我而家就嚟嚟m，感覺到開始谷m，如果做愛會唔會對身體唔好，同埋而家算唔算係安全期？
同埋想請問下今次係第二次做愛，有d咩注意嘅地方，包括點樣先可以令男朋友更滿足，因為我地今次係約咗酒店，係酒店做嘅話有d咩要注意架，唔該曬
上次做係因為突然想要，完全冇心理準備，所以事後都一直擔心，而今次有咗心理準備先做，所以想了解清楚做愛點樣可以做得放心又可以令大家都舒服。
你好，好多謝你同我地分享你既問題，知道你性經驗唔多，我想先同你講下安全期。坊間所講既「安全期」係以一個週期28日去計算，而一個週期係由黎月經第一日直到下一次黎月經前一日為止。係一個28日週期之中，安全期嘅計算係假設咗身體會係第14日排卵，所以週期既第1至7日以及21至28日，亦即係所謂嘅月經前7後7日會係所謂既「安全期」。
但係安全期並唔可靠，原因係唔係每個人既週期都係28日，即使係28日週期既人都唔一定係第14日排卵。要去到直至月經出現，我哋先可以計算上一個週期係幾長，再大概估算上個周期嘅排卵日同「安全期」係幾時，唔能夠係未出現月經就單憑計算日子準確知道係幾時排卵。而且，有啲週期較短嘅人甚至會係月經期間或月經月結後就排卵，而精子進入體內最長可以生存3至5日，如果咁啱遇上身體排卵，就有機會造成懷孕，所以使用安全期避孕並唔係一個安全有效既避孕方法。
因為月經週期可以被太多因素影響，變相亦較難準確推算出一個絕對『安全』的日期。加上每個人排嘅時間都不同，而且月經同排卵有機會撞期，所以即使剛剛完結月經亦有機會受孕。如果真係要計算排卵期/安全期，首先你要喺醫生指示底下每日去記錄身體同分泌嘅狀況，同時間亦都需要用基礎體溫計（唔係普通市面嘅體溫計）去記錄同比較每日嘅體溫，再加上要每日都用排卵棒去測試，先可以比較有系統地推斷到幾時排卵期，之後先可以大約知道安全期係幾時。因此，最理想係有使用避孕方法，如：安全套的情況下才進行性行為。
至於，你問月經前發生性行為會唔會對身體唔好，其實只要你身體情況良好，即無月經前既不適，而你又覺得舒適》雙方都同意既情況下，同伴侶發生性行為係無任何不良影響既。不過，女性係月經前好多時都會有身體不適或者唔舒服，好多時候都未必有心情或者享受同伴侶發生性行為，所以你可以根據當時自己既情況，去決定係唔係可以有性行為。
另外，你打算同男朋友去酒店發生性行為，首先要注意衛生問題，因為酒店始終唔係唔清楚佢地既打掃清潔情況，所以都要保持衛生。其次，係發生性行為之前雙方都一定要清潔性器官，確保大家都清潔，減少有細菌或分泌物，造成互相感染。而且要有雙方有共識，例如：咩野方式既性行為／採用咩方式既安全措施等。社會上過往都比較少提及到伴侶之間發生親密接觸，都係需要有雙方嘅共識，而雙方都係隨時都有say no嘅權利。不論咩時候，或者咩行為都好，只要你唔願意，都係有權利去say No。同時，不論係咩性別都好，亦有say yes嘅權利，因為每一個人有唔同嘅性需要都係好正常嘅事。最重要嘅係，彼此之間有溝通交流，理解對方嘅想法，去搵一個共識。當雙方有共識後，如果未有打算懷孕／或確定雙方既性健康情況，就一定採取安全措施，如：全程使用安全套／服用避孕藥等。而安全套係目前唯一可以避孕同預防性病既有效方式。
除此之外，事前亦可雙方了解下大家既性喜好，係進行插入式性行為前，進行一些前戲，如擁吻／愛撫等，都可以增加大家既性興奮同氣氛，令雙方都可以更放鬆，才進行進一步既性行為。
希望呢啲資訊可以幫助到你，亦歡迎你之後有任何問題／疑惑，都可以隨時黎再發問，我地都好樂意為你提供意見的。
唔該曬呀，咁其實正確使用安全套嘅避孕機率係咪已經好高，因為經驗少，點都會有d擔心
下晝嘅時候我同男朋友做咗兩次，第一次嘅時候係用後入姿勢，跟住男朋友感覺就快射嘅時候就郁多咗兩下，然後撳住個套口邊射邊拎出嚟，拎咗出嚟之後就射埋淨低個d，但係我見到佢個套口同根部陰莖上面有白色嘅液體，我唔知道係我d分泌物定係佢d精液，因為都係白色，但係個套入面都係佢d精液，事後都有灌水測試，個套冇穿，只係想知道d精會唔會係套口流出嚟，真係好擔心
跟住我呢兩日又就嚟嚟m，有一直谷m同腰痛嘅感覺。
第二次係我地去沖完身出嚟先再做，兩次都有全程帶套，不過第二次佢射嘅時候我係訓低，佢企起身，跟住佢就嚟射就拎返出嚟，除咗個套射咗係我個小腹同陰毛上面，因為係第二次射，所以射咗好少精，應該得五六滴，而且都有立即就去沖身。諗緊聽日要唔要去家計會攞事後丸，但係又怕事後丸太大副作用。
想補充一下，第一次去沖身之前有聞到自己下面d液體，確定係自己d分泌物，但係就唔知有冇精液掂到。
其實睇返你嘅情況，因為兩次性行為全程都有配戴安全套，就算第二次係射喺陰毛上面，懷孕機率都係好低嘅，唔需要食事後丸。
因為你話有灌水測試過，個套係冇穿嘅，加上你男朋友係喺陰莖仍然勃起嘅時候撳住個套口邊射邊拎出嚟，咁係唔需要擔心精子由套口漏出黎嘅。