小妹20 男朋友22 一齊左一年 感情一向都唔錯 佢都好錫我 好珍惜我 係我拍過幾次拖入面真心對我好嘅男仔
但問題係 男朋友一直都覺得我有焦慮症 我自己都覺得有唔妥 但其實佢唔知我真係有 仲要係GAD 而我之前係搵一個讀心理學master嘅師姐求救 聽完我嘅症狀之後佢都覺得我好大機會有GAD 建議我去搵cp或者精神科醫生 自從嗰日之後 當我有少少焦慮症狀出現 我對住男朋友都係講笑嗰種 諗住一笑置之 始終唔想男朋友同埋屋企人擔心 所以見自己都已經成年 大個女 自己去公立醫院睇醫生 暫時未開藥住 淨係見左cp做評估
而呢幾日唔知點解好抗拒同男朋友一齊嘅時間 尤其係做嗰方面 佢之前有個拍左唔夠一個月嘅ex 有戴套做過幾次 呢個本身同佢一齊之前我已經接受左 因為我之前都有試過同ex戴套做 但係呢幾日每次想像佢同佢個ex做嘅畫面 我就好反感 好唔想見到或者想像 每次一諗起 啲焦慮嘅症狀又開始作怪 甚至係唔想見到男朋友嗰種心態 每次佢攬我 錫我 我都想搵藉口推開佢 而且有時候會好自卑 覺得自己襯唔起佢 有想分手念頭 點解會咁。。。心好亂
Hello 好多謝你相信我哋，願意同我哋講你嘅情況，都知道你自己都唔想出現呢個情況，又唔知點算好。
都知道，有時可能有一啲情緒困擾會唔想話比任何人知，可能係唔想其他人擔心，唔想煩到人，或者驚俾人覺得自己係咪有咩問題，唔想俾人覺得自己係比較特別，唔想好似會接受一啲特別嘅待遇之類，所以都未必想俾人知。所以如果你唔放心或者唔想話比人知嘅話，都係冇問題。
都理解你可能會介意你嘅伴侶嘅一啲性經驗，可能係本身自己個人界線未真係接受得到，亦都可能係導致一啲焦慮症狀發作。喺呢方面，你都可以考慮同你嘅伴侶講清楚，講吓你最近嘅感受，或者暫時停止有一啲非常親密嘅性接觸先，俾啲時間你先。睇下處唔處理到呢個關口位，真係處理唔到呢個關口就可能要一段更長嘅時間再思考下你同佢嘅關係。
不過，你都唔需要覺得自卑或者襯唔起你嘅伴侶，你嘅伴侶揀咗你，就代表你有好好嘅地方，你嘅伴侶都係受你吸引，唔需要諗到自己好差。而且都唔需要諗襯唔襯，畢竟你嘅伴侶都愛你，都選擇咗同你一齊。
希望都幫助到你，真係諗唔到點算都歡迎你嚟搵我地傾呢。 