每次同女朋友性交個陣，每次進行時都會戴安全套同用水性潤滑液(會塗抹係安全套表面同陰道口，都會幫佢自慰再用手指(同手指安全套)加水性潤滑液慢慢插入去令佢慢慢適應，然後再用正常位進入，入少少再停一停，然後再慢慢進入，但入嘅時候佢都會好痛，但進入到深處之後佢又會話冇咁痛，但係好多時完事之後佢去廁所都會有淺粉紅色分泌。
性交頻率差唔多就一至兩個月先會有一次，到目前為止經驗次數應該少於10次。每次做佢都有好大陰影，又會痛又會出血，所以我都唔知到底係自己邊度做得唔好，有人話正常位係應該向下插，我試過正常打直插同向下插都係冇改善，都試過用勁多潤滑液，但個情況都係冇改善，差唔多每次做都係會有淺粉紅分泌物。有一次做完之後發現有血絲流出，然後隔大約一個星期去左睇醫生，然後發現子宮頸發炎。
想問下呢種性交痛問題可以點解決?因為已經用左好多方法都解決唔到。
同埋想知道點解會導致有子宮頸發炎呢個問題?係女性身上常唔常見?會唔會自己康復返?會唔會再復發?係唔係因為性交所以有?同埋有冇預防方法? 唔該曬各位義工。 
Hello~明白女朋友呢個情況係會令你好心痛嘅
。睇返你哋嘅情況，女朋友性交嘅時候會覺得痛，比較大機會係因為前戲唔夠，身體唔夠放鬆，陰道keep住收緊，就會覺得痛。雖然見到你會用手指幫女朋友自慰咗先，但係因為前戲係有好多因素影響嘅，當時嘅氣氛、說話、氣味、燈光等等都會有影響，因為呢樣嘢係同人嘅喜好有關，所以可能需要同女朋友傾吓，睇吓點樣做佢會放鬆得多啲。舉個例子，有啲女仔對於視覺刺激比較敏感，咁就可以試吓一度睇av一度做，同樣地如果係對聲音比較敏感嘅話，咁就可以試吓播催情/激情嘅音樂
因為正常嘅情況下女性係進行性行為嘅時候，陰部會分泌愛液，作為潤滑嘅作用。加上本身安全套上面多多少少都會有潤滑液，所以其實係唔需要用咁多潤滑液嘅。有時用得太多潤滑液，反而會因為太滑，缺少咗磨擦抽插嘅時候產生嘅性刺激同埋快感。所以可以利用前戲令對方陰部分泌足夠嘅液體（即係對方夠濕），先至插入去，有卡住嘅感覺先至加少少潤滑劑作為輔助。
至於子宮頸發炎嘅原因有好多，有機會係因為你哋用緊嘅呢隻潤滑液，裏面嘅某種成份損害咗陰道自然酸性嘅環境，令到念珠菌或者細菌大量繁殖，最終導致發炎。老實講，市面大部份嘅潤滑劑都唔適合大量使用（就算你用日本或者海外嘅牌子都一樣），多多少少都會對女性嘅陰道產生刺激。如果有需要嘅話，建議去返專業嘅性用品店購買純天然嘅潤滑劑。詳細嘅注意事項可以參考以下網址：辦事愛用潤滑液！潤滑液使用6點須知 - Hello 醫師
當然潤滑劑只係其中一個原因，仲有可能因為你幫佢手交嘅時候刮到佢陰道嘅內側，導致細菌感染同埋痛楚。亦都有機會係因為平時冇清潔性器官嘅習慣（男仔要清潔包皮內側，女仔要清潔帶小陰唇），所以令到細菌繁殖。所以其實因素係有好多嘅，需要俾啲時間一一排除。至於你問子宮頸發炎喺女仔身上常唔常見，其實係常見嘅，因為香港天氣炎熱，有陣時出汗焗住成日，都會有較高嘅風險導致發炎，所以唔一定因為性交。如果發炎嘅情況比較輕微嘅話係可以靠自己恢復嘅，但係如果情況嚴重，例如下體出現痕癢灼痛，或者分泌物異常（例如出現豆腐渣狀，有魚腥味嘅分泌物）嘅情況，咁就需要睇醫生，使用抗生素先至可以好返。
亦都好似我上面咁講，發炎嘅因素有好多，所以係有機會復發嘅，要預防就係要排除上面對陰道不利嘅因素，同埋做好日常清潔，特別係性行為前後，接觸性器官之前記得做好清潔，避免手／指甲污糟導致感染🫶🏻。