Ps: 因為要清楚講述性行為時既真實情況，描述得小許露骨，感謝理解。
你好
我同女朋友每次性行為時,一直有持續全程帶安全套進行性行為。
而且一直有用app記下月經週期日子,
如果於預計排卵期時進行進性行為，會全程帶套並會體外排精確保安全。
但今次於排卵期時進行了一次性行為（預計排卵日兩日前），雖然有體外排精，但除安全套時感到裏面有潤滑感，
擔心抽插有精液從套旁邊流出。而且因為要體外排精，我係射之前快速抽離開陰道，而沒有捉住安全套的邊緣，但除左安全套裏面有潤滑感外，安全套無移位，仍處於陰莖底部，安全套之後裝水檢查都無破裂。
然後性行為後第5日（同時為預計排卵日既兩日後），女朋友感到非常疲倦，點訓都唔夠。情況一直維持到宜家。
女朋友同時試感到胸漲及有小小痛，但只係一日就無左呢個感覺，疲倦就一直有。
由於都中左兩個超初期懷孕既特徵,我同女朋友都好怕會懷孕。
我知好難去determine yes or no會否懷孕，但以專業知識角度出發，咁既情況懷孕機會會是多少？
感謝！！！
Hello~都聽到你擔心有可能意外懷孕，不如我從「安全套使用方法」、女朋友「身體狀況」同「驗孕」三方面講多少少
關於「安全套使用方法」，如果完美使用安全套，避孕成效就有98%，如果普通使用都有85-92%避孕效果。所謂完美使用，就係指有揀啱自己size嘅安全套，安全套無過期，拆開包裝時無撕爛安全套，佩戴前有撳住儲精囊，排走空氣，使用時無配搭油性潤滑液 (因為會破壞安全套)，然後喺射精後、陰莖變軟前盡快抽離陰道，就為之完美使用安全套
所以如果你有跟足步驟使用，就唔需要太擔心
至於你話感覺到安全套入面有潤滑劑，其實都正常嘅，因為大部份牌子嘅安全套都會含有潤滑劑，同埋你都有裝水做測試，確保無滲漏，所以都可以放心
再講講女朋友嘅「身體狀況」，因為女性喺排卵期間，體內嘅雌激素水平會逐漸上升，所以都有機會感到胸漲、疲累，呢啲都未必係懷孕徵兆。而且其實大部份女性都唔會喺每一個月嘅同一個時間排卵，所以即使用app計算出嚟嘅排卵期都未必準確，不過都欣賞你哋會用app去記低月經周期。
如果你都仲係擔心有機會懷孕，不妨陪女朋友做「驗孕」佢可以喺最後一次性行為後第7日驗一次，會得到初步結果，而喺第11日再做，會得到比較準確嘅結果。因為受精卵大概需要6-9日嘅時間著床，呢個時候女性身體就會大量分泌hCG (人絨毛膜促性腺激素)，而驗孕棒就係測試尿液中嘅hCG含量，所以如果喺第11日驗孕就會得到比較準確嘅結果
希望以上可以解答到你嘅疑慮～～
咁我想補充問多少少。
網上好多文章都講
如果成功受孕，都會好快有疲倦感同嗜睡。
成功受孕後大慨幾耐會出現明顯疲倦感同嗜睡？
感謝！！
另外，我想問下女人懷孕機率係咪會因為隨住年齡而減少？
如果係35+既歲數？
Hello~疲倦同嗜睡的確係懷孕初期症狀之一，但係呢類嘅症狀通常係發生喺懷孕之後嘅五至六個星期左右，所以應該唔會咁快出現嘅。加上懷孕徵兆呢一樣嘢係因人而異嘅。就好似有啲人懷孕會孕吐，食欲不振，但係有啲人懷孕就冇嘔吐嘅情況，胃口甚至好過之前。就算係同一個人，懷第一胎同第二胎嘅情況都可以好唔一樣，所以係冇辦法推測嘅。如果真係擔心嘅話，好似上面同事咁講，驗孕會係最好嘅方法～
冇錯，隨着年齡增長，女性懷孕嘅機率係會降低嘅。不過呢樣嘢都係因人而異嘅，因為懷孕涉及好多方面嘅嘢，女方嘅排卵期，精子嘅活躍程度同埋存活率，雙方嘅體質，年紀，容唔容易受孕等等，都係會影響懷孕嘅因素。除非對方已經過咗更年期，身體唔會再有排卵嘅情況，如果唔係都係會有懷孕機率嘅。
感激
你地一直回答好詳盡