會否有性病?

昨日與性工作者進行口交…
她主要手用…最後射精的時候用口

而我也有為她口交陰部…事後懷疑對方是變性人…

事後回家用了兩次漱口水消毒

今朝發現下面頭部有1mm x 1mm左右傷口…
而口腔舌頭下有點腫…

請問我大機會患有性病嗎?現在我可以點做?在呢段時間不應該和伴侶kiss 和性交?

現在很擔心…後悔……請幫幫我

Hello 照你所講嘅情況,的確有機會會傳染到性病。

如果係發生性行為嘅時候冇用到安全套,再加上你發現自己陰莖有傷口,而你個口又接觸過對方嘅陰部性器官,呢啲都係高風險會令性病傳染嘅途徑。

至於你話口腔舌頭腫,並判斷唔到係咪感染到性病。一般嚟講,如果真係驗到有性病嘅病徵,都可能會係有肉粒、水泡、潰爛、感到痕癢或者灼痛、或者有異常分泌物。而且性病都有空窗期(即係病毒量提高到能夠被檢測到)同潛伏期(即係病徵開始出現),所以都未必會咁快有病徵出到嚟。

你嘅情況都會建議你做返性病檢測先,一般嚟講性病嘅空窗期都係3個月內,所以你都可以係3個月後去相關嘅醫療機構或者相關嘅NGO做返性病檢測。係做性病檢測,知道自己有冇性病之前,呢段時間就盡量唔好同任何人,包括你嘅伴侶,有任何嘅性接觸住,避免傳染到比其他人,亦都可能會影響到你性病檢測嘅結果準確性。

不過即使不幸真係檢查到性病都好,都唔使太過絕望,因為而家好多性病其實都已經能夠被治療得到,係經過治療之後,當病毒量降低到不能被檢測嘅水平嘅時候,到時都唔會傳染到比其他人。

最後都提醒返,有機會傳染到性病嘅原因並唔係因為性工作者本身好危險,而係發生性行為時並冇做足安全措施。只要冇做到安全措施,喺同任何人發生性行為嘅時候都有機會會傳染得到性病嘅。所以都要記住做足安全措施。

希望幫到你

1個讚

請問現在情況會有機會中什麽類型性病?
而中的機會高嗎?

首先性病係屬於傳染病,不分年齡、性別、種族,一般透過性接觸,不論係性交、肛交、口交或生殖器之間皮膚接觸,就有機會經由血液、精液或其他體液感染性病。而性病一般可以分為細菌型性病,或者係病毒型性病。前者大多數都可以完全根治,而後者大多數未有藥物可以完全根治,但可以控制病情,例如愛滋病,性病疣(椰菜花)。所以你冇帶安全套口交的確係會增加感染性病嘅風險。而當高風險體液,例如精液、尿道球腺液、陰道分泌物、腸液同血液,直接接觸到性器官、比較脆弱嘅黏膜組織(例如口腔、肛門、陰道、尿道口),特別係當上面有開放性傷口(正在流血)就會有比較大機會造成性病傳播。根據你嘅描述,因為你嘅下體有傷口,雖然唔肯定對方嘅口腔有冇傷口,但係因為口腔屬於比較脆弱嘅黏膜組織,加上你哋雙方都有係冇使用安全措施嘅情況下幫對方口交,所以係會有較大嘅風險感染性病嘅。至於有機會感染到咩類型嘅性病就唔能夠確定,因為基本上所有嘅性病都係會喺冇用到安全措施而接觸到高風險體液嘅情況下傳播,所以唔做性病測試嘅話係唔能夠確定嘅。

不過好似上面同事咁講,因為唔同性病都有各自嘅「空窗期」同「潛伏期」, 1. 係呢段時間裏面病毒或者病菌潛伏喺體內唔會有任何病徵。而即使你已經有病徵都好,都需要過一段空窗期,等病毒嘅數量累積多啲,先至可以透過唔同嘅方法檢驗出病毒/病菌。以下就係一啲常見性病嘅潛伏期:

生殖器疱疹(疱疹二型):約2-5天

淋病:約1-14天

滴蟲:約4-20天

衣原體感染:約7-21天

梅毒:約9-90天

性病疣(椰菜花):約 1-8個月,平均為3個月

以上嘅時間都係一個平均數值,有好多人過咗呢段時間都未出現病徵,其實都係好正常嘅。除咗要睇你當時接觸到嘅病毒量,仲要睇你本身身體嘅狀況健唔健康。

愛滋病比較特別,佢有一個叫空窗期嘅時期,就係感染病毒後,體內嘅病毒量未能被快速測試檢驗到嘅果段時間。一般坊間一啲免費嘅性病快速測試都需要大概係3個月左右嘅時間,身體嘅病毒量先至可以上升到可以檢查到嘅水平。係空窗期期間,雖然檢驗唔到,但係都可以傳染俾其他人嘅。而且愛滋病嘅潛伏期就半年到10年都有,所以感染咗愛滋病之後未必真係會立即發病嘅。

只要你係進行過一次唔安全嘅性接觸之後大概3個月,做一次全面嘅性病檢查,其實已經可以檢查到全部嘅性病。亦有好多性病係感染後係毫無病徵。即使測試結果真係陽性,都唔代表係因為今次嘅性接觸導致感染。但現時醫學昌明,大部分性病都可以透過藥物或者治療完全治癒,其他亦可以透過藥物去控制,並唔會對日常生活構成重大影響。

另外都想比你知道,你有呢啲擔心可能係因為受到社會文化中對於性工作者嘅歧視同污名化影響,將性工作者同「性病」/「污糟」呢啲負面標籤連結。但性工作者為咗工作同自己嘅身體健康,會更加注意安全,會主動要求要使用安全措施,亦會恆常地進行測試。反而係好多時候客人唔肯戴套,甚至喺性行為過程中除套,而令性工作者面對好高嘅風險。會唔會感染性病其實同性行為對象無關係,有好多人都係同自己嘅親密伴侶發生完性行為之後發現感染性病。會唔會導致性病傳播首先取決於你或者對象本身有冇受感染,其次係當你哋發生性行為嘅時候有冇正確地使用安全措施。如果有正確使用安全措施的話,即使你同感染者發生性行為,會導致傳播嘅風險都係非常之低。

最後,如果想更加安全,除咗性行為全程正確使用安全套之外,亦可以考慮唔係發生插入式性行為嘅情況下,都使用安全套,或者口交套呢啲阻隔式嘅安全措施(關於口交套嘅資訊,可以參考:Login • Instagram )。喺性行為、性接觸期間使用安全措施,保護自己同性伴侶,其實係每一個人嘅責任。

如果你未決定去邊度驗血,建議你可以選擇去以下機構做免費嘅性病測試。 政府社會衛生科服務診所:各類型性病檢查(較全面,能即時知結果及比藥) 關懷愛滋:25歲或以下青少年、男男性接觸者-愛滋滋病病毒/梅毒/淋病/衣原體/丙型肝炎 香港愛滋病基金會:愛滋滋病病毒/梅毒/丙型肝炎 再思社區健康組織 (C.H.O.I.C.E.) :愛滋病病毒/梅毒 *因為最近受疫情影響,建議前往之前,先到相關網站睇下機構有無開~!
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時,就可以先及早求醫。不過如果未有出現明顯病徵的話,都建議考慮三個月(三個月已經過左大部分性病嘅空窗期)後,再一次過去做一個全面嘅性病檢測,會比較準確🫶🏻。

記住,如果真係感染咗性病嘅話,就一定要積極進行治療。因為如果性病得到治療嘅話,致命嘅風險都係好低嘅。而當病毒或者病菌嘅數目受藥物控制,減低到冇辦法被檢測到嘅時候,咁即使你同其他人進行性行為,性病都唔會傳染俾其他人(Undetectable = Untransmittable)。所以及早發現及早治療最重要,同埋記住要定期檢測!