點算,真係好驚有左

上次嚟m第一日係4月8,嚟完之後4月中同男友做過,嗰次口完佢射完就入左我度,無套的,上個星期一都無套做過,應該話一直都係無套…,講返嚟先,我今個月仲未嚟m,依家都已經20號…好驚有左…雖然都應該會話我驚點解唔帶套…依家日日都有分泌物,仲有唔知點解肚痛痛地+少少肚痾,但就係未嚟m,雖然之前都會遲左嚟,都算唔穩定,但我好驚今次真係有左…有睇過嗰啲講懷孕先兆文章…加上我冇膽去買驗孕棒…又唔敢叫男友去買

Hello~ 先解釋返懷孕風險,你呢個情況嘅懷孕風險係中高嘅,因為:

1)喺性行為發生期間,陰莖係性興奮時會流出透明嘅尿道球腺液,尿道球腺液有機會含有少量精子,所以如果無套發生性行為,尿道球腺液直接接觸到陰道,都係會有懷孕嘅機會;

2)同埋,你4月中果一次性行為,男友喺射精後就進入咗陰道,如果陰莖上面有殘留嘅精液,精液本身有大量精子,咁懷孕嘅風險亦會增加
3)唔知道你過往無套嘅同時係有冇內射,或者好趕好趕先拔出嚟體外射精,如果有嘅話,懷孕期風險都會大大增加

至於你而家分泌物增加,加上未嚟月經,呢啲都可以係早期懷孕嘅徵狀,但係唔係話有呢啲徵狀就一定係懷孕,所以如果有憂慮,最好都係驗孕~ 只要係喺性行為嘅7日後驗孕,已經可以睇到初步結果,11日後驗嘅話就好準確,咁起碼可以確定係有定冇,唔駛心慌慌~

見到你話唔敢去買驗孕棒,如果係覺得喺門市購買好尷尬,可以選擇網購,咁起碼唔駛驚人哋知道或者驚見到一啲令你唔舒服嘅反應,而驗咗之後都可以有一個清楚明白嘅結果~

最後,都會建議你以後採用返安全措施,如果唔想戴套,其實都有第啲嘅選擇例如避孕藥、避孕針、子宮環等等~ 不過要提醒返,呢啲方法無法防止性病感染,同埋亦都唔係每個人都適合使用,如果想試,記得先問下醫生意見呀~