避孕藥非經期出血

食左Yaz大概年半時間,最近兩三個月都會係月經週期後半期出現非經期出血,血量不多,會唔會係隻藥已經唔岩我食?

Hello
的確係有呢個機會啊。因為正常情況地,如果食咗有效嘅避孕藥嘅話,應該只會喺停藥期期間出血,或者係食最後嗰幾粒唔同顏色嘅藥丸嘅時候先會出血。呢啲非經期出血嘅副作用,一般只會喺頭3個月身體未適應到食避孕藥先會出現。如果你已經食咗大概年半時間,依家突然間出現嘅話,有機會會係隻藥唔啱你食,或者都可能係身體出現咗其他婦女病。

其實一般來講,都會建議食開避孕藥嘅人,大約食咗一年左右就要睇醫生做一做檢查,睇下身體有冇咩變化,或者隻藥啱唔啱食。你都可以趁而家呢個機會,去睇醫生了解吓身體嘅狀況,順便可以諮詢醫護人員意見,睇下如果你仲想食落去,睇下會唔會轉另一隻藥,會更加適合自己身體。

謝謝,咁想問下會唔會有其他外在因素都會影響到?例如壓力大、唔夠休息等等呢?

一般來講,如果已經食緊避孕藥,就比較少會因為壓力大或者唔夠休息呢啲情況而出現非經期出血。不過都可能有其他外在因素會影響到,例如可能係因為曾經漏咗唔記得食藥,另一個可能性係有試過唔準時或者不規律咁食藥,亦都可能係呢段期間有同時食其他藥物,而導致咗藥物之間產生相互作用。你都可以睇吓自己呢幾個月有冇發生過呢啲情況。

我前個月試過肚屙補食左粒,所以3月頭應該要黎既月經無黎到,之後去到3月尾個次月經就正常反,中間無非經期出血,直至宜家距離下次月經就有非期經出血,唔知有冇影響?(每日準時規律食藥)

如果係一次半次補藥應該唔係有太大影響,加上你每日係有準時規律食藥,所以正如同事所建議,你應該趁而家呢個機會,去睇醫生了解吓身體嘅狀況,順便可以諮詢醫護人員意見,睇下如果你仲想食落去,睇下會唔會轉另一隻藥,會更加適合自己身體。不竟你已經服用左年半,而且現時出現特別情況,見見醫生作查詢都係好事。