上次月經05/07，26號男友先自慰後用鹼液清洗，再戴套進行性行為。今日朝早開始有血，下晝去廁所之後發現廁紙上面有兩塊帶血嘅白色長條型物體，每塊大概一寸長，摸上去有少少硬。
以往月經時都比較多血塊同量多，亦都會有經痛。時間唔準，試過一個月至三個月不等先嚟一次月經。而今次月經除咗有白色物體之外，血量/顏色/痛嘅程度都同以往差唔多。
請問月經有白色塊狀物係咪正常，抑或有冇流產嘅可能？
你好～
聽你嘅描述，唔大機會會同流產有關，因為你性行為嘅時候有全程佩戴安全套，而今次嘅月經嘅血量/顏色/痛嘅程度都同以往差唔多，咁就應該係月經嚟喇～
咁啲白色物體可能會係咩呢？有兩個可能性嘅：
1）月經內膜
經期期間，身體會分泌抗凝血劑去令內膜變成液態嘅經血，有時當啲抗凝血嘅濃度追唔上內膜剝落嘅速度，經血入面就會出現血塊，甚至係內膜組織，佢睇落會係白色，有啲似肉咁嘅
2）白帶
就係平日嘅陰道分泌物，一般嚟講佢應該係透明偏奶白色嘅液體，但一旦陰道出現念珠菌感染，就有機會出現好似豆腐渣咁嘅分泌物
由於你話佢係長條形嘅，亦有一定硬度，所以睇嚟比較大機會會係1～ 一般嚟講呢個情況係唔需要擔心嘅，但係如果完咗月經都有類似嘅分泌物，或者之後嘅經期都頻頻出現類似嘅白色塊狀，就建議你諮詢下醫生嘅意見喇～