同女朋友一齊半年多d 本身感情穩定 但係唔知幾時開始佢疑似有焦慮症 成日都驚自己有病 佢本身去開私院睇醫生食藥 自從同佢前仔無套過就驚自己有性病 明明去過hiv檢測做test都已經-ve 佢都仲成日擔心會唔會有hpv or其他性病 身體有少少唔妥就係咁話想睇醫生 驚自己有咩事
我自己有翻pt 人工唔算高 幾千蚊 雖然佢平時翻醫院複診係佢阿媽出錢 但係佢琴日見喉嚨有少少唔舒服 想順便去醫院複診之餘睇埋另一個專科醫生 不過差百幾蚊二百蚊 話驚阿媽擔心所以唔敢問佢攞多兩百蚊 之後就問我可唔可以幫佢出住先 我聽到之後嬲到話佢幾句 話佢我d錢唔係用嚟咁樣俾佢睇醫生 又唔係唔知私家醫院收得貴 之後同佢開始鬧交 鬧完之後佢就冇再問我攞錢 仲要為左講佢幾句呢d小事喊 有必要咩？日日都咁緊張成日話想睇醫生買個安心 唔聽都聽到煩
Hello多謝你嘅提問
都見到因為女朋友嘅情緒，令你地關係出現一啲衝突或者轉變。
首先解答有關焦慮症呢個輕性精神病，一般情況來講，適當嘅擔憂焦慮可以協助個人避開危險嘅處境，亦都促使佢哋解決日常遇到嘅問題。但某啲人會比起其他人更容易產生焦慮反應，焦慮嘅程度同埋持續時間都會比較強烈同埋長，甚至影響個人日常生活。例如，見到你提及女朋友成日擔心自己有病，對於自己嘅身體不適亦都好焦慮，就有機會屬於焦慮症其中一種——廣泛性焦慮症，指經常被恐懼同埋擔憂困擾，而且當事人唔能夠控制自己擔憂嘅問題，亦都不能容忍難以預計嘅情況，並且症狀持續出現超過六個月。
另外有關睇醫生嘅問題，都見你提及因為金錢上面有意見分歧，令你地鬧交。明白你都可能因為自己好努力賺錢，所以希望用係有用嘅地方，對於女朋友突然間問你攞錢嘅做法，你覺得唔熟悉都好正常。其實都好建議你將自己嘅感受話俾佢聽，可能你擔心嘅係，如果佢之後一直去私家醫院睇，就有機會成日問你借錢，咁有機會加劇你嘅經濟負擔。同時都可以表達你對佢個病好似有惡化嘅情況感到關心。
另外，因為可能社會上對於一啲輕性精神病都有偏見，或者唔好嘅睇法，所以當自己意識到自己可能有咁嘅病時都唔會想同其他人分擔自己嘅擔憂，更加會收收埋埋。其實佢呢個時候都好需要你嘅陪伴同埋關心，嘗試多啲聆聽下佢嘅感受啊～明白聽得多一啲負面野，都有機會覺得好煩，或者唔想再聽，同埋唔知點回應好正常，可以試吓就咁聽佢嘅說話先啦，慢慢可以留意佢日常生活嘅轉變，話俾佢聽你留意到佢精神健康出現問題，除咗睇醫生之外，其實仲有其他方法可以治療呢一個病，例如心理治療，例如一啲輔導服務，可以讓專業人士一齊同患者處理焦慮問題，以循序漸進嘅方式面對佢所擔心嘅事，希望患者嘗試從另一個角度思考問題，透過放鬆同學習脫離焦慮嘅感覺，控制情緒。
希望以上資訊幫到你～
(本人擁有由香港心理衛生會舉辦嘅精神健康急救標準課程2023修業證書)