想問下食完避孕藥嘅兩個半鐘後出現輕微肚屙要唔要補食
Hello~因為兩個半鐘頭嘅時間相對嚟講都比較短，唔能夠確定藥物有被人體消化同吸收，所以建議盡快補食一粒，以確保藥效唔會受到影響。
因為我本身唔太確定係咪肚屙，只係特別稀少少，唔至於屙水個種，感覺就係正常大便，但係就比較水少少，咁樣算唔算肚屙
而且量好少，真係一下就冇曬
根據你嘅講法，會唔會純粹係軟便？如果係咁嘅話的確唔算係肚痾嘅
。不過始終單靠文字好難判斷你嘅情況，所以如果想保險啲嘅話都係可以選擇補食。
唔該呀～咁我要點樣先知藥效發揮咗，係咪今日冇奇怪嘅出血就代表冇事
我頭先睇咗說明書，上面只係話食完藥3-4小時嘔吐要補食，而且話係嚴重腹瀉先需要補食，咁我呢種係咪唔算嚴重腹瀉，成個去廁所嘅過程都只係5分鐘左右，而且唔係屙得好爛個種，只係比較軟
因為每個人嘅體質唔同，所以我哋係冇辦法去知道究竟藥效有冇被影響到。如果你真係擔心嘅話就補食一粒啦！
都明白嘅，但係始終每個人嘅體質都唔同，所以其實好多野都話唔埋嘅。如果你最近都冇發生過唔安全嘅性行為嘅話，咁應該唔需要太擔心嘅，就算唔補食應該都唔會有太大嘅影響。不過如果你想求個安心嘅話，就可以選擇補食。
唔該曬，我想知道咁嘅情況對接下來嘅性行為係咪都有一定影響？今日已經係21日中嘅第18日，之前嘅日子都有準時食，只係琴日發生咗類似肚屙嘅情況。接下來兩日都有機會同男朋友發生性行為，不過都會帶套，影響有冇話特別大。
而且我想知道按我呢個情況嚟睇如果真係有排卵日，其實都已經過咗，咁如果我琴日嘅藥冇咗藥效，佢會唔會突然又排卵架？我知道避孕藥係會抑制排卵，如果有d人係最後四五日漏服咗又唔記得補服會唔會突然重新排卵
Hello
因為事前避孕藥係會抑制排卵，一日無食，身體就會回復排卵，如果連續二日冇食，就需要透過補食，維持避孕功效 ，如果連續三日冇食，就會失去藥效，需要重新再食過，加上除咗抑制排卵外，避孕藥都可以改變子宮內嘅環境，令到受精卵唔會着床，所以唔需要太擔心，如果你認為今次肚痾唔係會影響到藥效，當然可以選擇補食，不過見到你都強調會照用安全套，做返雙重保障，咁唔使太擔心嘅 。
1個讚
有個疑問想問下，食完藥應該會係胃同小腸吸收，咁點解肚屙會應該藥效嘅？唔係應該都吸收曬啦咩。
同埋食避孕藥會唔會仲有經前綜合症架？而且會唔會好似之前咁都係嚟m前特別多分泌物。而家距離我到停藥期仲有三日，感覺到下面濕濕地，就好似以前嚟m前咁樣，係咪正常架？唔該曬
Hello~
其實我哋嘅胃部只負責分解食物，吸收都係主要由腸臟去負責嘅～ 肚屙嘅時候，之所以大便會變得多水份，就係因為腸臟無法正常運作，去吸收食物中嘅水份，所以當見到肚屙嘅情況發生，好大機會身體吸收嘅功能係暫停咗，亦都因為咁樣有機會令到藥入面嘅有效成份無法被吸收，從而影響藥效～
至於食避孕藥後會唔會仲有經前綜合症，答案係會架！
因為避孕藥本身係有固定劑量嘅荷爾蒙，但係喺每個人本身嘅荷爾蒙水平同變化週期都唔同，佢喺身體入面造成嘅最終荷爾蒙量都會唔同，所以佢唔一定可以令到荷爾蒙嘅水平超級固定喺某個水平，而當荷爾蒙水平依然有明顯變化，就會產生經前綜合症嘅症狀，但係理論上服食咗避孕藥之後，啲徵狀會明顯減輕～ 同埋如果未係食咗避孕藥好耐，身體可能仲適應緊，就更加可能有上述嘅情況喇～
所以你見到喺嚟M前有特別多分泌物，係好正常嘅情況嚟架，唔使擔心：）
1個讚
男朋友幫我指交完之後我用紙巾抹下體嘅時候，有d粉紅色嘅血，係咪指交嘅時候整損咗所以先會出血，而且冇痛，同埋我想請問下幾時會好返，應該點樣處理？
嗰啲粉紅色嘅血有機會係陰道內壁，或者陰道口有損傷造成嘅出血，如果你感覺唔到痛楚，而且冇持續出血嘅情況，其實受傷情況唔太嚴重。另外除咗冇持續出血，呢幾日都冇覺得痛嘅話，其實受傷嘅地方有機會已經復原。所以都建議如果下一次指交嘅時候，可以使用潤滑劑減低磨擦時造成嘅損傷。
唔該～我想問下高潮嘅時候係咪會牽動到好多肌肉，我感覺自己高潮之後屁股大腿腰同背脊都好酸痛同好攰，係咪正常架？同埋高潮嘅時候子宮會唔會收縮？我feel到自己子宮高潮之後就扯住扯住，全身都好攰好酸痛，就好似比人抽走咗個魂魄一樣，散曬
係呀，之所以你感覺到屁股大腿腰同埋背脊酸痛，係因為高潮嘅時候，恥骨尾骨肌以每隔0.9秒收縮一次，產生反應後，子宮都會以每0.9秒率頻率上下「抖」動(子宮高潮)，所以你會feel到子宮有扯住扯住嘅感覺。而多數女性高潮嘅時間會比男性耐，身體部份肌肉突然喺短時間內收縮，所以都會導致身體有疲倦嘅感覺。再加上性行為時，唔同姿勢嘅轉換同埋郁動，都會使用到身上唔同位置嘅肌肉，所以喺高潮同埋性行為之後，就會覺得成身散左嘅感覺
1個讚
如果我已經食咗避孕藥一個月，亦係第一個月開始食，而家係停藥7日嘅時間，咁第8日開始食係咪就會直接有避孕效果？
因為我食嘅時候，中間有兩日食咗感冒藥，但係時間相距三個鐘，跟住尾四個日又有超級輕微嘅肚屙，相距兩個半鐘，但冇補食，我自己覺得個次唔算肚屙。咁樣係咪第8日開始都會有效果，擔心感冒藥會影響到，跟住下個月又要食7日先再有避孕效果。上網睇又話要食夠一個月先會開始有效果，我自己都唔知道係第幾日先開始有避孕效果
一般嚟講嘅話，只要每日都準時食，keep住食完21日再停藥7日，然後再開新一排呢一個規律嘅話，咁即係啱啱一開始食嘅時候，需要等7-14日俾藥效去建立。之後嘅時間，就算係停藥期間都好，都係可以確保避孕效果嘅，唔需要再等藥效建立。所以回應返你第一個問題，冇錯係已經直接有避孕效果嘅🫶🏻。
睇返你嘅情況，因為感冒藥嘅影響冇咁大，亦都冇咁持續，再加上你之前講嗰次應該唔算係肚痾，所以藥效應該係冇受影響嘅，唔需要再等所謂幾多日先有效果。
1個讚
我今日係停藥期第三日，但係仲未嚟m，家計會姑娘話2-3日就會嚟，我而家好驚。5月7號同8號都有性行為，但係都有帶套，之前食藥都有準時食，會唔會有機會懷孕
睇返你嘅情況，懷孕機率係好細嘅。未嚟月經，應該係因為你食咗避孕藥唔係好耐，身體仲喺調節緊嘅階段，一般嚟講，啱啱開始食避孕藥嘅話，頭三個月嘅月經都係唔規律嘅，所以可以再等吓先，唔需要咁擔心🫶🏻
1個讚