我一直好自豪搵到個好close好夾嘅男朋友，互相唔會發大家脾氣，只係試過小小鬧交佢唔覆我，第二日就和好。
但經過一次冷戰之後我一直返唔到去，就算而家佢照舊對我好，我都一直諗起個日，覺得男朋友唔再鍾意我嘅個日。
自問一直都好好脾氣，但得失感好重，會因為男朋友冇講早抖之類嘅小事唔開心。個朝早因為咁，同男朋友講多咗兩句去表達我會因為講講下野唔見咗佢所以不安，或者佢覺得我責怪緊佢，就無應我。我情緒突然變得唔穩定，因為佢正正做緊我最介意嘅事，就有啲嬲咁質問佢點解要咁樣。
當然有反效果，佢一直都冇再回應，我第二日猶豫好唔好再主動，猶豫到第三日終於受唔住。
最後當然有和好，佢變番以前咁，又氹我又抱又錫。但一諗起當日，我表達完我嘅情緒佢都完全唔理會，就覺得佢好忍心，可以由得我自己內心崩潰。乜鍾意一個人真係可以做到咁忍心，放任佢自己唔開心咩？佢真係鍾意我？定係我唔搵佢就當冇咗個女朋友，根本就冇咗我都得？
我困惑嘅位只係呢一日，一齊咗咁耐其他日子其實都感受到佢嘅熱情同錫住我，見到我會變番個小朋友咁嗲我。
我想同佢溝通，問清楚點解個日唔肯主動關心番我，但我驚又跌返落上次個陷阱到。
Hello~見到你都好緊張呢啲關係，希望可以同男朋友冰釋前嫌，我都認同你嘅講法，你哋需要一個好好嘅溝通
我留意到你男朋友可能未必善於回應你嘅感受，或者處理爭執，你亦提到你係帶住情緒去質問佢，所以佢有可能因爲唔想傷害到你，而選擇用逃避嘅方式處理。
我認爲你都可以嘗試用「非暴力溝通」嘅方式展開你哋嘅對話，你既可以表達到你真實嘅諗，又唔會被情緒掩蓋，令佢可以好好接收你嘅説話
當中都有三個步驟嘅：
(1) 「觀察而不批評」，好陳述性咁講返你留意都嘅情況，例如話「我留意到你有時會off-line，可能隔一段時間先再覆機」；
(2)「表達感受」，記得係表達感受而唔係發泄情緒哦~例如話「平日有你喺我身邊，我真係好開心，所以當我聯絡唔到你嘅時候，我就會有啲焦慮不安，會唔開心」；
(3)「表達需要&提出請求」，有時我哋真實嘅心意會被情緒蓋過，令對方理解唔到我哋真實嘅需要，所以我哋都要好好咁講出其實自己需要啲咩，例如話「我希望你可以讓我知道，可能你有事忙緊，或者需要一啲空間，咁我收到之後就可以放心，唔會再胡思亂想」。
希望你都可以嘗試用呢個方法，再一次表達你嘅感受，因爲一段感情中好需要溝通，我相信「非暴力溝通」呢個方法可以幫助到你哋嘅
多謝你
會試下搵個啱嘅時候講。
其實最confuse係本身好相信佢係真心，因為見面嘅時候好熱情，訊息上就正常啦，其實已經冇一開始一齊嘅時候咁熱情，不過我都明會慢慢平淡。
但諗起呢次冷戰就覺得…都有機會係冇咁鍾意所以先唔care…… 我都唔知佢唔主動搵我先反而係等我再搵番佢，「唔想傷害到我所以逃避」會唔會只係一個我俾佢嘅藉口…？
後來和好後又變回正常，最confuse係呢點，想知道個原因。唔知應唔應該直接同佢講，我會feel到呢個感覺？定係唔好提「我曾經覺得佢已經冇咁鍾意我」好？
Hello 關於呢個問題，呢層都要睇返你哋嘅關係同你哋嘅相處，同埋你自己內心嘅想法。如果你真係覺得屈住係心好唔舒服，好想知原因嘅話，都可以搵一個啱嘅時機同空間，好好咁同對方冷靜咁溝通，記住都盡量唔好帶有好強烈嘅情緒。你都可以表達返，當對方冇搵你，要你主動搵對方嘅時候，你覺得唔開心同不安嘅感受，會令你好驚對方係咪唔再鍾意你。之後都可以向對方表達你唔係想責怪對方，但都好想了解返對方會唔會有咩原因冇主動搵返你。
其實有陣時對方喺冷戰之後冇主動搵返人都可能有好多原因，例如可能對方自己都唔清楚點處理，又或者可能因為面子、自尊等問題，唔想做主動搵返對方，都有啲人可能係因為覺得係對方做錯事，所以要等對方道歉或者等對方主動搵返自己先。當然原因有好多，呢度就講唔晒。
呢啲原因都未必係代表呢段關係中已經失去左愛意，只係可能大家嘅相處方式或者處理問題嘅方式有唔同。其實每一段關係都係非常獨特，大家其實都係喺一段關係之中不斷咁學習如何相處，所以有時出現呢啲咁嘅磨擦或者情緒都係非常正常，亦都係好多人會係段關係之中會面對嘅問題，呢個時候就係好需要大家溝通同埋磨合啦。