加特納菌點做好?

各位大家好,我想問吓各位有冇中過加德納菌(細菌性陰道炎)? :smiling_face_with_tear:

咁我早前去咗睇婦科專科醫生,驗到有,不過佢開嘅藥只係得抗生素,而且我已經有抗藥性,醫生又話如果加德納菌係唔會有抗藥性,是確信的嗎? :thinking:

加上醫生叫我食完抗生素後塞 lady balxxxx益生元 3個月(隔晚塞,加上佢哋得呢隻藥),但係我記得之前有醫生都開過俾我,我試咗大概6-7日都係冇用,初頭開俾我呢隻藥嗰個醫生,都話好似唔好用,所以先唔再用佢,不過今次姑娘就話要試三個月先有一次維護效果. :disappointed:

咁其實我都喺網上面見到其他硼酸塞劑,不過問醫生意見嘅時候醫生,又因為國外嘅產品,所以俾唔到意見…

各位,通常如果食完抗生素之後仲會唔會用其他野維護返,唔好令佢再復發?(平時有食開Garden Of Lxxx 益生菌)

你好呀~ 或者我哋先講解下加德納菌(細菌性陰道炎)嘅成因先吖:)

陰道加德納菌係一種適合喺鹼性環境度生長嘅菌,由於平常嘅陰道會係弱酸性,一般嚟講呢種菌唔會可以喺陰道入面過度生長嘅~ 但係當陰道內嘅酸鹼度改變時(例如偏向中性甚至鹼性),陰道嘅菌叢生態就會失衡,令到加德納菌過度生長,而呢種菌係會抑制陰道內保持陰道弱酸性嘅細菌,咁陰道嘅酸鹼值又會進一步增加,令到加德納菌繁殖得越嚟越多,病情就會顯得好嚴重喇。

咁而家醫生建議嘅方法係做緊咩呢?抗生素會殺菌,係嘗試殺死啲加德納菌,但由於抗生素同時亦會殺死埋保持陰道弱酸性的細菌,所以就要用塞藥嘅方式去放返啲益菌入去陰道,令陰道能夠保持弱酸性嘅環境,咁就可以阻止加德納菌再次過度生長,咁就會變返一個健康嘅陰道環境嘞:)

呢個位我哋會建議你跟從醫生嘅治療計劃先,因為醫生一定會建議自己已知可行嘅治療方法比你~ 如果自行試藥,有機會弄巧反拙,因為無論係藥效、劑量定係服用時長等等都係一門好專門嘅學問,亦唔係每一種藥物/supplement 都適合每一個人,一不小心係會有健康風險架~

如果感覺治療效果緩慢,或者想可以防止復發,除咗服食一啲針對私密症狀嘅益生菌外,都可以注意以下幾樣嘢:

1)避免間接接觸造成嘅感染:係公共廁所如廁後,使用自己攜帶嘅紙巾作清潔;勤換毛巾等等

2)避免過度清潔陰道:由於陰道係弱酸性嘅,如果用咗鹼性嘅清潔液或清水去灌洗陰道,都會影響到陰道嘅酸鹼值,就有機會令到加特納菌容易繁殖,造成復發嘅情況

希望以上回答幫到你:)

1個讚

明白,多謝你意見