睇過人有隱性懷孕嘅分享，話會每個月都有月經，驗孕驗唔到，其實就算嚟咗月經係唔係都有懷孕嘅可能性？
你好～
大部分嘅隱性懷孕（Cryptic pregnancy）個案其實係當事人唔為意自己懷孕，例如因為長期經期不穩定，或者常有非經期出血，所以好耐冇真係嚟M 都唔察覺有異樣；以為嘔吐係因為食錯嘢／病咗；肚變大或體重增加以為係肥咗；又或者完全冇懷孕症狀所以亦都冇諗過有呢個可能性～ 呢啲Cryptic pregnancy 嘅例子都係因為冇諗過懷孕嘅可能，所以一直都冇過驗孕，直到孕期較長嘅時候先發現到～ 所以其實唔係驗孕驗唔到，而係好多符合呢個定義嘅人都冇驗過～
至於比較罕有嘅「驗孕驗唔到」嘅情況，機率係約2萬5千分之一，發生嘅原因係因為荷爾蒙失調而令驗孕時detect 嘅hCG 含量上升得較慢，而導致喺懷孕初期未能驗出positive 嘅結果，但係理論上喺懷孕一個月後身體已經會累積到一個可偵測嘅hCG 含量，而且而家嘅驗孕棒已經越來越敏感，越來越能夠偵測到低含量嘅hCG～
所以如果你喺任何情況下擔心自己有懷孕嘅可能，只要你喺性行為後嘅11日後（好擔心嘅話可以一個月後再驗多次～），根據返說明書指示咁去進行驗孕，個結果就係準確架喇～
希望以上回覆幫到你：）
想問問月經來臨前三日有少少血及啡色分泌物 下腹唔舒服及反胃 係唔係月經嚟？
月經前有出血或啡色分泌會有機會係流啡，通常經前有少量子宮內膜脫落嘅話，會導致經前有啡色／帶有血絲嘅分泌物，之後就會嚟經，所以血量會慢慢增加嘅。
另一種會導致流啡嘅因素係荷爾蒙，當月經週期中，體內黃體素唔足夠或者機能比較差嘅時候，就有機會出現月經前出血嘅狀況。
建議你再觀察幾日，睇下有冇出血嘅狀況，同埋之後嘅月經週期都可以多加留意，加上你有下腹不適，應該好快會月經來臨。而且通常咁樣嘅情況都係會維持幾日，因為通常跟住落嚟血量就會慢慢增加， 咁就證明你嚟咗月經啦，唔使特別擔心㗎。