我於4月22日曾發生性行為，當時是採用女上男下的姿勢，到即將完事時，女方動作加快，我感覺到陰莖左側中間位置 (下稱受傷的位置) 有少少痛，不過最後都能夠完事，之後一兩日，當我小便時，如果用力痾埋最後幾滴，就會感覺有少少扯住痛，但排尿是正常的，沒有血尿，去到4月25日，我發覺受傷的位置有一塊大約2cm的腫塊，不痛不痕的，陰莖開始偏向左下方 (我度過，未勃起時偏左十零度，勃起後偏左20度)，無法正面面向馬桶排尿，個人要靠右邊企先可以把尿液射正中間嗰tum水，否則就會彈到周圍都係，性功能亦減弱，晨勃亦消失，然而，4月27/28日晚上 (確實日子我不太記得清楚) 我是有夢遺的，勃起時亦沒有特別疼痛的感覺，與此同時，左邊陰囊連接陰莖根部位置好似多咗一忽肉，有時覺得佢痴住左邊大脾內側，有少少唔舒服，晚上或者久坐後唔舒服的感覺會比較明顯，會唔會係精索靜脈曲張? 而隨後兩星期性功能略為恢復，可以正常勃起，不過由於陰莖向左偏向，所以勃起角度自然亦偏向左邊，硬度及持久度當然亦較以往減弱了，勃起時沒有明顯痛楚，只係將陰莖擺正時間唔中覺得受傷的位置有好少扯住痛，晨勃就時有時冇，而直至目前，排尿，陰莖偏向及性功能情況相若，沒有變好，亦沒有變壞，間唔中覺得左邊恥毛與膀胱連接的位置及左邊大脾內側有少少扯扯地痛，我睇過一個泌尿科醫生，我問佢我個情況係輕微定嚴重，會唔會可以自行復元，會唔會惡化，佢全部答我唔到，淨係話我係陰莖彎曲，一味叫我做磁力共震或者超聲波，嚴重的話要做手術，我問咗價錢，當堂嚇了我一跳，原來磁力共震要成萬幾元，超聲波亦要千幾元，我話如果我唔做會點，醫生竟然話咁就由得佢先，觀察一下睇下情況如何再作打算，大佬，我肉眼都看到偏向及彎曲啦! 短短幾分鐘，乜都冇做過，淨係比佢鍊咗我下體幾下，聽佢9up幾句，咁就收我$850，真係好肉赤! 早知我不如直接約照超聲波啦! 我想問下，我而家會唔會係陰莖硬結症? 情況係輕微定嚴重，會唔會可以自行復元，會唔會惡化? 我真係好擔心，希望有人可以幫下我 
感謝你嘅提問～
感受到你嘅無助，亦明顯感覺到你睇嘅呢個醫生非常幫唔到手 
我哋先嚟睇吓你諗嘅情況嘅常見病徵先：
【精索靜脈曲張】
－ 陰囊有腫脹或硬塊
－ 體感好似袋住一袋嘢咁
－ 冇痛楚
－ 站立時睪丸有沉重嘅感覺，造成不適
－ 訓低嘅時候不適感會暫時消失
【陰莖硬結症】
－ 陰莖上出現可能唔痛嘅硬斑塊；
－ 陰莖彎曲；
－ 出現喺陰莖上側嘅硬塊令到陰莖向硬塊方向彎曲，甚至令陰莖縮短同變形；
－ 陰莖勃起時感到唔舒服或疼痛；
－ 勃起功能障礙
睇你嘅情況，兩種都有啲似，有機會兩種情況都有，亦有機會係更嚴重嘅情況（例如睪丸癌，touchwood），所以都係會建議睇醫生，因為根據唔同嘅嚴重程度會有唔同嘅急切性同埋治療方法，而會唔會可以自行復元同埋會唔會惡化都係要睇返你實際情況
知道你上一次求醫嘅過程令你非常沮喪，但係都係要睇架，係要搵個好啲嘅～ 可能可以上網睇一睇有冇好評如潮嘅泌尿科醫生，或者搵一啲比較出名嘅泌尿科醫生，雖然有機會會貴啲，但係起碼能夠攞到一個比較準確嘅diagnosis，咁起碼可以知道情況、有咩選擇，可以減低憂慮先呀～
希望以上回覆幫到你～
Thank you for your reply，今天 (5月13日) 早上去咗睇政府家庭醫學專科門診，係一個女醫生，佢話暫時睇唔到有任何病理上的問題，亦冇任何水腫、結節、囊腫、息肉、皮疹、細胞增生、潰瘍等問題，叫我不用太擔心，我問佢有冇可能係精索靜脈曲張或者係陰莖硬結症，係咪因為嗰次性行為受傷而導致，佢話呢兩個病目前醫學上成因大多是不明的，不排除是因為陰莖曾受損傷而導致，假如病徵輕微及不影響生育能力，大部份精索靜脈曲張的患者是不需接受治療的，至於陰莖硬結症，其實有部分輕微症狀的病人是可以自行復元的，不過目前情況的確難以預測之後會點，所以佢寫咗封信轉介我去泌尿科排期，最後佢補多了一句，話其實男性陰莖出現少許程度 (不超過30度) 的彎曲是正常的，只要不影響排尿，性功能及性行為就不需接受特別治療，唯一要忍受就係外觀比較古怪，在我看來，呢位女醫生比之前那位泌尿科專科醫生好得多，起碼佢釋除到我部分的疑慮，早知付出$50比$850還更有用，我真係唔去睇嗰位泌尿科專科醫生，虧佢還是香港醫學會副會長，毫無醫德，呢啲私家醫生真係一味想賺你錢，而家我打算觀察一下個情況再作決定，不過我想再問多一個問題，中醫有冇泌尿科睇? 而好似我而家呢個情況，針灸會唔會有用?
你好，首先想回應返你既後續問題，中醫係無分科既，所以無特別分咩泌尿科，而針灸由於都係屬於入侵性治療，以你目前既情況唔建議你選擇針灸作治療方式，你可以先排期政府既轉介，去睇下政府泌尿科等醫生再作評估。
另外，我想再問多係少少資料，想問下你本身有無陰莖側傾既問題？如果無，只係今次受傷後才出現，咁側傾問題似乎係今次受傷引起。根據你所講既情況，除左精索靜脈曲張、陰莖硬結症既可能，似乎更似係輕微「陰莖折斷」（penis fracture），即陰莖海綿體外包覆既白膜撕裂，導致陰莖彎曲變形。
呢種受傷剛發生時，陰莖會彎向傷口既另一側，假設左側受傷會使陰莖彎向右側。而白膜撕裂傷只要經過休息，一半以上的患者會自行復原，不一定會選擇睇醫生，但如果繼續長期疼痛不適，或勃起硬度受影響，就需要就醫。所以如果你唔係好放心，建議你多觀察幾天，如何情況持續，如：疼痛沒有減少、腫脹沒有減退等，你都可能要再睇醫生。不過你千祈唔好俾「陰莖折斷」呢個名嚇親，其實唔係真係折斷，而只係白膜撕裂，所以唔使咁擔心。
不過都提一提你暫時唔好有性行為住，要俾時間自行復原。
Thank you for your reply，我都唔太清楚，畢竟正常的時候係唔會刻意留意陰莖的情況，以我記憶，本身應該係冇陰莖側傾既問題，最明顯係以往站立小便的時候，我係可以正面面向馬桶，尿液係可以直射向中間嗰tum水，但係自今次受傷後就如我上面所講，個人要靠右邊企先可以把尿液射正中間嗰tum水，否則就會彈到周圍都係，而受傷的位置有一塊大約2cm的腫塊，不痛不痕的，陰莖亦開始偏向 (我對鏡照就好明顯感覺到同以前唔同)，所以側傾問題應該係今次受傷引起，我都有諗過可能係輕微「陰莖折斷」，但係我受傷的是陰莖左側中間位置，腫塊正位於該處，現在亦是彎向左下方，而勃起時就偏向左上方，目前我的情況與之前所述相若，陰莖繼續是偏向的，情況沒有惡化，排尿沒有影響，只是影響了排尿的角度，陰莖勃起時的疼痛不適就減退了，近乎是沒有，不過硬度及持久度仍然比以往遜色，而未勃起的陰莖就好似比未受傷前更加軟疲，外觀好似比未受傷前腫咗少少咁，腫塊情況亦相若，不痛不痕，沒有明顯惡化或減退，至於左邊陰囊連接陰莖根部位置多咗一忽肉的情況就依然存在，有時覺得佢痴住左邊大脾內側，有少少唔舒服，晚上或者久坐後唔舒服的感覺會比較明顯，我想問，你話白膜撕裂傷只要經過休息，一半以上的患者會自行復原，咁大概要幾耐? 我自小體質比較差，凡親感冒要比較耐先好返，痰多，有鼻敏感，腸胃比較差，好多時一日要去幾次大便，食嘢唔吸收，slightly underweight，夜晚睡覺很多時有潮熱盜汗，手腳比較凍，總之好撈搞，會否因此減慢了復元進度? 我當然知道要暫停性行為及自慰，咁應該要暫停幾耐?
我之前兩次都用女上位，人咃個個都冇事，估唔到今次只係第三次發生性行為就出事，早知我當日唔用女上位，甚至唔做，就乜事都冇啦! 
謝謝你咁詳細既描述，咁應該係陰莖受傷後出現改變，而且「陰莖折斷」既情況好多時都會係女上男下發生，所以都大機會係，雖然係可以自行康復，不過都明白你既擔憂同恐懼。
首先，情況無惡化係好事代表正在康復中。你話未勃起的陰莖就好似比未受傷前更加軟疲，呢個情況係正常，不竟係受傷，自然唔係之前既狀態。第二，外觀好似比未受傷前腫咗少少咁，腫塊情況亦相若，不痛不痕，陰莖上既腫脹應該係會隨著康復進度而慢慢消退，只要腫脹唔繼續變大就可。至於左邊陰囊連接陰莖根部位置多咗一忽肉的情況，相信都係受傷而引起既腫脹，都會隨康復而消退。
另外，你問到康復過程需時幾耐，呢個都睇個人情況，無一個統一時間，當腫脹同疼痛消除，就表示差唔多康復。不過如果真係「陰莖折斷」，由於白膜受傷後係有機會留下疤痕，康復後係勃起時可能會有緊繃、異物感，亦可能會繼續側傾。
不過由於先前可能錯誤推算情況，都建議你再搵醫生睇下，同醫生詳述你受傷既過程，同受傷後到宜家既進度，等醫生確實係咪「陰莖折斷」，同有無其他治療方法，不竟宜家都係估估下。
至於你話暫停性行為同手淫時間，當然首要陰莖係唔再痛同腫脹，同埋再次有性行為時都唔好有太過激烈既動作，一段時間後就可以慢慢回復正軌。
另外，都想講下你第一次去睇醫生時，醫生可能誤會你有天生側傾既問題，所以佢就建議如果你唔處理就唔使理會。但佢建議你用超聲波和磁力共振黎檢查，其實係正確既方向。
因為白膜受傷係臨床係可以用超聲波和磁力共振來偵測海綿體白膜既受損程度，而白膜受傷治療方式可分為手術及保守治療，如果有內出血或嚴重受損係需要做手術，而輕微受傷就可採用保守治療或自行康復，不過詳情都係需要醫生判斷所以都建議你需要盡快去睇多次醫生。
同埋，根據你講返睇醫生既情況，相信醫生可能都誤會你有天生側傾既問題，你可能都需要強調一下，你本身係無呢個問題，而係受傷後才出現側彎。
Thank you for your reply，我都睇咗唔少資訊，而家最驚係陰莖嘅情況不能復元或者繼續惡化
，而家我見情況冇特別變化，我觀察一下再作決定，第一次睇嗰個醫生我就唔再睇了，當日睇佢我都係好似同你哋傾咁樣詳細講述，但係講咗三分一，佢就已經打斷我，我講明我係受傷後先發覺陰莖側傾及彎曲，佢都冇理會，最根本的問題是，我問佢我而家情況係點，係咩問題，佢竟然話佢唔係睇相佬，而家答我唔到，喂，你身為專科醫生，仲要係香港醫學會副會長，你有咁豐富經驗，點都應該睇到一啲端倪啩？唯一有用就係佢檢查完之後話我好似有少少白膜硬化嘅情況，但係詳細就要做磁力共震或者照超聲波先知，嚴重就做手術，唔嚴重就保守治療，之後出張收據寫嗰個診斷就係陰莖彎曲，大佬，整個過程，佢所講嘅嘢我一早已經查過，我想知嘅嘢佢就答我唔到，咁我點解要睇佢？不如我直接照超聲波啦！大拿拿$850呀！錢就比咗，但係就得唔到我想得到嘅嘢，真係肉赤！反而好似我之前咁講，政府嗰個女醫生仲幫到手
我想再問下，你話康復後可能會繼續側傾，咁即係有機會復發？同埋如果真係要做手術，費用大概係幾多？
睇你都已清楚自己既情況，咁你要好好考慮清楚。
至於呢個，曾經受過傷唔係會有機會復發，而係較容易再次受傷，所以要注意。而手術費用，因為涉及不同既費用，而且不同醫生收費都會不同，你可以嘗試諮詢一下醫生，當然最經濟一定係政府醫院。
多謝你哋嘅回覆，幫咗我唔少，我會睇住自己的情況，有時覺得自己好廢，27歲人，理當正值盛年，但係體質甚至比一啲老人家仲要差，人做愛，我做愛，人哋做幾廿百次都冇事，我就只不過做三次就出事，都唔知講咩好，anyway，多謝你哋嘅幫忙!
每個人嘅體質都唔同，唔需要話覺得自己廢啊。而且其實唔少人都會喺性行為中受傷，或者可能有其他性功能問題或者障礙等等，所以你都唔需要太氣餒。最希望我地可以幫助到你，有需要隨時嚟問都可以呢。 
多謝你哋!