想問問事前避孕藥嘅事

4月12號食咗事後丸,跟住今朝4月15嘅開始出血,係嚟m,跟住之前食事後嘅時候有同家計會嘅醫生提到想開始試下食事前,佢叫我嚟m第一日上去,不過今日星期六家計會好早就收咗,如果我星期一再上去睇醫生得唔得架,有冇話事前藥要幾時開始食,因為到星期一已經係嚟m嘅第三日,會唔會有影響。

同埋想問下事前同事後可唔可以相距咁少時間開始食?

Hello~ 事前避孕藥嘅時間係月經週期頭五日內,所以就算星期一先去睇都係冇影響嘅,不過喺服用事前避孕藥後嘅一個禮拜內需要配合其他外用嘅避孕方法,減低懷孕機率。等過咗七日,藥效建立咗之後,就算冇用安全套都唔需要擔心懷孕。

不過都想俾定心理準備你,因為每個人嘅體質唔同,唔係個個都適合服用事前避孕藥,所以都要見咗醫生先,等醫生去判斷你嘅情況適唔適合食。至於服用嘅頭三個月都屬於適應期,有機會會出現月經唔規律嘅副作用,即係可能會有不規則出血。如果情況持續就要搵醫生複診,睇吓需唔需要轉過第二隻藥。

至於事前同事後藥係可以同時服用嘅,所以唔需要擔心隔得太近會有影響。

我今日係嚟m嘅第二日,可能因為食咗事後嘅關系,所以d血已經開始少,感覺上到第三日就會慢慢變冇,咁樣其實會唔會影響食事前架,即係冇m嘅時候係咪唔可以開始食?定係食事前只係計月經周期,唔計有冇血?因為家計會星期六收早(星期六朝早係嚟m第一日),星期日又冇開,只可以聽日睇,怕聽日睇嘅時候冇曬m就唔可以食事前。本身食事後之前嘅月經日數都係嚟7-8日,而家第二日就已經開始變少,係咪身體出現咗問題,定係因為事後丸嘅影響?

食完事後丸嘅撤退性出血量同埋日數比較少係屬於正常嘅情況嚟嘅,唔需要太擔心。至於事前避孕藥,其實都唔一定要喺月經頭五日嘅時候服用 。通常會建議喺頭五日服用嘅原因係因為係呢個時候身體已經排卵嘅機率比較低,只要喺服用鏡頭七日配合外用嘅安全措施就已經足夠。如果喺其他日子服用嘅話都係可以嘅,不過喺服用嘅頭兩個星期都需要配合外用嘅安全措施,先至可以保證藥物有發揮到作用。所以就算已經冇晒經血都好,你都係可以開始服用事前避孕藥嘅,只係建立藥效嘅時間相對嚟講會長啲,對避孕效果係唔會有任何影響嘅。

今朝打電話去咗家計會預約,要聽日先可以去睇醫生,跟住如果可以嘅話就聽日先可以食事前避孕藥,不過我而家係嚟m第三日,如果聽日冇再流血嘅話,食藥要幾耐先可以建立到藥效,因為4月29號book咗酒店打算同男朋友過夜。因為要月經週期五日內食,但係如果五日內就冇曬血,係咪要食14日先開始有藥效,咁到時候4月29號單係帶套我都會覺得唔放心:face_holding_back_tears:想問下係咪一定要確保有經血嘅情況下開始食事前先可以係7日內建立藥效架?如果冇血,但係又係月經週期嘅第四日食可唔可以係7日內建立到藥效架?又或者得返少少啡血嘅時候開始食可唔可以7日內建立藥效?

我就係太擔心出事所以想開始食事前加帶套,咁樣先可以放心d。但係如果14日先建立到藥效,到4月29號都真係好唔放心,又唔想再出現意外再食事後:face_holding_back_tears::face_holding_back_tears:

Hello 知道你都係好擔心會再出事,要再食事後藥,所以先咁緊張

其實講緊月經周期頭5日開始食事前避孕藥,係計月經周期,而唔係計嚟m有血有幾多日。由你第一日有血嚟m計係第1日,去計5日,而呢5日有冇血係冇關係嘅,所以無論嚟m出幾多日血都同個計法唔關事架。

所以你話你係星期六朝早係嚟m第一日,咁你由個日開始計5日就okay,唔洗理仲有冇嚟m架啦。希望都可以令你放心啲 :heart_hands: :heart_hands:

另外都講少少有關食事前避孕藥嘅資訊比你先,等你聽日去之前都打個底。其實食事前避孕藥都係見咗醫生,睇下身體啱唔啱食,同埋啱食邊款,先再決定點食。而啱啱開始食避孕藥都可能會有唔同嘅副作用,例如不規則出血等等。如果副作用嚴重嘅話,或者副作用持續超過三個月,都有機會係需要轉藥。都有機會會出現身體唔適合食避孕藥,或者有需要要轉過其他藥嘅情況。不過再詳細啲可以你聽日睇醫生嘅時候,再向醫生了解都得。

希望可以幫到你

1個讚

想請問下開始食事前之後,排算「排卵期」或「安全期」呢d野係咪就唔成立架啦,因為食事前之後就會抑制排卵,所以呢d野係咪就唔需要考慮咁多架啦?即係唔需要理排卵期或者安全期先去sex​:face_with_raised_eyebrow:

同埋食避孕藥有冇話唔比同d咩一齊食,又或者食完避孕藥之後食d咩會減低個藥效。食避孕藥之後可唔可以飲酒架,只係飲少少,唔係飲到嘔個種,有冇d咩忌諱?

仲有可唔可以飲茶架?平時習慣咗飲烏龍茶:joy:

Hello~都見到你主要有三個問題,不如我都逐一回覆啦~

Q1) 事前避孕藥要幾時開始食?

A1) 就好似上面同事所講,最理想月經周期頭5日服用避孕藥,而連續服用7日之後,體內嘅藥物濃度先達至足以避孕嘅水平。至於超過咗頭5日食嘅話,都會建議你之後7日如果發生性行為,都做額外嘅預防措施,例如佩戴安全套。

Q2) 食緊避孕藥係咪就唔使考慮排卵期/安全期?

A2) 避孕藥功能之一就係可以抑制排卵,利用人造荷爾蒙,取代自然生理周期,意思即係並唔會有任何排卵期/安全期/危險期。所以如果已經你服用緊避孕藥,咁就唔需要理會安全期。(咁當然做得越多安全措施越保障到自己啦XD)

Q3) 服用緊避孕藥期間,喺飲食上有無咩要注意,會唔會影響到避孕藥藥效?

A3) 現時就無研究顯示日常飲食上有咩要避免,反而係要留意:如果服用避孕藥之餘,同時亦有使用其他藥物,例如抗生素,咁就有可能降低避孕功效,所以都會建議你同醫生講返而家服用緊避孕藥。

另外你問到食緊避孕藥時可唔可以飲少少酒,暫時研究上就無發現飲酒對避孕藥功效造成影響,反而係有機會喺酒醉後忘記按時服用藥物,繼而因為斷藥而影響避孕效果。所以可唔可以飲?係可以嘅~記得要搵辦法提醒自己食藥呀~~

唔該曬,我4月15號開始嚟m,但係而家又有d擔心會唔會係假性月經,去到今日4月20號月經已經開始慢慢冇,變成啡色嘅血,而且我去廁所嘅時候,尿液顏色唔知點解比較深,想問下仲會唔會有機會懷孕架。(4月12號食過事後丸,4月18號開始食事前避孕藥)

你剛剛有月經來,已經證明係無懷孕,唔需要再擔心啦!

1個讚

我見到有d人嚟m之後都仲懷孕:cry:有少少擔心

按你既情況睇,係服食事後藥已出現撤退性出血,所以證明係發揮左效果。不過如果你真係好唔放心,你都可以考慮一下自行驗孕,如果你係服食事後藥後再無性行為,你可以由12號開始計起,性行為11日後進行驗孕,到時結果會比較準確同埋可靠。因為受精卵一般著床需要6-9日,所以如果好擔心的話,性行為7日後已可驗孕,都可以有一個初步嘅結果啊。驗完後就要相信結果呀,唔使咁擔心既~

有樣比較奇怪嘅事,我係4月12號食咗事後丸,之後4月15號嚟m,到4月18號當日下晝開始食事前避孕藥,然後4月18號當晚就冇血,我就以為m完咗,之後用咗護墊,但係到4月19號朝早10點左右,我係出面行緊街嘅時候又feel到有血湧出嚟,結果去廁所一睇,就成條底褲嘅中間位都係血,會唔會有機會真係假性月經。但係開頭幾日嘅血量都算正常,甚至比平時多,而且帶有平時都會有嘅m痛。到今日4月21號已經完全冇血冇啡,咩都冇曬,好擔心仲會懷孕,但係已經唔想驗孕,因為已經嚟m,我只係唔確認呢幾日係咪真係嚟m​:cry:

我頭先去廁所又見到底褲有少少流啡加上個肚有少少痛,即係子宮扯住扯住痛。而我頭先都係唔放心咁驗咗孕,係性行為後嘅第11日,不過唔係用晨尿,其實咁樣係咪就一定冇懷孕,因為嚟咗m加驗咗孕,但係唔知點解下腹會痛,唔知關唔關事前避孕藥嘅事,琴日係食事前嘅第三日,一般係下晝4點食,食完夜晚都會有輕微頭痛。

Hello​:ok_woman:t2:如果已經嚟咗月經,驗孕結果都係陰性嘅話,其實意外懷孕嘅機會極低。明白不規則出血,同埋腹痛呢啲症狀令你好擔心係唔係懷孕前症狀,但其實呢啲症狀喺月經前都會出現,所以我哋唔可以單憑呢啲症狀去判斷自己有冇懷孕。我都相信呢段時間以來,你為呢件事都感到好大壓力,所以如果真係想確保自己冇懷孕嘅話,非常建議你喺醫生或者護士陪同下進行驗孕,例如家計會,或者去醫院,咁結果就會非常準確,而且你都會比較安心~