急!避孕套甩咗

頭先同男朋友做做下期間 懷疑因為帶安全套之後落太多潤滑劑 女上男下嘅時候佢內射咗 但係佢攞返出嚟嘅時候發覺安全套唔見咗 原來卡住咗喺陰道入面 仲要成個安全套捲埋一齊 好驚 諗緊食唔食事後丸好 不過之前月經周期一向都好準時,預計會喺今個月30號左右嚟M 但係如果喺嚟M前七日食事後丸會唔會有反效果或者對身體有咩影響 加上自己有甲亢 如果今次食事後丸 已經係半年內食第三次 會唔會對身體有嚴重影響?急!

補充返 正常今次黎m應該係28-30號
同埋想問家計會啲醫生會唔會見我有甲亢而唔開藥:face_holding_back_tears:唔係太想用其他避孕方法

Hello~明白你擔心再食事後丸會唔會對身體有大影響,不如我都講多少少俾你知:raised_hands:t2:

「事後丸」係利用大劑量嘅人造荷爾蒙抑制排卵,或干擾受精和影響着床過程,所以無錯,身體係會受到影響,例如月經會提早/延遲嚟。假如你身體依然好規律,今個月30號嚟M,咁你應該啱啱排完卵,身體都係處於高機率懷孕嘅狀況,所以如果你唔希望懷孕,都好建議你盡快向家計會等機構求助,服用事後丸。

至於「甲亢」其實係甲狀腺荷爾蒙分泌過量嘅一個病狀,而事後丸係高劑量嘅人造荷爾蒙,有可能會影響到你嘅病情,所以都建議你諮詢醫生意見,睇返身體狀況適唔適合服用事後丸。

你亦講到已經係半年內第三次服用事後丸,短時間內多次服用會對身體造成唔少負擔,如果對上幾次都係安全套鬆脫,避免懷孕而服用,咁下次性交時切記三點:(1)選擇合適尺寸嘅安全套;(2)配戴安全套前按住儲精囊,避免囤積空氣,令安全套喺性交期間穿破;(3)男性射精後盡快將陰莖抽離陰道,因為男性射精後陰莖會逐漸變軟,安全套有機會滑落。

希望以上資訊可以提供到啲想法俾你:raised_hands:t2::raised_hands:t2:

頭先去左家計會食左藥了:pray:t2:

Hello 因為你半年來都食咗三次事後藥,再加上你都有甲亢呢個情況,所以都會有機會會影響到事後藥嘅功效,所以都可以考慮驗一驗孕去確保真係冇懷孕。咁一般嚟講,喺性行為之後7日驗孕就會有初步結果,性行為11日之後驗孕就會有準確嘅結果,你都可以睇下有冇需要,可以去可靠嘅個人護理商店或者藥房買驗孕棒係相關日子驗孕。

同埋呢排都可以留意下自己嘅身體,因為你都喺半年內食咗三次事後藥,再加上甲亢問題,都可能會有一定嘅副作用(當然都可能冇副作用),例如嚟緊幾個月嘅月經周期都未必好準時、陰道可能會有不規則出血、乳房脹痛等等。如果真係好嚴重嘅話,就建議睇醫生同返醫生講你嘅情況啦。

最後,如果間唔中都可能有一啲唔安全嘅性行為嘅話,其實食事前避孕藥都不失為一個好嘅方法,可以避免到懷孕風險(畢竟都唔建議成日食事後藥作為恆常避孕方法)。不過甲亢嘅問題的而且確係會影響到荷爾蒙避孕嘅方式,包括事前同事後避孕藥都係,所以如果真係想食嘅話,最好都睇咗醫生諮詢一下意見先。

你意思係事後丸會冇藥效?:disappointed_relieved:
但係當時問醫生甲亢會唔會影響藥效 佢話唔會同埋唔關事 加上而家甲亢嘅病情同埋指數都正常

??

唔係會變咗冇藥效,只係藥效有可能有機會會受到影響而下降咗,特別係你半年內都食咗3次事後藥,但都唔會變到冇效。不過因為我地都唔清楚你仔細嘅身體狀況,都未必及醫生咁清楚個情況,所以你都可以相信醫生所講呢~

明白 同埋想問嘅係 因為個姑娘叫我食完之後落去樓下食少少野 想問如果食完事後丸 去咗樓下便利店買飯糰同埋牛奶 而且係食完事後丸之後嘅四至五個鐘頭後食唔辣嘅咖喱 會唔會影響藥效?

仲有就係想問 如果我有甲亢 但係上年喺空窗期後做快測(因為關懷愛滋fully booked 所以我去左choices同埋社會衛生科 choices四個性病檢測結果係-ve;社會衛生科仲未有通知 而且冇抽血 只係檢查陰道)如果choices佢用血液檢測 甲亢會唔會影響到檢測結果:cry:

:cry:

首先回應返你既問題,呢啲飲食係唔會影響事後藥既藥效既,所以可以放心。

另外,甲亢係唔會影響性病既檢測結果,要明白性病係由病毒或細菌感染造成,唔會因為有甲亢而檢唔到啲菌,相反亦唔會因為咁而令到有呢啲菌。

請問如果今個月24號食事後丸,本身如果個套冇甩正常應該呢幾日黎m,但係想問如果喺原定黎m前幾日或者一個禮拜前食事後丸,正常大概會遲幾多日左右?因為feel到乳房有少少漲痛,掂乳頭附近位置係痛痛地

事後丸其中一個副作用係會令下一次月經提早/延遲嚟,至於會提早幾多或者遲幾多日嚟,呢個真係冇辦法準確答到你,只要月經唔遲多個三個星期來,基本上就冇乜問題。而且事後丸嘅副作用都包括乳房脹痛,腹痛,頭暈,頭痛等,所以你身體出現嘅情況都屬於正常~