最近剛開始同女朋友有插入式嘅性行為,但係我陰莖勃起係完全指向上,女上男下同後入等等體位都做唔到,只係做到男上女下…
同埋男上個時,唁知係咪因為要壓向平,入左之後我感覺到軟左同短左,抽插時陰莖好易出左黎(陰莖勃起有13CM),咁係咪陽萎要睇醫生?
同埋13CM如果唔軟係咪應該可以頂到最入?
你好，首先陰莖嘅指向其實係天生嘅，呢樣嘢係好難後天去改變。至於你話一啲體位做唔到，我相信同你初次進行插入式性行為方面同經驗唔多有關，其實性行為好多時候都需要雙方互相配合，有時並唔係一朝一夕可以做到理想既體位，而且唔同嘅體位都需要大家磨合，同埋睇下點樣先至可以令到雙方都舒服，所以有時候一啲體位做唔到，並唔需要太擔心。因為當大家互相磨合之後，同埋有更多經驗之後就可以慢慢嘗試到唔同嘅體位。
如果現階段你哋覺得男上女下係最舒服嘅體位，可以先嘗試用呢個方式進行性行為。至於其他體位如果覺得有困難，可以之後慢慢嘗試，但唔需要特別去逼自己要做到，因為如果夾硬去做，有機會令到身體受傷。
至於你話進入陰道之後感覺到陰莖變軟，可能係因為初嘗試插入式性行為心情緊張，而且大家未配合到一個舒適嘅體位，而令到你身體有反應而變軟話。同埋進入嘅時候覺得陰莖短咗，呢個應該係冇太大嘅關係，可能係進入嘅時候因位置不同令到陰莖隱藏咗喺恥骨嘅部分，所以感覺上好似陰莖變短，呢個都係好正常嘅情況，所以並唔係你所講嘅陽痿，因為陽痿係另外一種疾病。陽痿係指男性陰莖勃起有困難，不能勃起。如你能夠勃起進行插入式性行為，咁就唔係有陽痿，所以你唔需要去尋求醫生嘅協助。
我覺得你可以同伴侶一齊分享下今次性行為體驗，互相講下自己嘅感受同埋舒適度，而喺下一次進行性行為嘅時候再慢慢互相配合，長遠落去呢個問題應該係可以改善。
另外你問陰莖係咪可以頂到陰道最入，呢一個係比較困難嘅。因為陰道都有一定嘅長度，而且未必係同陰莖嘅長度互相配合。正如陰莖都有長有短，而女性嘅陰道亦都係有唔同嘅長度，所以你話係咪一定可以頂到最入，其實係唔可能，所以你亦都唔需要太擔心呢一個問題。只要能夠順利進入，而過程當中雙方都有歡愉嘅感覺，其實已經足夠。