我喺四月中發生過性行為，但冇留意安全套有冇穿，有嚟過三次經期但我唔肯定係咪經期，因為有次經期長度異常，有九日同埋好少血同血塊，有次正常，有次又好少血同血塊。
有驗過三次孕，喺性行為後9日 28日同51日後驗都陰性，但我好驚因為冇用晨尿或者尿液太多令驗孕棒失效。
我一直都係咁說服自己會冇事，但我知道宮外孕或者胚胎異常會驗唔到，所以都會有少少擔心。過往都會輸卵管兩邊都會痛，有時又會肚痾同埋便秘，咁我都會覺得係因為排卵期所以唔舒服就算數。但呢排仲突然間個肚一直都好脹，有幾日都嘔，但係仲未咁快有月經，距離經期時間都仲有至少13日，上網搵咗懷孕後個肚會點樣脹同自己而家嘅狀況好似，我都有諗過會唔會係脹氣，但係做過一啲舒緩脹氣嘅伸展運動都係解決唔到，好驚真係有咗，我使唔使再驗多次孕？
同埋有時基礎体温都會高，同埋嗰陣都會有一啲好似排卵期嘅分泌物，我平時排卵期嘅分泌物都會有啲唔同，好似係特別靭嘅黃色分泌物咁樣，咁我可唔可以確定嗰段時間係排卵期？咁如果我有排卵係咪就代表冇懷孕？
我一起身嗰陣肚臍嗰個位都係脹，想問吓懷孕初期係咪有咁嘅情況？普通肚脹係咪啱啱起身唔會有
Hello 你嘅情況相信都唔係懷孕。
首先，係性行為之後11日之後驗孕嘅結果都係非常準確嘅，就算係咪晨尿或者尿液數量係咪太多都好，個結果已經非常可靠。你睇到喺性行為之後第28同51日驗都仲係陰性，其實都已經係好準確嘅證據，證明咗係陰性，亦都冇必要再去驗孕。如果你真係唔相信結果嘅話，都可以去睇醫生，透過抽血或者超聲波等其他呢啲方法去驗孕，到時有比較權威嘅結果可能會令你更加相信得到。
而且，如果已經懷孕嘅話，係唔會有任何月經或者排卵嘅，如果你已經係呢兩三個月有3次陰道出血，其實都可以相信係真係月經，只係可能月經受到各種因素影響而出現咗少少異常，而唔係懷孕。呢啲因素可能係包括生活作息、飲食習慣、或者情緒壓力，你呢幾個月長期都有咁大嘅壓力諗住係咪懷孕，都可能係會影響到佢。
而且你都提到你有排卵期嘅一啲分泌物，懷孕之後其實係唔會有排卵嘅，即使不幸係有宮外孕都好，都係唔會有排卵。如果你驗過幾次孕都真係冇辦法放心嘅話，或者你可以考慮去買啲排卵測試棒，或者排卵試紙，去睇吓自己係咪真係有排卵。
至於肚脹嘅問題，其實係有好多原因可能導致肚脹，例如飲食習慣同埋情緒壓力，有時如果消化不良都係會令到啱啱起身就肚脹。
所以其實各種因素都顯示左你並冇懷孕，如果真係相信唔到嘅話，就唯有去睇醫生，或者去做其他懷孕嘅測試，到時由比較權威嘅醫生或者報告去話俾你知你嘅結果。
最後，如果發生性行為之後，即使當時已經帶咗安全套都好，都會有咁大嘅擔憂嘅話，其實都要考慮清楚自己嘅身心係咪真係已經準備好去發生性行為。畢竟如果帶着咁大嘅憂慮去發生性行為，其實都唔係一個理想嘅狀態，亦都唔會享受到。
更新一下 到而家都係有腹脹肚瀉情況 ，胸部亦越嚟越脹痛，如果係經前症候群，會唔會持續咁耐？
只可以話唔同女性嘅情況都唔一樣，而且喺每一次月經前嘅症狀都係有好多因素影響住，所以如果你之前係已經有月經，亦都驗孕結果呈陰性嘅話，咁就唔需要太擔心，而呢啲經前症狀都有機會係情緒壓力，生活作息或者其他因素所影響。