Hello~睇返你嘅情況，如果係皰疹或者性病疣嘅話，個水泡應該會有痕癢刺痛嘅感覺，所以暫時嚟講都唔需要咁緊張嘅。不過呢度都會想問吓你最近有冇發生高風險嘅性行為？因為大部份嘅性病只要做好安全措施嘅話都可以避免嘅，而因為我哋唔能夠排除潛伏期嘅因素，所以如果你真係擔心嘅話都建議去做個性病檢測。大部份嘅性病空窗期都係三個月左右，所以建議你可以計返時間，係最後一次性行為之後嘅三個月去做檢測，而係呢三個月裏邊就最好唔好再發生性行為啦！
如果考慮做檢測嘅話，可以選擇去以下機構做免費嘅性病測試。
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒 *
因為最近受疫情影響，建議前往之前，先到相關網站睇下機構有無開～！
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。不過如果未有出現明顯病徵的話，都建議考慮三個月（三個月已經過左大部分性病嘅空窗期）後，再一次過去做一個全面嘅性病檢測，會比較準確🫶🏻
冇 之前同男朋友都有戴套 性病檢測都係陰性
如果係咁嘅話，咁應該唔需要太擔心係性病嘅，加上冇特別唔舒服，所以可以唔需要理會個水泡嘅～因為單憑一張相我哋好難知道真實嘅情況係點，所以如果真係擔心嘅話，都會建議睇返家庭醫生，咁就可以得到最專業同埋最可靠嘅意見啦！