Hello, 想請問下因我打避孕針都有兩三次(一個月個款)，但今次我轉返食避孕藥。
首先，我3月18係上一次黎m，因我19/4見家計會姑娘仲未黎m，當時姑娘建議開藥嗰日如果仲未黎m，可以先驗孕再開藥。咁我自己都驗左冇問題冇懷孕就係22/4開藥。
但到今日27/4都仲未黎m，因為避孕藥食21日後停7日會黎m(13/5-19/5)，咁我依家呢段期間會唔會黎2次m
如果呢段期間黎m的話又會唔會影響停藥後個7日黎m呢？
Hello~因為避孕針係超高劑量嘅荷爾蒙藥物，所以一般嚟講停用避孕針之後需要六至九個月先至可以恢復正常嘅排卵。係呢段期間出現月經唔規律，經血量減少，甚至冇嚟月經都係正常嘅。如果你22/4冇嚟月經，但已經開始咗服用避孕藥嘅話，咁喺服用嘅頭14日都需要配合外用嘅安全措施（雖然避孕針嘅避孕效果可能喺你嘅身體裏面有殘留，但係保險起見配合埋外用嘅安全措施最好）。如果等到嚟月經嘅頭五日內先開始服用避孕藥嘅話，咁只需要喺服用嘅頭7日配合外用嘅安全措施。一般來講只要按照指示每日準時服用，食到第21日停藥7日，咁就可以保證避孕嘅功效啦！
至於嚟M嗰方面，呢度會想同你解釋返，打咗避孕針同埋食緊避孕藥嘅時候出現嘅月經，其實叫做撤退性出血，佢唔能夠稱之為月經，係因為喺成個過程裏面身體並冇排卵。之所以會出血，係因為喺停針同埋停藥嘅期間，身體嘅荷爾蒙水平出現巨大嘅轉變。而當身體嘅荷爾蒙水平下降嘅時候，就會刺激子宮內膜脫落，導致撤退性出血。即係話如果身體嘅荷爾蒙水平一直維持喺較高嘅水平嘅話，咁就會導致冇出血嘅情況。首先其中一個可能係避孕針嘅藥效喺你體內仍然有殘留，所以令你體內嘅荷爾蒙水平未能降低，所以冇出血。加上服用避孕藥嘅頭三個月，撤退性出血都係唔規律嘅，可能會出現延遲或者唔嚟嘅情況。而你係由避孕針轉食藥，身體嘅荷爾蒙量較高，同埋持續積聚，所以大機率係出現唔嚟月經嘅情況，但唔會係咁短時間內嚟兩次M嘅。總之～只要你按照姑娘嘅指示每日準時服用避孕藥，咁係唔需要擔心懷孕嘅。至於出血嗰方面，可能要等身體慢慢調整之後，先會有返正常、規律嘅出血🫶🏻