Halo halo
琴晚如廁時突然發現內褲上有一滴鮮血
之後用紙巾抹嘅時候（3-4次）仍會沾上鮮血
但係距離我預計月經嘅時間仲有一個禮拜
宜家早上用紙巾就抹唔到有鮮血，護墊上都冇任何血
應該就唔係提早嚟m？
最近都有發生性行為但係每次都有用套
冇做water test但係會jit下睇下有冇穿/漏
琴日都有發生性行為都係有用套
應該唔係著床出血？
著床出血會唔會係鮮紅色？
定可能係性行為時撕裂到？但係會唔會咁遲到凌晨先出血，或者其實我身體應該已經適應咗，應該唔會撕裂到？
啱啱有用驗孕棒check過，冇懷孕，應該唔係宮外孕嘅出血？
宮外孕係咪都會test到有懷孕，同埋宮外孕一開頭出血會係鮮紅色？
想問仲有啲咩情況會導致我咁樣突然出血，好驚最近冇食藥物
補充: 之前發生性行為後冇發生過出血
今次嚟講，我係琴日下午發生嘅性行為，但係凌晨時先有抹到鮮血。如果真係撕裂到應該性行為後即時如廁就會有鮮血？
想知其他異常出血嘅原因
Hello~首先好欣賞你進行性行為嘅時候有使用安全套～雖然冇灌水檢查，但係只要嗰隻安全套係你用開嘅牌子同埋尺寸，一直以來都冇咩問題，又唔係試緊新款，咁其實懷孕嘅機率都係好低嘅
。
至於陰道出血就有幾個原因，有機會係因為排卵期出血。當嚟月經嘅時候出血出唔晒，就有機會出現排卵期出血，呢個情況係相當普遍嘅，通常一個禮拜內就會消失，所以唔需要擔心。另外，就有機會好似你咁講，係性行為嘅過程之中磨擦得太犀利，所以造成出血。陰道有傷口，唔一定喺性行為之後就能夠即刻發現，因為有機會個傷口好入，或者去到你行路，有激烈郁動嘅時候先會造成出血，所以唔係即時發覺到。而好多時候都係因為手交嘅時候冇剪到指甲，或者啱啱剪完指甲所以特別鋒利所造成嘅。當然亦都有機會係因為潤滑唔夠，所以造成撕裂。如果係呢個原因嘅話，就要留意清潔，避免細菌發炎。一般嚟講，陰道嘅傷口三至五日就能夠完全康復，所以唔需要太擔心。
至於着床性出血嘅顏色好多，不過一般嚟講只會維持1-2日，同埋個出血量係一個護墊就能夠裝得晒嘅。所以如果出血超過兩日嘅話，就可以肯定唔係着床性出血啦！
另外，都會想問吓你驗孕嘅時候距離你上一次性行為相隔咗幾多日？因為一般嚟講驗孕係喺性行為之後嘅7-11日進行嘅，7日嘅時候會有初步結果，11日之後嘅結果就最為準確。所以如果你嗰日驗孕已經過咗11日嘅話，咁個結果其實就已經相當準確，可以肯定你冇懷孕。見到你有問關於宮外孕嘅情況，因為驗孕棒其實係透過尿液測緊hCG嘅水平。咁咩係hCG呢？就係如果真係懷孕，當受精卵著床，身體就會分泌嘅一種荷爾蒙，而hCG嘅分泌會隨著懷孕嘅日子增加。一般來講，7日已經會有足夠嘅水平可以檢測得到初步結果，11日之後就會有好準確嘅結果，你愈後嘅日子驗孕，就會因為體內嘅hCG會愈多，而愈容易得到準確嘅驗孕結果 。所以即刻話只要懷孕就一定能夠驗到，只係唔能夠確定佢係咪宮外孕。由於宮外孕都唔一定會出血，所以呢邊都會建議你根據返時間進行驗孕，咁就最為客觀可靠啦！