有啡色分泌物

想問下有啡色分泌物係咪正常
已經流咗幾日

琴日有用clear blue驗過係negative (距離上一次性行為已經過左一個月)係咪準備嚟m?

啡色嘅分泌物,有機會係因為排卵期出血或者荷爾蒙變化所造成,成因係有好多嘅,所以如果冇其他唔舒服嘅症狀,都算係正常嘅情況~

距離性行為超過11日嘅驗孕結果已經非常準確,所以可以好肯定你冇懷孕。暫時可以再等吓先,睇吓係咪就快嚟M~

想問下其實如果有撤退性出血 係咪一定冇懷孕?
同埋我平時啲m唔準 係咪都會導致下一次月經會推遲?

唔係太明白你有撒退性出血既意思,可以分享多啲細節嗎?
因為撒退性出血係食完事後丸之後嘅一個星期內出現,如果無食事後藥作緊急避孕應該唔會有撒退性出血。所以你提到撒退性出血,係咪今次性行為後有服食事後丸?
不過都可以講下事後丸既原理你知,因為事後丸係通過抑制排卵同埋改變子宮內膜環境嚟阻止懷孕,所以有機會未到原來月經嘅日子就出血。通常撒退性出血嘅出血量同日數都會比正常月經少,呢個係屬於正常嘅情況,而撤退性月經係可以當左一次月經計算嘅,所以下一次嘅月經就要由撤退性出血完咗之後開始計算,即月經會延遲。亦都有部份女性食完事後丸之後係冇撤退性出血嘅,所以就算冇撤退性出血都唔需要太擔心。
而事後丸係高劑量嘅荷爾蒙藥物,所以會擾亂嚟緊1至3個月嘅月經週期。如果你本身月經週期都唔準,咁就好大機會會擾亂。

係呀 我有食事後丸 食完過幾日就好似嚟m咁 所以懷疑係撤退性出血
咁我而家係咪可以排除懷孕嘅可能?

如果你有服食事後藥,之後個次係撒退性出血黎,所以已可排除懷孕既可能性,你唔使擔心了。
另外,由於你服食左事後藥,你下一個月經周期會由撒退性出血開始計算,所以下一次月經係會延遲的。

唔好意思 想問下一直keep住有啡色分泌物係咪正常? 因為佢已經流左7日 有時多有時少 同埋下腹會有啲悶痛

你好,呢啲係食咗事後丸之後嘅副作用嚟嘅,因為事後丸係高劑量嘅荷爾蒙嚟,喺緊急避孕同時會打亂你身體嘅荷爾蒙水平,從而導致不規則陰道出血,亦即係而家你見到嘅流啡嘅現象,而佢幾時會消失亦好視乎個人體質。

呢個情況下建議你可以再觀察幾日睇吓佢會唔會自行消失,但係如果佢血量明顯增加或者真係唔停,又或者出現其他嘅不適,就建議你去睇醫生講返幾時食咗邊隻事後丸,等佢幫你評估你嘅情況喇~

我睇到你哋其他post寫話有撤退性出自就重新開始計月經週期 但係已經差唔多到一個月 都仲未嚟m 而係不停咁流:smiling_face_with_tear:

流啡*

你意思係流啡嘅情況已經流左咗一個月?持續每一日冇停過?因為如果咁嘅情況的確係唔經常見到,如果你亦都持續出現腹痛或者其他身體異常情況,都建議你去睇醫生啦:ok_woman:t2:

唔係連續一個月 係一個星期:smiling_face_with_tear: 唔好意思 寫得唔好
而家係有一個月未嚟m但keep住一個星期咁流啡:bowing_woman:t2:

根據你既情況,可能係月經前既流啡,應該係就快黎月經,所以你可以再觀察多幾日睇下係咪月經來臨,如果之後有月經就唔使擔心。但如果月經沒有黎,但又持續流啡,就要好似同事建議咁去睇醫生檢查一下,因為有機會係其他既婦科問題而令不停流啡。

但係我已經流咗一個星期 如果正常嚟講有撤退性出血嘅話 我應該係呢兩日嚟m 但係而家都係流緊啡色嘅分泌物 我一直都同自己講話唔會有bb 但係會唔會有機會係宮外孕 因為我上網見到有機會係宮外孕:face_holding_back_tears:

有好多原因都可能會導致流啡,雖然宮外孕都可能會有流啡嘅情況,但係如果你係宮外孕嘅話,你驗孕都應該會係見到係Positive有懷孕。但你之前話你喺性行為之後一個月驗過孕,而個結果係陰性,咁嘅話就可以排除左係宮外孕嘅可能性。所以你都可以好似上邊同事講咁,觀察吓係咪要來月經,或者去睇醫生檢查一下。