平時係隔33日左右嚟M，上次嚟M已經係3月11日，跟住喺3月25日男友隔住內褲頂咗幾下(內褲有濕)，到宜家都未嚟M，近兩個月都壓力偏大，前幾日有食一D類似調經嘅藥。今日有試自慰，通常係外面，中途入去feel到有血但唔多，而且鮮紅，係咪快嚟M?
Hello你好啊
首先喺上一次嘅性行為中，性器官無直接接觸，懷孕嘅風險係好低嘅！
見到上一次經期係3月，雖然經期係受好多唔同因素影響，但係遲咗兩個月唔係理想嘅情況，見到都提到今日有少量出血，可以留意下依幾日會唔會有月經，如果冇嘅話，都建議可以睇醫生，了解番身體狀況！
見到你都有提到食咗啲「類似調經」嘅藥，喺度都想提醒吓建議喺醫生診斷後先進食荷爾蒙藥物，因為每個人嘅情況都唔同，自己買藥食都有風險
咁其實有月經係咪一定冇懷孕?
我想問有冇可能係着床出血？定其實3月25日到宜家咁耐。
冇錯呀，如果嚟咗月經就代表冇懷孕。另外有關著床出血，其實係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣。一般由受精到着床大概係性行為後6至9日就會發生。而着床性出血並唔係一個常見嘅現象，即使真係因為懷孕都係只有少部分女性會出現嘅情況。
所以如果你出血嘅日子距離你發生性行為已經超過9日，又有持續地出血，顏色亦同平日月經差不多，咁基本上都可以排除係着床性出血嘅可能性。
感謝你地嘅回應，真係唔該哂，排除咗好多憂慮
到宜家都仲未嚟m,之後5月30日有去睇過中醫(冇話有咗 話身體好差)，嗰日到宜家都有脹痛同胸硬，但依兩日個情況輕咗，但量過又冇變大。
兩三日前陰道又有少少血
如果前兩三日出血嘅情況持續，就有機會係月經啦。確保左唔係懷孕之後，月經周期變得不規則，就有機會係身體出現咗其他情況，就好似你講嘅唔舒服咁，兩者都有所影響啊～
我想問調經藥會唔會導致肥？近排發現個肚大咗少少 ，而之前為咗調經三餐份量亦比較正常同準時，唔知係咪中咗？(之前提到有試過3個月冇嚟m 而最近就有2次m 分別係6月12日至6月19日 and 7月21日至7月27日)
想知係肥咗定點？有少少擔心
Hello~首先，調經藥即係荷爾蒙藥物，喺服用嘅初期係有機會導致水腫同體重增加嘅情況嘅，不過一段嚟講，3個月內就會消失，所以唔需要擔心
。
另外好似上面同事咁講，嚟咗月經嘅話就代表冇懷孕，而因為你最近呢兩個月都有嚟月經，咁就可以好肯定你係冇懷孕嘅，可以放心🫶🏻。
想問下喺依個時間點會肥嘅原因
因為荷爾蒙藥物裏面含有雌激素同埋黃體素，佢哋都會影響你身體排出水分的能力，所以喺身體未適應之前都會出現水腫嘅情況，感覺上就會好似肥咗咁。但係其實只要等身體適應，調節返荷爾蒙水平，呢個副作用就會消失～
我想問照以上咁睇3個月肥咗大概3kg正唔正常?(60kg→63kg)
仲有之前一直冇用過驗孕棒之類嘅野去測
呢個就好睇個人體質嘅，冇一個固定增重嘅數字。加上體重仲同飲食、運動、生活習慣有關，所以如果係持續增長嘅話咁應該係生活習慣嘅原因，藥物只係一個額外嘅因素。
如果擔心懷孕嘅話，可以喺性行為之後嘅7至11日進行驗孕，7日嘅時候會有初步結果，而11日個結果就最為準確。不過因為見到你已經嚟咗月經，所以可以好肯定7月27號之前發生嘅性行為都冇導致懷孕，可以放心～