Hello我想問下d關於做愛嘅姿勢問題。
琴日同男朋友做咗兩次，第一次我坐咗上去，都冇咩唔舒服，但係換到後入姿勢嘅時候，我男朋友每次用力頂，我都feel到陰道會收縮同埋痛，都未至於痛到要停，就係冇咁舒服，我想知道點解會痛，做完之後身體一直都冇唔舒服，只係後入大力頂個陣痛咗兩三下。（插之前冇咩前戲，我幫男朋友含咗幾下，帶咗套就坐咗上去）
同埋我想請教下點樣先做到傳教士嘅姿勢？而家同男朋友做呢個姿勢要男朋友企係地下，之後我訓床邊先插到入去，但係我想兩個人都係床上面，不過咁樣男仔會太高插唔入，我想知道應該點樣做，係咪男朋友d筋太硬跪唔夠低
你好，多謝你既分享。聽你咁講估計你哋性經驗可能唔係太多，亦都對性行為嘅方式可能唔係有太多嘅認識。發生性行為嘅時候有時會係令到身體有不適，或者感覺唔舒服，主要嘅原因係可能唔太認識對方嘅舒服位置，又或者性行為時用嘅力度或者插入方法，呢啲都會令到身體感覺唔舒服。不過最重要其實都係要雙方多啲溝通，例如：性行為嘅期間感覺到不適或者唔舒服，其實都應該比對方知道，或者暫停性行為甚或至轉換令到雙方都舒服嘅方式去繼續性行為，等千祈唔好覺得會影響雙方嘅意欲而啞忍。因為如果唔講，雙方係好難去改善同配合，長久落去甚至會影響大家既體驗而害怕發生性行為。
你咁次性行為產生痛楚，可能性有好多，例如：用力不當、體位唔適合自己等，所以都要作出溝通，然後大家互相探索一下適合既性行為方式。
至於傳教士方式，如果你地已搵到係企係地下可以進行，可以繼續嘗試呢種方式進行，如果係大家都係床上進行，我建議你地可以慢慢嘗試，唔好要求要立即做到。因為性行為體驗真係需要經驗同互相探索，才能夠做到雙方都有滿足同適合既方式。當然平時都可以大家傾下自己喜歡同舒服既性行為模式，等大家可以了解多啲。另外，亦建議你地可以增加前戲先進行插入式性行為，咁樣可以令大家都放鬆啲，亦會減少性行為時既痛感。
我而家keep住小腹有悶悶地痛，跟住有流d白色冇異味嘅分泌物出嚟，會唔會係子宮或者陰道有問題？
Hello 你咁嘅情況有可能係受排卵期影響而出現，因為當到咗排卵期前後，都有機會會小腹痛，同埋白帶增多。呢個情況可能持續幾個鐘，到兩三日左右就會完結。
另外都可能因為你上次發生性行為時唔小心整到陰道範圍，所以先會出呢個情況。因為白帶都有個功能就係清潔陰道。
不過都要好好留意身體，睇吓下腹作痛有冇變得嚴重，或者持續好耐，例如多過兩三日，同埋分泌物有冇變質、變色，或者分泌變多。如果有呢啲情況嘅話，就可能會係身體有其他問題，例如骨盆腔炎等等。如果有任何擔心或者可疑嘅話，都建議要去睇醫生啦。
但係我已經食咗避孕藥就快兩個月，應該唔關排卵事？ 下腹痛係每次性行為完咗嘅短時間內會有（可能兩三個鐘），之後就會冇事，係咪純粹撞得太大力？或者會唔會有關懷孕個方面事
btw食藥準時加帶套正確
如果你有食避孕藥，咁分泌物異常嘅情況就未必關排卵期事，但正如上面同事所講，可以係因為身體自然清潔陰道嘅功能，所造成嘅分泌物流出。
至於腹痛嘅情況，都有機會係性行為時太劇烈所造成嘅情況，但如果呢個情況持續嘅話，都建議你可以同伴侶商量一下有關姿勢，避免喺每一次發生性行為之後都會出現兩至三個鐘嘅腹痛。
最後懷孕方面，見你有提及又食緊避孕藥同埋發生性行為嘅時候都有使用安全套，如果正確使用嘅話意外懷孕嘅機會都係非常低～
我想問下如果做嘅過程中個套套少少上移咗（大概1cm左右）之後都有拉返落嚟，會唔會影響避孕機率？
睇你文字嘅描述，呢個情況唔會影響意外懷孕嘅機率，只要正確佩戴安全套，性行為之後都有檢查安全套武冇穿嘅話，就唔需要太擔心～
我仲有個問題想問，如果我有食含有維他命C嘅軟糖會唔會影響避孕藥，因為聽講維他命C會影響藥效
同埋都想請問返點樣先叫做正確使用，避孕藥同避孕套正確使用應該係點樣架？
維他命C係唔會影響避孕藥藥效嘅，可以放心～
安全套正確嘅使用方法如下：
分清楚安全套嘅正反面先使用。如果唔小心將安全套反轉咗，就要開過一個新嘅安全套黎用。因為陰莖一旦唔小心接觸咗安全套出面，佢就已經被沾污，一定要用過個新嘅。
留意安全套有冇過期，唔好使用過期嘅安全套。
喺撕開包裝之前要檢查包裝有冇漏氣，打開之後要將安全套頂部嘅氣泡擠走先戴上去，留空間畀男性儲存精液，減少破裂嘅情況。
絕對唔可以做了一半後才戴套，因為男性喺射精之前已有少量嘅尿道球腺液流出，裏面含有少量精子，都會增加懷孕嘅風險。
做完之後，記得要喺陰莖仲勃起嘅時候抽出陰道，再將安全套拔出。檢查安全套有冇破裂後，再打結扔掉。
而事前口服避孕藥嘅服用方式係，喺經期嘅第一日開始使用，如果係21粒嘅劑型，需要每日吃一粒，吃完21日停7日，下一包喺停藥嘅第8日開始服用，大約依照食3個禮拜、停1個禮拜嘅邏輯嚟服用。
如果選擇28粒嘅劑型，裏面就含有24粒有效錠同4粒無效錠、或者21粒有效錠同7粒無效錠兩種，用法都係由月經第一天開始服用，跟箭嘴指示每日吃一粒，唔需要停藥。一般嚟講，上述嘅低劑量口服避孕藥需要連續服用7至10天，當藥性喺血液中達到穩定濃度，先產生到避孕效果。如果正確服用，可以達到99.9％嘅避孕率。而嗰0.1％嘅好有可能係因為體質因素，或者因為同時服用其他影響避孕藥的藥物，好似抗生素、鎮靜劑等。而避孕失敗，多數係因為服用下一包藥嘅時間太遲、或者連續三日唔記得咗食藥。唔記得服藥都有補救方法嘅，只要喺12小時內盡快補食，並且繼續服用當天嘅藥丸，或者喺第2日連食2粒避孕藥。如果一連2日都唔記得食藥，應連續2天都服用2顆避孕丸，之後再每天服用1粒，直到食哂成包藥為止。不過，呢種避孕效果仍然有風險，最好喺漏食之後嘅7日之內，配合其他避孕方法，例如使用安全套等，確保避孕效果。不過，其實任何藥物都可能影響避孕藥裏面嘅荷爾蒙效力。所以，無論服用事前定事後避孕藥，如果同時服用緊其它藥物，最好配合埋另一種避孕方式。因為服用完抗生素之後，就算隔咗幾個鐘再食避孕藥，都唔能夠保證抗生素嘅藥性唔會影響避孕藥，畢竟藥物喺體內會有半衰期嘅情況，甚至可能影響新陳代謝。除咗感冒藥同抗生素會影響避孕藥效果，一啲精神疾病用藥，例如癲癇、抗憂鬱藥物等，佢嘅影響更大。如果有服用開上述藥物，咁喺服用避孕藥之前，一定要事先查詢婦科醫生，並針對個人情況做調整。
除咗藥物之外，體重都會影響避孕藥嘅功效。曾有經有報導指出，身體質量指數（BMI）大於27.3嘅女性，使用口服避孕藥後卻意外懷孕嘅人數，比起BMI指數標準嘅女性高出60％；假如BMI指數高達32.2，咁意外懷孕的風險就高出70％。因為雌激素蓄積在脂質層，先會降低避孕藥嘅有效濃度，影響效果。體重雖然會影響避孕藥效，但只要唔超出標準體重太多，一般嚟講，對於避孕藥效嘅影響不大。
如果擔心事前避孕藥嘅效果可能受其他藥物或過重的體重干擾，可以考慮使用子宮環呢類較高效嘅避孕方式。
當然，暫時市面上冇100%嘅避孕方法（除非結紮），但只要做足以上嘅措施，即使只用一種避孕方法，個懷孕機率都可以去到98-99％，唔需要太過於擔心。
如果我第一個月嘅第一個星期有食過感冒藥，咁我第二個月使唔使等7日建立藥效，定係已經有藥效。
仲有帶安全套到射之前掹出嚟除套射咗係屁股上面會唔會有危險（後入姿勢），之後都有30秒內立即沖身。
或者男朋友射係套入面跟住去沖身嘅時候，倒返入面d精液係我心口，跟住有慢慢流落去，大概到肚臍位我就用手接住咗再立即開水沖身，咁樣會唔會出事？
每次沖身都會順便檢查套套有冇穿，而且都有排走空氣再帶，帶好帶滿，發現有少少上移都會拉返落嚟，係咪已經好安全？
其實精液掂到水係咪已經會馬上死亡？
避孕藥早或遲10分鐘食係咪都冇咩影響？
因為我而家每日都feel到下體濕濕地，但係已經冇咗排卵期嘅白帶（之前未食藥會有蛋清分泌物），已經確定到冇排卵？我好擔心會唔會中咗所以下體先濕濕地，定係食避孕藥會有呢類型嘅副作用？
首先，精子暴露喺空氣中通常幾分鐘內就會死亡，而且精子需要有精液嘅保護先可以生存，所以當接觸到皮膚、紙巾等表面嘅時候，精液會被吸收同揮發，進一步減低精子嘅存活率，接觸到其他液體，例如水嘅話，好快就會死亡。所以只要性器官冇直接接觸，其實懷孕機率都係好低嘅。同埋好似上面咁講
另外，避孕藥早或遲10分鐘食嘅影響係不大嘅，唔使擔心。
分泌物增多唔係避孕藥嘅副作用，應該係排卵期嘅徵兆，或者係有性慾嘅表現，只要冇異味/質地變得混濁，咁係唔需要擔心嘅。而排卵期理論上會係月經週期嘅一半嘅前5日至後4日，不過首先要月經週期比較穩定，先至比較可作參考。
除咗計日數之外，我哋都可以藉由觀察身體嘅變化狀況，嚟判斷自己係咪進入排卵期。例如陰道分泌物增加，或是基礎體溫(Basal body temperature，BBT) 偏高等等，都是排卵期嘅徵兆。
如果想知道幾時進入咗排卵期，你可以每朝早一瞓醒就量一次體溫，然後記錄落嚟。喺排卵之前，體溫會稍微下降，而排卵後嘅24小時，體溫就會升高，並持續幾日。通常喺排卵前，女性嘅基礎平均體溫會係36.1°C~36.4°C之間，排卵後，會上升到36.4°C~37°C。
除咗體溫升高之外，排卵期仲有其它的徵兆：
» 陰道分泌物增加：分泌物通常會係透明而有彈性，質地好似生蛋白一樣，而排卵之後分泌物可能會變少，並顯得更濃或更混濁。
» 卵巢疼痛：腹部單側感到不適或疼痛。
» 陰道些微地出血
» 乳房壓落去會痛
» 性慾增加
不過提示返，排卵期同經期一樣，可能會因為作息、壓力、病痛等有變化，如果想最準確，可以用排卵試紙或者排卵棒做測試，咁就最準確喇～
但係食緊避孕藥唔係冇排卵期咩？仲會有排卵痛架？
仲有呢個問題
唔該晒
食咗避孕藥係冇排卵期嘅，如果咁樣嘅話下體濕應該係因為性慾嘅原因。至於你話會有痛嘅感覺應該係避孕藥嘅副作用，只要唔係太嚴重，都唔需要擔心㗎。
一般嚟講係唔需要嘅，除非身體出現不規則出血，代表藥效可能有降低，咁嘅話食完感冒藥之後嘅7日內最好都配合外用安全措施，第二個月就唔需要再等7日。