同男朋友一齊咗半年多 呢兩個月性行為開始密咗
但唔係每一次佢都會射
有時係收工後做嘅話佢通常半個鐘就會攰 然後就話停啦
有一次我下面好緊 佢入嚟之後反而好興奮 好快射咗 一分鐘都無
但之後有次係我好濕 佢反而射唔到
雖然佢對住我會硬得起 但我會懷疑係咪自己問題令佢射唔出
而我都好似未試過有高潮 即係無平時自己自慰嗰種快感
唔知應該點解決
想知道對我呢種情況有咩睇法
hello你好啊
明白依個情況令你好沮喪，覺得自己滿足唔對方，同時自己都無喺依段關係中應感到性快感。
性對好多人嚟講都有唔同嘅意義，除咗快感外，亦可以代表就親密嘅感覺，所以你地都可以傾下對性行為嘅期望，例如時間、方式等等，大家都得到快感係一個理想嘅情況，所以唔係淨係滿足對方咖，你嘅感受都好重要！溝通過程中，都可以俾對方知道你嘅感受，包括未試過有高潮等，可以一齊諗下可唔可以有其他方法而得到高潮，例如前戲、口交等。
其實生活習慣、情緒、體力等等呢啲好多都會影響到陰莖嘅硬度同持久度嘅，所以都未必次次性行為都有相同嘅表現，就例如你男朋友因為工作攰，而表現同過往唔同，唔係因為你而導致嘅，唔需要自責！
或者可以試下同佢放鬆下先，例如搵一個大家都舒服嘅空間， 播住中意嘅音樂等，俾對方可以從工作嘅壓力中生理同心理上嘅放鬆。
除咗放鬆外，如果想增強持久力，我地都會建議可以做「斷續刺激」訓練。即喺刺激陰莖到feel到想射精嘅時候就暫停刺激30秒，比佢冷靜下，當想射精嘅感覺減弱嘅時候，再繼續刺激，如是者重複幾次，然後先射精。但記得唔好強迫自己長期完全唔射精，同埋記住訓練係感覺即將射精時停止刺激，而唔係感覺精液要射出時，利用不同方法阻止，例如用手壓緊陰莖或強行擋住尿道口，咁樣會令精液無法排出，嚴重嘅可能會導致尿道、膀胱、前列腺發炎。
除咗陰莖插入陰道外，都有其他形式嘅性行為，可以幫助你得到高潮嘅，依加市面上都有唔同種類嘅性玩具同埋前戲嘅技巧，可以幫到你同另一半獲得快感 ，可以睇下我地instagram嘅post，都有介紹㗎！ https://www.instagram.com/p/CGpLUl2jJW-/
或者都可以同另一半一齊探索大家嘅身體，試下唔同嘅姿勢，了解下對方/自己身體嘅敏感部位，或者自慰時，咩動作、部位會舒服啲咁。
希望以上嘅資訊幫到你！
1個讚