背景： 因荷爾蒙失調，醫生處方食兩至三個月
第一次服用，想請問：
優思明一排有21粒，然後停藥7天，再繼續第二排，想1. 請問是否在停藥七天期間會有月經？
2. 服藥後是否會減少該次月經？
3. 只有21粒，是否表示每21天就會來月經，即比之前來得更密？
Hello～首先同你解釋返避孕藥嘅原理先，避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。所以，喺避孕藥嘅影響下，唔會好似平時月經咁，因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外；服藥期間出現嘅「月經」其實係「撤退性出血」，即係服用活性藥物（粉紅色藥丸）期間，有荷爾蒙，而停藥/服用非活性藥丸（白色藥丸），其實冇荷爾蒙成份，而呢個荷爾蒙變化（下降）就會令到子宮內膜脫落，出現出血現象。所以係你停藥嗰七日裏面就會嚟「月經」。不過因為冇排卵，所以經血量會少啲，維持幾日數都會短啲，有啲服用者甚至會冇出血。而就算冇出血，對身體係冇好大影響嘅，所以唔洗擔心。
至於你問係咪會嚟得密咗，因為唔一定喺你停藥嗰日就即刻出血，所以係唔一定嘅。如果你本身月經周期較長，咁對比之下就會密咗。不過就算密咗都好，都唔會影響你嘅身體健康，所以可以放心～
不過你要有心理準備，食避孕藥嘅頭三個月月經周期都係比較唔規律嘅，有機會去到停藥期完都未出血。如果係咁可以跟返個規律照開新一排，唔需要等出血先開，以免影響已建立嘅藥效。
多謝你詳細分享，又明白了很多
1個讚