關於陰部痕癢

上一個月嚟M前陰阜同巴氏線呢兩個位會好痕
好似濕疹咁沖完涼就會痕
陰阜位有一點點紅點

因為本身隻手有濕疹
只要嚟M之前濕疹會嚴重
唔知自己陰部痕癢關唔關過敏/濕疹事
定係其他病
有冇人有女醫生可以介紹吓
另外我想問下有咩牌子嘅底褲好著

Hello~好明白陰部痕癢會帶來好多困擾,始終會好唔舒服,所以盡早處理係最好嘅~

陰部痕癢嘅成因有好多:

  1. 念珠菌大量繁殖,造成感染
  2. 濕疹(好似你咁講係有機會嘅)
  3. 接觸到過敏源,所以過敏
  4. 皮膚乾燥,同底褲磨擦得多,所以痕癢
  5. 同皮膚相關嘅性病(例如皰疹)

如果係第一個原因嘅話,咁你可以再觀察吓自己陰部嘅情況。如果除咗痕癢之外,仲出現灼痛嘅感覺,同埋外陰有明顯紅腫嘅情況,咁就應該係因為念珠菌感染,導致陰部發炎,係需要睇醫生食藥處理嘅。

如果係第二個原因嘅話,咁痕癢嘅情況可能會加劇。呢個情況就一定要忍住唔好R,等佢自己恢復。市面上有藥膏可以舒緩濕疹嘅情況嘅,你可以考慮自己嘅情況購買。

至於第三個原因嘅話,可以頻密啲咁更換底褲,衣服,床單同被單等貼身嘅物品,同埋要有每日清潔性器官嘅習慣。有人會習慣幾日都係着同一條褲出街,跟住先至洗嘅。但係因為香港天氣比較熱,好容易會焗左啲汗喺條褲裏面,keep住着幾日嘅話就好容易過敏。所以千祈唔好咁做呀!

第四個原因嘅話就好depends on你最近有冇發生高風險嘅性行為,同埋對方有冇性病。通常皮膚類嘅性病,性器官都會出現水泡,或者紅色一點點嘅肉粒。你可以再留意吓自己嘅情況,如果出現以上病徵嘅話,咁就有機會係性病。你亦都可以選擇喺距離最後一次性行為之後嘅三個月(因為大部份性病嘅空窗期都係三個月左右)去進行性病檢測,如果check過冇事嘅,咁就可以安心啦~

至於女醫生同埋底褲牌子,我哋呢度就真係冇推薦啦!始終唔同人唔同感受嘛!不過底褲方面都建議購買純棉吸汗透氣嘅材質,同埋盡量揀親膚嘅面料,咁就可以減少感染同埋敏感嘅機會🫶🏻