預計潛水trip會撞上經期

嚟緊6月17號至23號會去潛水trip。一直有食開事前避孕藥,咁啱4月停咗藥,上個禮拜六嚟M聽日就會開新一包避孕藥食。但係我計咗我食避孕藥嗰陣時已經第四個禮拜,即係開始嚟M,咁應該要點算好,仲應唔應該開一包藥食?定係唔開直接食催經or延經藥食?thxx

sorry上面講得有啲唔清楚,即係第四個禮拜嗰陣時開始嚟M,咁啱撞咗去潛水既日子,係咪應該食完呢個月嘅藥之後直接開新一包藥,繼續食落去唔好停?

Hello~如果你想延遲經期,可以喺食完21粒有藥效嘅避孕藥之後,唔停藥,直接開新一盒藥繼續食,直至你想再次嚟M先聽藥。

其實避孕藥係一啲含有高劑量人造荷爾蒙嘅藥物,身體通過吸收人造荷爾蒙,抑制排卵,增加子宮分泌物嘅黏稠度,同埋改變子宮内璧嘅環境,從而達致避孕嘅功效。如果一直服用含有人造荷爾蒙嘅避孕藥丸,身體就會維持喺好穩定嘅荷爾蒙水平;而當你停藥,或者服用不含人造荷爾蒙嘅避孕藥丸時,身體嘅荷爾蒙水平就會改變,呢個時候就會有類似月經嘅出血現象,學理上稱之為「撤退性出血」。

理論上只要你持續服用含有人造荷爾蒙嘅避孕藥,月經就一直唔會嚟,直至你停藥為止,所以你可以睇返你食嗰款避孕藥,如果有非活性避孕藥就唔需要食,直接開新一包避孕藥繼續食有藥性嘅藥丸,直到你想再嚟月經。

不過留意返因爲今次唔係按正常指示服用避孕藥,所以可能會影響之後嘅經期,同埋身體都有機會出現唔同嘅副作用,所以都建議喺完成延遲經期之後,先停藥一段時間,避免因為身體持續吸收人造荷爾蒙,導致之後有流啡嘅情況。你亦記得要注意一下自己嘅身體狀況哦~