對上12月有黎經期 1月冇黎 2月7號黎咗就直到依加
有性行為，但都有全程用避孕套，亦有自己買咗驗孕棒Check咗2次都確定冇懷孕，一次係遲咗2星期Check，一次係早2日Check。
請問點樣先可以令自己快啲黎M？
依加肚谷谷唔舒服
Hello~ 月經遲黎係有好多因素影響嘅，例如生活習慣改變、心理壓力大、生病服食過藥物等等，所以遲黎經並唔一定等於懷孕，而如果過去依個月經週期內發生性行為時都有使用有效嘅安全措施嘅話，懷孕嘅機會係唔大嘅 
加上你喺性行為後14日驗過兩次而結果都係陰性，咁就應該係無懷孕架啦
至於有關催經嘅方法，無論月經遲黎係咩原因所致，都唔建議自行購買催經藥或者使用一啲坊間嘅催經方法，除左有機會催經無效之外，更加可能會傷害身體 
所以如果好想佢快啲快啲嚟，會建議你去睇醫生了解返身體狀況，睇下有無需要催經，而睇中醫定西醫就視乎你個人嘅喜好喇～
如果你覺得其實佢都就快嚟只係谷住咗，未想去睇醫生住，可以試吓做一啲促進血液循環嘅事，例如浸熱水浴、做下運動等等，亦都可以痴個暖貼喺下腹部睇吓佢會唔會快啲出到嚟～但呢啲都係坊間請留落嚟嘅做法，並無醫生確認過呢啲方法有效。
但係亦提示返，如果經期不穩持續咗一段時間，都會非常建議你去睇睇婦科醫生，因為有機會係有一啲婦科情況（例如多囊卵巢症）導致荷爾蒙失調，繼而導致經期不穩～ 如果知道實際情況係點，醫生都會可以提供到多啲方法，例如調經藥、催經藥、催經針等～
最後，市面上雖然好易買得到避孕藥，而避孕藥亦有調經功能，但係唔係每一隻藥都適合每一個人，所以如果想用佢嚟調經，最好都係諮詢一下醫生嘅意見呀～
依加有時會覺得胸痛，其實係咪等佢自然黎會好啲
係呀，明白有啲懷孕前症狀同經前症狀好相似，所以令你好擔心，但正正因為呢啲症狀好相似，所以我哋唔可以單憑呢樣嘢去判斷自己有冇懷孕啊，嘗試做一啲自己鍾意或者有興趣嘅嘢，分散一下注意力～