佢話最近好似俾性慾主宰咗自己咁，好容易就諗到sex，係有啲嚴重 影響到生活嗰種
佢同我講 如果可以長期賢者模式就好喇
我又唔知應該點幫佢
但性慾唔係人與生俱來就有㗎喇咩？
其實人有冇可能真係長期都賢者模式？ 
唔該你哋
我有時覺得自己都幾唔稱職 
男朋友有咁多困難，但我又幫唔到佢，唔係一個好嘅女朋友
Hello
好欣賞你哋情侶之間會對於性呢一方面持開放嘅傾談，咁樣可以有助了解大家嘅想法，但喺呢一刻你唔需要太責怪自己先，因為冇人係完美嘅，你男朋友需要嘅嘢唔等同你一定會給予到架嘛，給予唔到都好正常
有關男朋友性慾大到影響生活方面，可能要同你了解多少少係有關啲乜嘢嘅影響，例如會廢寢忘餐，失眠，成日諗住定係點樣？如果有關性嘅問題係有影響到日常生活嘅話，其實都非常建議有專業人士嘅介入，例如搵性治療師。因為如果呢個問題已經為生活帶嚟一啲負面影響，都驚如果唔及時接收治療或者諮詢，會影響精神健康或者身體健康。就例如家計會嘅性生活睇到服務，會由教育主任與有需要嘅伴侶面談，並針對伴侶係性生活上嘅疑難或個別需要，給予知識及技巧上嘅指導及適當建議。所以其實呢一個問題並唔係你或者只係一方導致，責任亦唔喺你身上，性喺伴侶呢一個關係入面一定係屬於兩個人嘅事，所以你同佢傾多啲，或者陪伴佢，甚至係同佢一齊去搵專業人士傾，可能會更有助兩個人嘅關係同埋生活發展。
另外當然性行為同埋平時自慰嘅習慣都會影響性慾。而人類嘅天性就好似動物咁，都會有性慾，只係睇每一個人點樣去處理/搵方法抒發，而同時唔會為自己日常生活帶嚟負面影響，亦唔會影響其他人。當然如果你話有冇人係長期都係賢者模式，咁相信呢個世界咩人都有
不過記住唔好同人比較，因為每個人都係獨特嘅，喺性方面都係，所以可以嘗試慢慢同男朋友去建立屬於自己一套嘅性生活，同時大家都係享受嘅～
有關啲乜嘢嘅影響
好容易就會受到一啲畫面/聲音刺激（例如喘氣聲/見到人哋著得比較清涼或者緊身），之後伴隨嘅就係勃起/分泌尿道球腺液，然後就會因為頂住/焗住而覺得唔舒服
佢話覺得賢者模式嘅狀態係最舒服同埋自在，專注力高啲，諗嘢仔細啲，總之就講到天上有地下無
Hello 咁都要睇吓你男朋友覺得呢啲情況係咪去到困惑日常生活嘅地步啦。因為每個人嘅感覺都唔同，有啲人係會比較容易有性慾，或者比較容易受到刺激。都有啲人會覺得即使容易有性慾或者受到刺激都冇問題，但如果去到一個地步，係覺得好困擾嘅，甚至對日常生活都帶來麻煩嘅話，咁就可能有需要好似上面位同事所講，搵專業人士，例如性治療師，幫手。
而其實所謂嘅賢者模式，正式名叫不應期。其實佢係因為男性達到性高潮，腦內令人覺得開心快樂嘅「多巴胺」都會到達頂點，然之後「多巴胺」分泌會急速下降，取而代之嘅係抑制情慾的激素「泌乳激素」快速上升。所以有啲人都會係性高潮之後就對性慾冇興趣，就好似一個所謂賢者或者聖人咁，有啲人都會變得更加專注，或者頭腦更加清晰。情況都好因人而異，每個人嘅身體都唔同，有啲人可能容易啲達到呢個模式，都可能可以維持咗好耐，有啲人可能維持得好短，甚至冇。
其實如果你男朋友係想專注力高啲，諗嘢仔細啲，都唔一定只係得賢者模式呢個方法。或者都可以試下日常做啲專注呼吸嘅練習，或者近年都多人選擇靜觀，都係一啲令個人安靜落嚟，留意自己思緒同情緒嘅活動。有興趣都可以留意下或者嘗試下啊