陰莖點到下面

食緊避孕藥第三個月,今日係開新一排嘅第三日
係第二個月嘅停藥期有食過抗生素,問過醫生話唔影響避孕藥藥效
今日有發生性行為,帶套之前對方陰莖嘅頭有hi到我下面,但冇插入,只係點到,大概6-7下
之後就帶套正常進行性行為
咁樣會唔會有懷孕風險?
想知道使唔使再等七日先有避孕效果,因為有食過抗生素,都有少少擔心會懷孕

你好,你喺性行為時陰莖掂到外陰,引致有懷孕風險嘅情況 係非常之低,因為男方當時冇射精,縱使佢有機會有分泌尿道球腺液,但當中嘅精子亦非常之少,而喺接觸外陰嘅皮膚後有部分精子可能已經死亡,唔能夠生存,所以你唔需要太擔心會有懷孕嘅風險。之後你哋進行插入式性行為都有正確使用安全套,採取額外安全措施。加上你已服食避孕藥一段時間,其實避孕功能已經係身體上發揮。
至於你擔心曾經服食抗生素而影響避孕藥嘅效果,你諮詢過醫生,醫生話係唔影響,其實就冇問題。雖然有一啲抗生素係會影響避孕藥嘅功能,但並唔係所有抗生素都會有影響的,所以醫生都知道你服食邊一種類抗生素會影響避孕藥的。如果想安全一啲,建議你日後如果睇醫生嘅時候需要服食抗生素,都可以主動話畀醫生聽你係服食緊邊一種避孕藥,醫生開抗生素嘅時候,可能會盡量避免處方一啲會影響避孕功能嘅抗生素,如果一定要處方一啲影響避孕藥功能嘅抗生素,佢亦可以提醒你要注意。咁喺呢個時候,你就可以發生性行為嘅時候額外採取其他避孕方式,例如:使用安全套,所以你唔需要太擔心呀。

唔該:pray:t2:

Hello 如果我平時食藥係下晝4點食,但係今日要提早到下晝3點食,之後都會按返4點食會唔會影響藥效?

有時唔太方便食藥所以提早兩個鐘或推遲兩個鐘食影響大唔大?

如果你已經持續食藥三個月嘅時間,其實身體都已經適應咗藥效,對於早/遲一兩個鐘頭食,其實都冇太大嘅影響。

如果當時情況我非常濕,咁尿道球線液會唔會順住我嘅分泌物入咗陰道,定係我嘅分泌物會令精子更快死亡?
同埋其實食緊避孕藥係咪就唔需要擔心懷孕?
因為我自己feel到自從食藥後就冇排卵嘅蛋清分泌物,代表已經冇排卵?

仲有我係喺停藥期7日先食抗生素,個7日都唔需要食避孕藥,其實係咪就唔會影響避孕藥嘅吸收導致避孕藥失效?
我見說明書話服用完抗生素後7日都應該額外避孕,但係陰莖又hi到下面,好擔心而家食緊嘅避孕藥冇效:face_holding_back_tears:今日食緊第五日嘅藥
當時hi到我下面之後,我見到男朋友陰莖同佢身體之間拉咗條絲,唔知道係咪我嘅分泌物點到,或者係再之前我口交嘅口水,搞到都有d擔心。
冇直接插入而懷孕嘅機率係咪好低架?

首先尿道球腺液的確含有少量精子,但見你提及嘅情況,如果只係掂到,冇插入嘅話,其實都之外懷孕嘅機會非常低。

至於進食避孕藥之後發現排卵期時出現嘅分泌物少咗,其實避孕藥嘅原理係透過人造荷爾蒙抑制排卵,所以當你進食緊避孕藥,就代表原本身體自然嘅荷爾蒙就會比藥物取代,所以並唔會有排卵期,亦都會令排卵期時出現嘅分泌物減少。

至於喺停藥期間進食抗生素會唔會影響藥效,其實喺停藥期間,避孕功效依然發揮,而說明書嘅講法係想更加保障藥效,所以如果喺停藥期間發生性行為係有使用到安全套嘅話,就唔需要太擔心。基本上每一日有食避孕藥,其實即是發生唔安全嘅性行為,都唔會有懷孕嘅機會。當然如果唔進行插入式嘅性行為,即係性器官冇直接接觸,意外懷孕嘅機會係會更加低。

如果當時陰莖有掂到陰道口風險會唔會增加?
而家本應係排卵期,係未食藥之前,大概呢個時間下面就會開始變得好濕,但係而家並冇呢種情況,係咪代表冇排卵?即係我唔需要擔心陰莖掂到下面會有懷孕風險?
琴日發生性行為前,我下面d分泌物呈白色cream狀偏乾但冇異味,係咪正常?
唔好意思一直麻煩你地:pray:t2:

我係咪唔使擔心會懷孕,因為有食避孕藥,同埋醫生都講抗生素唔影響避孕藥,我係咪應該相信醫生?
我而家好擔心,想諗辦法令自己放心,因為陰莖個頭有hi到我陰道口,但冇插入。
當時我幫男朋友口交完再坐上去,之後就唔小心掂到,跟住掂完,我就見到佢下面都拉絲,佢話係我d口水,我好擔心係佢d分泌物,跟住又掂過我下面:face_holding_back_tears:

Hello~其實懷孕機率係好受個人體質影響嘅,例如精子活躍程度,易孕程度等等,所以我哋俾唔到一個好確實嘅機率俾你。只能夠話,只要性器官有直接接觸,就會有懷孕嘅風險。不過咁講啦,由陰道口去到子宮頸個距離相等於萬里長征,通常未到就會死一半以上嘅精子。加上好似上面同事咁講

所以其實真係唔需要咁擔心~

不過我有食避孕藥,個風險係咪可以再降低d?

係呀,所以唔需要太擔心懷孕~

我想請問下腹陰陰痛算唔算係避孕藥嘅副作用?
係咪頭幾個月食避孕藥都仲會有副作用?
目前嚟講我冇feel到排卵期嘅感覺,下面長時間都好乾,係咪代表避孕藥嘅藥效已經生效?

初期服食避孕藥係會有機會身體不適,但如果已服食一段時間就唔會突然不適,通常服用第兩三盒藥開始,身體會適應藥物,亦唔會再有副作用。而你下腹痛有可能係谷月經前既不適。建議可以去睇睇家計會醫生,等醫生睇下你服用緊既避孕藥,或者咩牌子嘅藥物會比較適合你嘅體質。
至於避孕藥開始服用一星期後,其實已經會係身體建立藥效,所以通常係叫大家係開始服食時頭7天才需要額外使用其他避孕措施。

我想知道通常經前綜合症會係幾時出現?
月經前一個星期定因人而異?

經前既不適係因人而異,正如有啲人會有經痛又啲人又無,所以好睇個人體質同健康,但通常都會係經前幾天至2,3天前不等,都係正常既。

避孕藥容易受影響例如食到其他藥或者屙嘔影響
咁避孕針有冇呢個問題?
雖然醫生同我講今次嘅抗生素唔影響,但唔知道點解始終唔放心
畢竟性器官有接觸,但冇插入。
我想知道類似我呢種情況意外懷孕嘅人多唔多?
即係龜頭掂到陰道口嘅呢個情況。
麻煩晒你地一直答我問題,我希望可以令自己放心:pray:t2:

同埋食過抗生素需唔需要重新計過個cycle?即係頭7日要額外避孕,重新開始計過,好似第一次食藥咁樣。