女朋友變得獨立唔再依靠我

同女朋友一齊兩年

喺我心目中佢成績好好 對我都好好

我好愛佢 佢都好愛我

只不過佢一向好小朋友 好依賴我

平時生活好無主見 任何小事都搵我 同我講

有時我瞓咗睇唔到佢msg 聽唔到佢電話

佢就話喺佢有事嘅時候我唔喺到

久而久之我開始覺得煩 成個細路女咁唔識長大

自從同佢講要大個 唔好下下都依靠我

畢竟佢都已經係大學生 佢識得獨立思考

自此之後佢就慢慢開始獨立 芝麻綠豆嘅事都無再搵我

原本我覺得雨過天青 佢終於成熟識得諗

但係發覺嗰日之後佢就唔似之前咁痴我

平時佢都會叫我幫佢拎嘢

而家佢口口聲聲話唔洗

好多平時佢叫我幫手嘅事佢自己全部解決

而且冷淡咗唔少

上網睇女朋友如果女朋友突然獨立唔再依賴男朋友

係分手嘅徵兆…

佢而家唔係唔理我

但係比起以前佢真係冷淡咗好多

佢之前好鍾意對住我笑 好鍾意攞我開玩笑

而家佢一係目無表情 一係就敷𧗠我

睇到真係開始驚 其實我唔係想佢咁㗎…

我淨係想佢獨立d

我係咁問佢係咪嬲我 佢又話唔係

點算好…我唔想分手

好想之前嘅佢翻嚟:cry:

hello你好啊

明白你而家都好難受,雖然另一半如你所願咁樣改變左,但係突如其來嘅變化,令你擔心對方對自己嘅感情變淡。

每個人每段戀愛關係都係獨特嘅,本身就冇話點樣相處先係最好,每個人喺每段戀愛關係中都係需要同伴侶慢慢咁探索出互相都接受到嘅相處,就例如當你向另一半表達希望佢可以變得成熟之後,佢就慢慢開始獨立,性格上可能有變化,但係正正因為一直以來,你已經習慣咗俾佢依賴嘅相處模式,所以當有變化時,就可能感到不知所措。

我哋可以諗吓呢一個嘅變化,係咪真係一件壞事呢,對佢嚟講,原來一直以來嘅相處模式對你係壓力,所以作出改變,可能因為大家都未試過新嘅相處模式,佢都未必能夠攞到一個平衡,變相就好似好冷漠,又或者大家對於成熟嘅定義都唔同,係溝通不足嘅情況下,收未必能夠了解到底對方希望要啲咩。

你都可以試吓搵你伴侶好好咁認真傾吓,例如對你地來講成熟係代表啲咩,係指日常處事嘅成熟啊?定係感情上嘅成熟呢?明白呢一個改變對你哋來講都唔容易,相信情侶之間都會有倚賴對方嘅時候,所以成熟嘅界線應該係點決定呢? 不如試吓傾下一啲實際嘅細節,例如可能你覺得有嘢做嘅時候收到佢嘅message會有少少唔識處理,咁可唔可以同佢講呢一段時間你未必可以即刻回覆到,可能要等得閒少少先可以回覆,如果能夠好好釐清依個字對於你哋兩個嘅意義,溝通上都會清楚好多。

明白網上邊有好多關於親密關係相處嘅資訊,但係每一對情侶嘅相處都係獨一無二嘅,所以好難用一個標準套落全部人度,見到你哋都一齊咗已經兩年,相信感情已經好深厚,亦都好熟悉大家,所以與其自己擔心,充足嘅溝通對感情嚟講係更加有益嘅