3月時check 到 微小脲原體 同人型支原體
無病徵既，然後食藥食左兩次抗生素療程，最近
覆完診 睇左報告， 原本有兩隻菌， 依家得返人型支原體因為我己經食左兩次療程， 加埋17日，醫生話食完呢次7日轉左藥， 可以考慮驗菌或唔驗都得。
因為佢話呢隻菌其實好難清， 過一排都有機會出返黎， 佢話所有婦科病都係咁， 免疫力差就會出返黎咁講， 仲話好多人都有呢隻菌，最緊要冇唔舒服同冇病徵就得啦， 佢話一般性病傳染醫生直情唔當呢兩個係性病處理，但婦科一般見到有都係盡量清左佢、 驚之後d菌愈生愈多咁解。
另外， 因為我上網成日見到支體體會影響日後生育/不孕/塞輸卵管， 但婦科醫生話唔會， 話衣原體先會，想問其實我可以照聽緊醫生咁講、 作觀察住先？
你好，收到你既問題，知道你內心一定有不安同擔心。其實我地都經常遇到好多有關性病，或者細菌感染嘅問題，佢哋好多時都唔知道點做，或者點樣去處理。不過你識得去睇醫生去做治療，其實呢個都係一個好好嘅開始。
首先醫生嘅建議其實係好專業，所以建議你都跟從醫生嘅治療方法去處理。知道你已經完成咗兩個療程，而家已經食緊最後療程嘅藥，以我哋既建議，你完咗藥之後可以跟醫生建議選擇再驗菌或者唔驗。不過我地覺得好多時病人都會不安，即使完成咗療程之後，因為菌唔係我哋肉眼所見到，所以都建議你可以在完成療程後，再去驗一驗菌。如果化驗結果係再冇菌，咁你可以唔需要太擔心，亦可以令自己放鬆一點。之後就盡量令自己嘅抵抗力同免疫力加強，例如：有穩定嘅作息時間、多食有營養嘅食物，同埋多做運動令身體強壯一啲。當然亦要採取安全措施去進行性行，避免感染其他病菌。
其實有好多細菌感染都好難去徹底清除，好多時候都需要靠自身嘅免疫力去抑制細菌。有啲細菌、病毒只要佢唔復發就算喺身體存在，其實對日常生活或者健康，都唔會有太大嘅影響。
雖然網上有一啲資訊會話某一類型嘅細菌會影響生育等等，但醫生話唔會，其實佢哋都係非常專業嘅，而且佢哋亦都有遇到有唔少臨床嘅病例，所以其實都可以遵從醫生嘅建議，只要保持住身體健康，唔好令呢啲病菌再度復發，其實可以觀察住先，亦都唔使太擔心話會影響生育能力。
希望呢啲建議幫到你啦！