需要食事後?

每個月嚟M都唔準,每次都遲一至兩個禮拜。對上一次嚟完M係5月9號,5月23先有性行為。一開始冇戴套入咗少少(入咗1/3),15秒後攞返出嚟戴套再入,因為仲係頭幾次,過程淨係好小好小福度咁郁,因為有啲痛,1分鐘就出返嚟,完全冇內射。之後就冇再入過。想問咁嘅情況下需要食事後?驚嘅係冇戴套入嗰下。

Hello~首先,喺性行為發生期間,陰莖係性興奮時會流出透明嘅尿道球腺液,尿道球腺液含有少量精子,所以如果尿道球腺液直接接觸到陰道都係會有懷孕嘅機會。

雖然懷孕嘅機率唔高,但係如果想保險啲嘅話係可以考慮食事後丸嘅。不過需要提提你,事後丸喺香港屬於醫生處方藥物,係需要去指定嘅機構,例如家計會,公立醫院急症科,或者私家診所先至能夠攞到。而事後丸有分兩種:性行為後72小時或120小時內服用,如果家計會醫生認為你嘅情況適合透過事後丸緊急避孕的話就會處方俾你,而喺處方下食咗事後丸的話會意外懷孕嘅機率係好微嘅,所以唔需要太擔心。不過,因為事後丸係一個月經周期內,最多只能夠食一次,所以家計會嘅醫生通常都會建議食藥後直到月經嚟之前都盡量唔好發生唔安全嘅性行為。而且服食事後丸之後都有機會出現唔同嘅副作用,亦有可能會影響下一次月經嘅日子同血量等等,所以如果選擇服用嘅話都要做好月經會被擾亂嘅心理準備。

如果你真係好擔心嘅,無論最後選唔選擇食事後丸都好,都可以考慮驗孕。因為驗印係唯一準確嘅方法去測試身體有冇懷孕。驗孕其實係檢測身體有冇hCG呢種卵子受精著床之後身體先會產生嘅荷爾蒙,而卵子受精、受精卵著床需要大概6-9日時間,所以性行為7日後驗孕會有初步結果,而11日後驗孕就會有相對準確嘅結果。你可以睇返最後一次發生性接觸嘅日子,計算返日期驗孕。

希望以上嘅資料幫到你🫶🏻