我6月10號和男朋友去staycation，有發生非插入式性關係，當時佢有帶安全套，冇插入，只係雙方嘅性器有互相摩擦，男朋友有射咗一次，事後檢查過後個安全套係冇穿到，之後有去一齊沖涼，中途可能有掂到一下陰部，不過我哋冇再發生其他事
第二日6月11號，因為我太驚，所以立即去買YAZ 28天嘅避孕藥食，當日就食咗兩粒，然後6月12號立即去家計會食咗緊急避孕藥，係單一荷爾蒙（黃體酮），醫生有叫我keep住食YAZ，所以我就一直有食，食到7月1號嘅時候，我唔小心食錯咗白色嘅藥丸（沒有藥效），不過都有係12小時內補食返粉紅色、有藥效嘅藥丸，然後今日再食第二粒粉紅色藥丸，不過因為唔小心食錯咗一次，搞到好驚自己避孕失敗。。。
我上一次嚟M係5月23號，嚟咗差唔多5-6日，但係因為我依家食緊避孕藥，到依家都未嚟M，只係第一日有陰部出血，再加一兩日白帶有啲啡色嘅野流出嚟。同時係食緊藥期間，我有頭暈頭痛、嘔吐、容易攰、腹痛、腹脹呢啲情況出現，同懷孕嘅早期徵狀好似，搞到好似真係有BB咁，到底我係咪真係有咗？
男朋友好努力咁安慰我話已經做咗好多野去避孕，應該唔會有事嘅，但係我自己真係好驚好驚，我好驚要落胎嗰啲，請問有冇人可以幫下我？我真係好驚，同埋覺得得自己面對呢件事，真係好孤單。。。
Hello, 睇左你件事既來龍去脈，可以話俾你知無咩懷孕風險，所以唔使擔心喇！
首先，你地係進行非插入式性行為，非插入式性行為既懷孕風險本身係低既，加上你地有使用安全套，而且你係第二日已睇醫生處方服食事後藥，咁宜家好安全。
不過就要提一提你，如果發生左唔安全性行為係唔應該去食事前避孕藥，因為事前避孕藥係平日持續服食既避孕措施，對於作緊急避孕係無作用既。不過你之後都識得去睇醫生食事後藥係ok既，要記住事後藥先係可作緊急避孕。
之於你話最近有頭暈頭痛、嘔吐、容易攰、腹痛、腹脹呢啲情況出現，相信同懷孕無關，應該係同你服食事前避孕藥有關。因為服食事前避孕藥初期係有機會感到不適，都係類似既徵狀，你可以再觀察多一段時間，如果徵狀持續，你需要去睇醫生，話俾醫生知你既情況，睇下有無需要轉服其他牌子既避孕藥，因為呢款避孕藥可能唔適合你。
至於你如果仲係好擔心，你可以先自行驗孕，自行驗孕其實可以喺性行為後11日進行，因為驗孕棒係透過檢測尿液中嘅hCG (人絨毛膜促性腺激素)含量，呢個激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果，而係11日後或者預計經期嘅日子驗孕結果會更加準確。你6月初有性行為，宜家驗孕結果已經好準備，不過其實可以唔使驗，因為你有事後避孕已經好安全。
你好，首先感謝你嘅回覆，不過我仲係有啲顧慮。。。
雖然我7月6號會覆診見醫生，不過都希望可以搵醫生幫手驗孕，感覺好似會可信啲，自己目前第一盒YAZ都會係呢日食完，所以我都諗緊要唔要繼續食藥，但係因為一直都未嚟月經，我擔心一直食藥會搞到月經好遲嚟。。。
想問我係食事前藥期間未嚟月經係咪正常㗎？因為醫生話要驗孕嘅話最快三個星期就驗到，我自己都有留意住白帶呢啲分泌物嘅情況，依家感覺好似有野谷住係度，但係就一直未嚟M，搞到我好驚自己有咗。。。
同埋我本身有抑鬱症，唔知係咪心理作用，我覺得食咗藥之後有陣時嘅抑鬱、不安、焦慮嘅感覺會增加咗好多，搞到自己都瞓唔好、食得唔好，想知避孕藥係咪都會有影響使用者情緒嘅副作用？
真係好多謝有人解答，不過我仲係好擔心，因為都係第一次面對呢啲事，男朋友都係第一次，所以我哋對避孕都唔係太了解。。。
你今次既月經係會推遲，首先，服食事前避孕藥平時會係月經頭幾日開始食，但你係月經後既時間開始，所以月經周期係會被推遲，而且你服食左事後藥，事後藥亦會令正常月經推遲。
你第一盒事前避孕藥快食完，如果你真係有唔舒服其實可以先暫停，到覆診個日再將情況話俾醫生知，睇下呢款藥係咪唔適合自己。同埋如果你唔係有太密既性行為，都可以考慮採取其他避孕措施，如：使用安全套。呢方面你可嘗試同男朋友傾下，睇下佢有咩意見，如：願唔願意每次使用安全套。
事前避孕藥其實係賀爾蒙藥，所以都有機會影響情緒，所以你都要一一同醫生講，睇下係咪真係適合食。至於，驗孕方面，如果經醫生驗孕你會較安心，都可以係覆診時一次過進行，不過記得一定要相信結果，否則驗孕後你可能仍感到困擾。