hello 大家好,我前嗰排流黃綠色分泌物去睇醫生種菌，驗到有大腸桿菌，咁醫生就淨係開咗抗生素，食咗大概7至8日左右，而家去廁所流嘅分泌物通常都係正常白色，加上有啲黃色一粒粒嘅分泌物，有冇人話俾我知係咩嚟？
*而且我通常而家會用紙巾由前邊抹去後邊，沖完涼都會用紙巾或者風筒吹乾(之前用毛巾抹)
但係有一樣嘢戒唔到口，就係平時早餐會食五香肉丁米，
請問會唔會有咩影響？感謝大家
夜晚食完羊肉，又係黃綠分泌
Hello
睇你文字嘅描述有機會係再次感染大腸桿菌，或者係感染咗滴蟲性陰道炎阿。
首先講咗大腸桿菌先，主要係會導致尿道炎，另外唔安全嘅性行為或者性行為後冇妥善清潔，不良嘅衛生習慣例如飲水量不足，經常忍尿，都有機會感染尿道炎。除咗會有黃綠色嘅分泌物之外，仲有機會伴隨其他情況，例如小便時會覺得痛，尿液混濁，而且味道濃烈，經常尿急同埋下腹痛等。大多數情況只要完成整個抗生素療程，配合良好嘅衛生習慣，飲多啲水，就會康復。
其次滴蟲性陰道炎，主要由寄生蟲—滴蟲引致嘅性病，所以性行為係最主要嘅傳播途徑。佢嘅病徵包括，陰道出現黃綠色分泌物，陰道周圍會感到灼痛同發炎等。但值得留意嘅係，好多人感染嘅時候都未必會有病徵。但佢同時都係可以根治嘅性病，只要完成整個抗生素療程，喺治療期間停止發生性行為，都可以康復。
因為尿道口同陰道口都比較接近，所以好大機會細菌交叉感染，又或者係發生性行為嘅時候，對方傳染俾自己。所以都建議可以返去複診，檢查清楚分泌物異常嘅原因係再次感染大腸桿菌，定係感染其他病。至於食物方面，一般痛感染尿道炎/陰道炎冇直接嘅關係，如果醫生都冇特別提及要戒口嘅話，其實並無太大嘅影響。