好後悔自己把持唔住 尋日第一次去左搵一樓一
佢有幫我帶套口交同性交 係用唔同新套既 不過個套係佢自己 唔知質素係點
去完個晚 唔知點解覺得成身都唔舒服 覺得個身好痕
好擔心會中性病/aids
我係咪應該要檢查下 係咪要等3個月先會準 而家去檢查有冇用？
Hello你好啊
明白會有擔心啊,係到解釋多少少先。
首先，性病主要嘅傳播途徑透過體液，例如精液、腸液、尿道球腺分泌（Pre-cum）、陰道分泌、血液，接觸過身體比較薄嘅黏膜組織，例如肛門、口腔、陰道，或者傷口就有機會傳播到病毒。
所以有用安全套，性器官冇直接接觸，傳播風險係好低嘅。即使感染到性病，亦都唔會第二日就咁快有病徵嘅。
而即使你未必清楚個安全套嘅牌子係咩都好，其實都有一啲步驟可以檢查到安全套係咪安全可靠，例如可以留意下包裝上邊有冇過期日，如果有嘅話可以留意吓過咗期未、亦都可以留意吓安全套有冇足夠嘅潤滑劑，或者喺結束之後做一啲到水測試，睇吓有冇穿漏嘅情況。如果真係擔心嘅話，都會建議自己去可靠嘅商店購買，可以留意埋尺寸係咪適合（歐美/香港牌子通常計闊度，即係充血陰莖根部圓周除2，而日本牌子多數計直徑，即係充血陰莖根部圓周除以3.14），到時用返自己嘅安全套就更加放心。
如果真係擔心嘅話，你都可以考慮喺有可疑嘅性行為之後三個月進行性病檢測。你可以去私家醫療服務中心或者衞生署社會衞生科診所進行測試。唔同嘅非政府機構，例如關懷愛滋、香港善導會水銀星三號、香港愛滋病基金會、再思社區健康組織等等都有提供性病測試。而因為性病係有空窗期的，即係由感染性病去到能夠檢測到病毒嘅時間。而潛伏期就係有感染性病到出現病徵嘅時間。一般性病嘅空窗期都係三個月內，所以就算真係感染到有性病，而家即刻去驗都係冇咁快驗到嘅。所以如果擔心嘅話，都可以喺三個月之後去相關機構做個詳盡嘅性病檢查，去之前，可以留意吓需唔需要打電話預約，同埋留意吓自己身體狀況，下體有冇出現紅腫、痕癢或者痛。