真係擔心嘅話，可能都可以考慮選擇其他區外嘅公營醫療機構，或者搵私營醫療服務（但當然私營嘅價錢上就會貴啲）。
希望可以幫到你。
