聽人講食避孕藥有好多副作用，係唔係真㗎？
特別擔心會肥同埋長斑
坊間賣嘅避孕藥有冇邊一種比較推薦？
謝謝
Hello 食避孕藥的確係可能會有唔同副作用，但多唔多，甚至有冇副作用，都係因人而異。
首先，係初初食藥頭3個月，可能會有不規則陰道出血、頭疼、嘔心、乳房腫脹、情緒起伏等常見副作用。一般嚟講，呢啲副作用通常都係輕微，係大約3個月後就會消失。有啲人都可能完全冇任何副作用，都要睇返每個人嘅體質。但如果副作用好嚴重，或者過咗3個月都仲持續緊，咁就可能要停止食藥，然後睇醫生，因為可能你嘅身體唔適合食呢隻牌子嘅避孕藥，甚至可能係身體唔適宜食避孕藥。
而例如肥咁，係好多年之前初代嗰啲避孕藥可能都會有食藥初期水腫嘅副作用，而令人覺得似變肥咗，但經過多年嘅研究同改良，一般來講而家大部分市面上嘅避孕藥都冇咗呢種副作用，亦都冇證據顯示係會導致肥胖。至於長斑，的確都有啲人提到自己食咗避孕藥之後會有輕微長班，可能係因為避孕藥係屬於荷爾蒙藥物，因為身體荷爾蒙改變，而導致呢個情況發生，但呢個並唔屬於常見嘅副作用之一。
至於避孕藥嘅推薦呢，因為避孕藥都有唔同款式，例如有分高劑量或者低劑量，亦都有分28、24、21粒裝，都會建議揀之前睇下醫生先，可以睇下自己身體係咪合適食或者合適食邊隻避孕藥，亦可以趁睇醫生個陣了解更多有關避孕藥嘅資訊。
希望幫到你 
1個讚
十分有用嘅資訊，謝謝
請問係咪去睇普通科嘅醫生都可以答到？
係啊，你可以去睇普通科醫生或者自己家庭醫生都可以架啦。
1個讚