今日下午做完 但接近尾聲時男方發現個套串咗
就除咗 跟住無套插入不多於五下 然後外射
想問呢個情況係咪要食事後
男方又話唔大機會
唔洗食都得 但個人覺得保障起見係需要食
Hello~因為陰莖係射精前，已經會分泌尿道球腺液，內含少量精子，接觸到陰道嘅話都有機會導致懷孕。所以就算冇內射都好，都係有一定懷孕風險嘅。如果真係擔心嘅話可以考慮食事後丸，但係要留意番事後丸喺香港屬於醫生處方藥物，如果有需要嘅話要向家計會，公立醫院急症科，或者私家診所索取。另外因為事後丸係高劑量嘅荷爾蒙藥物，所以會擾亂你未來一至三個月嘅月經周期。同埋事後丸係一個月經周期內最多只可以食一次，所以食完之後剩低嘅日子就需要採用更加高效嘅避孕方式去避孕。
另外，無論你食唔食事後丸都好，如果想知道自己有冇懷孕，可以喺性行為之後嘅7-11日進行驗孕，七日嘅時候會有初步結果，11日之後驗孕個結果就最準確。如果嗰時嘅驗孕結果係陰性嘅話，咁就可以肯定冇懷孕啦！
同埋要記住性行為係兩個人嘅事情，如果真係懷孕嘅話，個結果係兩個人一齊承擔嘅。所以建議你同男朋友討論完之後，有咗共識，再決定下一步嘅行動。
但我依家病緊 有食藥 可以照食事後？
因為唔太清楚你食嗰隻藥嘅成份係咩，所以建議你如果考慮食事後丸嘅話，可以先向醫生查詢。記住帶埋你而家食緊嗰隻藥去見醫生，根據醫生嘅判斷再決定食唔食事後丸。