好擔心會懷孕

今日係啱啱黎完m一兩日到

  1. 如果隔住男方面褲+內褲摸男方性器官 再掂到陰部(無放入去陰道) 會唔會懷孕?

  2. 如果好似上面第一個情況咁講 咁樣有掂到 如果之後男方再幫女方口交 會唔會d口水會令到精子容易啲游入去陰道 然後有左? thanks

Hello~首先,精子暴露喺空氣中通常幾分鐘內就會死亡,而且精子需要有精液嘅保護先可以生存,所以當接觸到皮膚、衣服、紙巾等表面嘅時候,精液會被吸收同揮發,進一步減低精子嘅存活率。而口水係唔會令到精子容易啲游入去陰道嘅,反而會係阻礙。所以只要性器官冇直接接觸,懷孕機率都係非常非常低嘅。你以上嘅呢兩個情況都唔會令你懷孕,可以放心。

咁如果係男方著住面褲同內褲而女方咩都無著喺度磨 磨左半分鐘至一分鐘 無射精 咁會唔會有事?Thanks

因為精子係冇辦法穿透衣物纖維嘅,所以如果隔住底褲,性器官冇直接接觸嘅話,係唔會導致懷孕嘅,可以放心~

如果要有精液保護先可以生存 咁係咪即係如果無射精就唔會有事?

Hello~除咗精液外,興奮時所分泌嘅尿道球腺液都可能會有精子㗎,不過睇翻你嘅情況,因為都係隔住內褲同面褲,無論係精液定尿道球腺液都會被吸收,所以唔會導致懷孕嘅。

如果係隻手指掂到尿道球腺液 然後掂到陰部呢而唔係陰道呢?會唔會好大懷孕風險架?如果無射精嘅話

尿道球腺夜雖然含有精子,但其實數量非常少。另外好似上面嘅同事所講,如果精液接觸到空氣之後就會加速死亡,所以如果掂到手指之後,其實好大機會已經死亡,再接觸陰部嘅話,意外懷孕嘅機會都係好低。

好低咁即係有無話會有幾多機會?想問下你地有無遇過我呢種邊緣性行為但最後係有左嘅案例架?

同埋嗰時係啱啱黎完m嘅第一二日 月經週期嘅第8日左右 因為係咪話第14日先排卵 所以會唔會意外懷孕機率再小啲?

單憑文字嘅描述真係好難話俾你聽有幾大機會或者機率,雖然喺呢個平台出現邊緣性行為而導致懷孕嘅案例甚少,但相信社會上有其他人曾經遇到呢個情況。

至於排卵日係第14日呢一個說法,係基於一個好科學嘅角度去睇月經周期,喺科學嘅角度會將月經周期定為28日,所以喺中間,即係第14日嘅時候就預計係排卵日。但其實大部份嘅女性月經周期都唔係28日,正常嘅情況應該係23-35都有,亦唔係每一位女性都係月經周期嘅中間日子排卵,甚至有啲女性會喺月經嚟緊嘅時候排卵。所以喺月經後一兩日發生嘅邊緣性行為就並唔可以代表較低機會懷孕。所以如果都係擔心嘅話,就建議你進行驗孕,喺性行為後7日驗孕就會有初步嘅結果, 11日後就會有準確嘅結果。

好啊 唔該你地:pray:t2:

咁以我上面所寫嘅情況我係咪唔需要太過擔心?

其實唔使太擔心,你可以先自行驗孕先。

係咪其實如果要懷孕都好難?因為我見過話如果要懷孕嘅其中一個條件係要有大量精子先有機會可以去到懷孕?

咁好似我呢個情況咁 其實係咪如果只係尿道球腺液掂到陰部而唔係陰道 得咁少精子唔足以令到可以懷孕?

其實真係好難咁講,要導致懷孕嘅話,其實一粒精子就已經足夠,因為只要一粒精子同一粒卵子結合就已經足以懷孕。所以其實最好嘅方法就係好似上面同事所講咁,自行驗孕,到時都可以得到可靠嘅結果。

多謝你地解答我 但係仲係好擔心

所以想問多次 如果性器官無直接接觸 無射精 但係可能陰部唔係陰道 唔小心經手指掂到一滴尿道球腺液 會唔會好大機會意外懷孕?

你可以用減數嘅方法估算意外懷孕風險,因爲正如同事所講,要懷孕嘅話,要有一粒精子直接進入陰道,接觸到卵子,先大機會懷孕。而你嘅情況係:

  1. 隔住面褲&內褲接觸陰莖

如果尿道球腺液要穿過兩層衣物,應該需要大量嘅分泌先做到,而你亦會明顯見到面褲濕咗一達,請問男方有無咁嘅狀況?

  1. (假如有尿道球腺液)經過兩層衣物,再經手指接觸陰部

縱使尿道球腺液含有少量精子,但精子需要喺尿道球腺液、精液或陰道分泌物中先可以短暫存活,但男方衣物已經吸收(甚至話阻隔)咗頭兩種液體,所以基本上精子已經存活唔到。同埋精子同卵子一樣都需要有特定酸鹼度嘅環境先可以存活到,請問你當時觸摸完男方之後,手部有無明顯濕潤?又係咪處於弱酸狀態?同埋有無接觸陰莖分泌物後立刻接觸陰道?

  1. 你再三強調係接觸陰部,而非陰道

精子同卵子結合之後,受精卵正常情況會喺子宮内壁着床,就算真係宮外孕,亦只係喺輸卵管、子宮頸等體內位置懷孕,而你提到嘅陰部(你應該係想指陰道以外嘅下體部位?)係無辦法懷孕嘅

如果以上嘅問題都係否定嘅話,扣減之下,你懷孕嘅機會可謂微乎其微。假如你都係擔心嘅話,我會建議你進行驗孕,只要喺性行爲後11日檢測,就可以得到較準確嘅驗孕結果。再退後一步,如果你喺不安全性行爲後120小時内,你可以直接聯絡家計會領取緊急避孕藥。

當然,所有避孕措施只能高度預防意外懷孕,但並非100%確保唔會懷孕,最萬全嘅保障就係唔發生性行為,如果要發生性行為,盡量做好安全措施,就可以將避孕機率提升到超過99%啦。

  1. 無啊

  2. 手指係無濕 但係唔知會唔會隻手指係乾都會有精子係隻手指度?

  3. 我意思如果係我掂到尿道球腺液之後好似唔小心掂到出面一下 即係掂到陰部無擺入去陰道 純粹想問下會唔會咁樣可以由出面游入去陰道?

首先,精子係必須要有精液或者尿道球腺液先能夠生存到,就好似人要空氣先能夠生存到一樣。如果手指係乾,就即係精子失去咗生存嘅媒介,係生存唔到嘅。
同埋,精子亦都唔係有腦,佢如果本身唔係陰道嘅話,係唔會識得自己游去陰道入面。如果啲尿道球腺液只係係陰部而非陰道,精子係唔能夠離開尿道球腺液然後去咗陰道入面。
所以你係唔需要咁擔心懷孕呢個問題。真係放心唔到嘅話,都可以自行驗孕,到時有客觀結果好過係到自己估估下。

如果係乾 但係少少痴笠笠呢?

同埋想問下如果邊緣性行為7日後驗左係陰性 係咪就無事?多唔多7日係陰性但係11日嘅時候會變左唔係陰性?

求解答 thanks