有幾個問題想問下
1.其實食事後丸係咪越快越好？（今日係性行為嘅後一日，聽日先約到睇家計會）
2.兩代事後丸有冇話第二代嘅效果會好d？
3.有冇得要求醫生比我食第二代事後丸？
4.肥胖人士食事後丸會唔會容易失效？
5.月經前食事後丸會唔會應該經期？
6.嘔吐係咪屬於唔常見嘅副作用？（比較擔心出現嘔吐然後要再食藥）
7.去家計會睇有冇得搵朋友陪？（已成年）
8.想事前了解家計會嘅流程係點，佢地會做d咩？（包括醫生會問d咩，會唔會通知家長）
最後我想講返自己嘅情況，就係4月10號同男朋友做，全程帶套，佢拎出嚟射咗入套，跟住見到個套口有淡白色液體（即係陰莖根部），唔知道係我嘅分泌物定係佢d精液，但係安全套嘅size係正確嘅，擔心會唔會有機會係套口流出嚟，因為套口嘅分泌物d顏色實在分唔清楚。佢射完入套之後，我見到個陰莖中間部分都有精液，係個套入面，因為佢今次射嘅量有d多，前面嘅存精位已經滿曬，所以噴咗d去中間，我帶套之前都有撳住安全套個頭排走d空氣。但係就唔清楚陰莖根部個d係咪我嘅分泌物，平時自慰嘅時候d分泌物插多幾下就會變淡白色，顏色同套口個d一樣。男朋友都唔確定個d係咪我嘅分泌物，換姿勢嘅時候都冇留意個套口係咪一直有分泌物，但係琴日做嘅時候水聲都好大，感覺係我d分泌物加上套嘅潤滑油，所以特別濕。事後我地就即刻去咗沖身，我摸自己下面嘅時候都摸到有分泌物，聞咗一下確認到係屬於自己嘅分泌物，亦都有灌水測試個安全套冇穿冇爛，但係都好擔心，所以約咗家計會聽日去食藥，先想了解家計會嘅流程。
Hello~等我逐題回應你啦～
-
事後丸喺性行為之後嘅12個小時內服用效果係最好嘅，過咗24個鐘先至效果就會開始減弱。不過因為事後丸嘅原理係透過唔同嘅途徑去緊急避孕，包括：抑制排卵、增加子宮頸黏液分泌令精子難以通過、改變子宮腔環境令受精卵難以著床，所以只要喺72/120小時內服用，都可以喺好大程度上避免懷孕。
-
二代事後丸比起一代有效時間較長，一代要喺性行為之後72小時內服用先有效，而二代可以喺120小時內服用。除此之外，其實藥效同副作用係差唔多嘅，都好睇個人體質同埋隔咗幾耐之後服用。詳情可以參考以下網址：事後避孕藥分兩種！效果好嗎？如何安全使用？醫師藥師完整說明！ | 美的好朋友
-
如果你真係好想食二代嘅話，你係可以向醫生提出呢個要求嘅，但唔grantee一定可以，都要睇返你嘅個人體質同埋醫生嘅判斷。
-
你可以參考返上面所講關於事後丸嘅原理，其實佢係通過調節你體內嘅荷爾蒙水平嚟去阻止懷孕，同肥胖其實係冇咩關係嘅。不過如果你嘅肥胖係因為內分泌失調所導致嘅，咁就有機會影響藥效，不過詳細嘅情況都要問返醫生。
-
食完事後藥之後嘅一個星期內通常會出現岀血，呢個情況係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕，依一次嘅岀血算係月經（因為無受精卵著床），所以下一次月經週期可能會受影響，例如上一次月經係10月2日，10月15日使用事後避孕藥，10月17日出血，咁下次月經應為11月17日左右。不過唔係個個食完事後丸都會出血嘅，亦都唔係個個食完之後月經都會延遲，所以都講唔埋嘅～
-
覺得嘔心（但唔係一定會嘔）係屬於常見嘅副作用。如果喺食後3小時內嘔嘅話，咁就要返去覆診，有機會要再食藥。但過咗3個鐘嘅話，咁就算嘔咗，粒藥應該已經被消化同吸收，咁就唔需要再食。
-
由於疫情，前排家計會係唔俾人陪同你入診所嘅（而家唔肯定，可以打電話去問下），不過朋友係可以喺出面等待嘅。
-
去到家計會首先需要登記，姑娘會問一啲你嘅個人資料、身體狀況、性行為經驗，需要填表。而個人資料係會保密嘅，家計會亦唔會喺未經你同意嘅情況下，聯絡你嘅家人。
然後就會見醫護人員，護士會為你做簡單嘅身高、體重、血壓記錄，了解你嘅月經週期情況、性行為經歷、使用嘅避孕措施、有冇長期病患等。醫生亦會評估你嘅身體情況，然後依照你嘅需要處方藥物俾你。
通常你要喺診所食完藥先離開，醫護人員會同你解釋有機會出現嘅副作用，同埋通常會建議，直至月經出現前，都唔好發生陰道陰莖插入式嘅性行為。
記得帶身份證同埋足夠現金（家計會只收現金），關於收費，可以參考：青少年保健 - 香港家庭計劃指導會
最後睇返你嘅情況，因為全程都有使用安全套，同埋有灌水檢查，咁其實懷孕機率係好低嘅，冇必要食事後丸。之於你話唔清楚陰莖根部個d係咪自己嘅分泌物，下次可以試吓聞下，如果係精子嘅話，個味道係好強烈嘅，通常一聞就知道，都可以作為一個判斷嘅。
咁我係咪冇必要食事後丸，因為都擔心副作用，最近兩日都有重要嘅事情要忙，擔心會影響，加上就快嚟m，身體都唔係幾好
同埋想知道嚟月經前食事後會唔會有影響
其實係冇必要食嘅，不過食唔食屬於個人選擇，如果你想都係可以食嘅。
至於月經前食事後係唔會有特別嘅影響嘅，不過如果你就快嚟m, 其實可以考慮等下月經。如果嚟咗m咁就代表冇懷孕啦！
咁如果我去睇下醫生問下醫生意見，佢會唔會有機會建議我唔需要食藥，定係去到就一定要食藥架？
頭先去廁所見到底褲有兩小滴啡色野，係咪嚟m前就會咁，同埋有少少m痛嘅感覺。
你可以詳細同佢講你嘅concern同埋成個性行為嘅過程，等醫生畀建議你，再決定食唔食藥（你唔想食嘅話佢唔會迫你嘅）。
唔好意思ar，我最後唔放心去咗家計會睇醫生，將情況同佢講咗，佢建議我都係食事後丸，因為食咗始終比較放心。我想請問一下我3月28發生過第一次性行為，跟住第7日同第11日有驗孕，都係negative，係咪就已經好準啦？所以我係咪可以放心第一次性行為？跟住琴日（4月12日）我食咗事後丸，食完之後有d腹痛同想嘔，今日（4月13日）我朝早起身感覺到下面多咗好多分泌物，即係用手摸落比較多水，我想知道係咪事後丸嘅副作用，加上我app話我原本4月15會嚟m架,咁係咪有機會準時到或者推遲？同埋嚟m前分泌物會變多定係變少？
因為性行為之後11日驗孕嘅結果係最準確嘅，所以可以好肯定冇懷孕。不過因為事後丸係高劑量嘅荷爾蒙藥物，我哋會建議喺一個月經周期裏面唔好食多過一次。所以如果你想進行性行為，咁一定要採取更加高效嘅避孕方式。
至於你話
呢啲都屬於正常嘅副作用，除非情況持續左一個星期以上，咁先需要睇醫生。
另外，食完事後藥嘅一個禮拜內通常會出現撒退性岀血。呢個情況係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕，依一次嘅岀血算係月經（因為無受精卵著床），所以月經週期都可能會受影響，下一次月經嘅日期都會受影響，例如上一次月經係10月2日，10月15日使用事後避孕藥，10月17日出血，咁下次月經應為11月17日左右。所以你app預測嘅經期應該唔準確，比較大機會會延遲。而嚟m前分泌物係會變多，所以你而家嘅情況應該係代表就快出現撤退性出血。
咁我可唔可以將事後丸理解為會改變我一直以嚟嘅經期？而且係咪一定會有撤退性出血？
可以咁講嘅，如果你嘅月經周期，原本係好規律嘅，咁事後丸有機會令到你呢一至兩個月嘅月經變得唔規律，多數會延遲。基本上食咗事後丸都會出現撒退性出血嘅，不過有部分人食完係一啲副作用都冇嘅，咁就同個人體質有關。
的確因為體質問題，唔係個個都會有撤退性出血嘅，但係只要你係喺有效嘅時間內服用，咁事後丸都係有發揮到作用嘅。如果想知佢有冇發揮到作用都係要靠驗孕。如果性行為之後嘅11日驗孕，結果係陰性嘅話，咁就可以肯定係冇懷孕。
咁如果出現月經係咪就代表冇懷孕，撤退性出血係咪就係月經？
撤退性出血係可以代表一次月經嘅，所以只要有出血都係代表冇懷孕。
今日係食事後嘅第二日，下腹有少少悶嘅感覺，谷住谷住，腰都有d酸，好擔心冇撤退性出血，因為見其他人都好快就有