同男朋友試過做兩次⋯但係兩次都唔係好成功⋯
男朋友話有feel到有觸感⋯但係唔算得上舒服⋯
我未同男朋友做之前係處，但係經常自慰（外陰為多），係咪因為咁所以會鬆？
我同男朋友都鐘意做，點先可以令佢舒服？
同埋舒服嘅做愛男方supposed有咩感覺？應該會啜住？係咪因為我下面冇吸嘅感覺所以佢唔舒服⋯
利申：男朋友真心唔係牙簽，佢好粗⋯我好舒服，但係唔知點解佢唔爽到⋯⋯網上多講女仔冇feel，好少資訊話男仔冇feel點算⋯⋯
Hello你好啊，明白見到另一半喺性行為中無快感，都好影響自己心情。
首先，都想你明白自慰係唔會令到陰道變鬆嘅，包覆陰道嘅環狀肌肉組織彈性相當好，陰道都係一樣，並唔會因為自慰次數多而影響到陰道彈性度，陰道嘅鬆緊度係受先天因素或年齡增長影響嘅。而因為你本身已經有自慰嘅經驗，所以陰部更加容易放鬆，當對方未完全勃起嘅時候，就可能會冇咁舒服。
性行為中好重要嘅係大家都享受同投入，高潮唔係必然嘅目標，插入唔一定係最重要嘅，有適當嘅前戲同afterplay都好重要㗎！可以更加了解對方嘅喜好、敏感點，刺激身體反應同感受，令身心準備投入性行為，亦都可以建立更緊密關係，明白你都希望可以令對方喺過程中感到滿足，可以參考吓我哋Instagram呢個post關於前戲，前戲如前菜
除此之外，都有可能對方過往自慰嘅時候，已經較掌握適合自己嘅速度、力度，以及知道自己敏感嘅部位，所以相較於放入陰道，可能會覺得自慰嘅刺激比較大，依個情況可以嘗試透過同對方溝通，令你了解或者一齊探索大家身體敏感嘅部位，試下唔同嘅姿勢，了解下對方/自己身體嘅敏感部位，或者自慰時，咩動作、部位會舒服啲咁，慢慢搵一個雙方都覺得舒服嘅節奏，都有機會幫助到對方增加生理上嘅刺激。
每個人舒服嘅反應都唔同，例如有啲女仔有啲比較明顯嘅特徵，例如會叫或者又比較陶醉嘅表情，但係男仔就未必嘅，所以都有可能係對方已經咁都好舒服，但係冇啲咩特徵展現到出嚟，所以溝通係好重要嘅，了解對方喺過程中嘅感受、覺得舒唔舒服等。
希望以上嘅資訊幫到你！
唔該晒你⋯
我上網睇過一啲自測鬆緊度嘅方法，點知發現自己原來屬於過鬆
做嘅時候陰道仲成日都放氣⋯原來都係鬆嘅跡象⋯
可能係我天生太鬆
我都唔想咁㗎⋯有啲唔開心⋯
點樣先可以令男朋友都舒服到？
Hello 你好啊 首先想分享下，每個人嘅身體都唔同，冇一個標準定義好定唔好，亦都唔需要因為咁而感到失落，因為每個人嘅身體都係獨特嘅。
你所形容嘅放氣並唔係鬆弛嘅特徵，除咗性行為，日常有好多動作都可以令陰道口擴張，令空氣進入，當你轉換動作或者收緊返陰道口嘅時候，就會將內裡嘅空氣排出，形成好似放屁嘅聲音，係一件好自然嘅事，唔需要太擔心。可以參考下依個網站:
而有關鬆弛嘅問題，其實正正因為陰道係肌肉組織，會變鬆弛同性行為係無直接關係嘅。就好似身體其他肌肉咁，日常有冇鍛煉都會改變肌肉嘅狀態，荷爾蒙嘅分泌亦有機會改變陰部嘅外觀同肌肉，而隨著年齡增長亦有機會變得鬆弛，呢啲都係好正常。即使真係鬆弛，亦唔代表啲咩，其實都唔需要咁擔心呀。而改善方法，你可以試下做凱格爾運動。呢一組運動係透過反覆收縮同放鬆盆骨底肌肉，去強化膀胱肌肉、陰道肌肉同肛門肌肉嘅韌性。做法係嘗試收緊下腹部嘅肌肉，感覺會有啲似忍小便／大便，你會感覺到陰道口同肛門肌肉都緊緊咁受緊住，hold住30秒再放鬆，然後重覆。初期練習嘅時候可以按著自己嘅身體狀態去調節hold住嘅時間，例如由5秒開始慢慢適應再加強，每日練習嘅次數都要循序漸進，唔好強迫自己一下子就做好多下，有機會會出現反效果嘅。